ខេត្តកំពង់ឆ្នាំង ៖ រយៈពេលជាងមួយខែកន្លងទៅនេះ ជំងឺគ្រុនឈាមបានកើតមានឡើងក្នុងទឹកដីខេត្តកំពង់ឆ្នាំង ជាពិសេសកើតច្រើនជាងគេនៅស្រុករលាប្អៀរ ដែលធ្វើឲ្យមានការព្រួយបារម្ភ ក្នុងនោះផងដែរប្រធានមន្ទីរសុខាភិបាលខេត្តអំពាវនាវឲ្យប្រជាពលរដ្ឋចូលរួមថែរក្សាកូនចៅដោយការពារពីមូសខ្លាខាំ ។ លោក ប្រាក់…
ខេត្តកំពង់ឆ្នាំង ៖ រយៈពេលជាងមួយខែកន្លងទៅនេះ ជំងឺគ្រុនឈាមបានកើតមានឡើងក្នុងទឹកដីខេត្តកំពង់ឆ្នាំង ជាពិសេសកើតច្រើនជាងគេនៅស្រុករលាប្អៀរ ដែលធ្វើឲ្យមានការព្រួយបារម្ភ ក្នុងនោះផងដែរប្រធានមន្ទីរសុខាភិបាលខេត្តអំពាវនាវឲ្យប្រជាពលរដ្ឋចូលរួមថែរក្សាកូនចៅដោយការពារពីមូសខ្លាខាំ ។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានឲ្យដឹងនៅព្រឹកថ្ងៃទី១២ ខែមិថុនានេះថា ជំងឺគ្រុនឈាមបានកើតឡើងយ៉ាងច្រើននៅខេត្តកំពង់ឆ្នាំង ហើយច្រើនជាងបណ្ដាឆ្នាំមុនៗ បើគិតមកដល់ពេលនេះបានកើនឡើងចំនួន២១៥ករណី ។ ជាក់ស្តែងក្នុងថ្ងៃនេះមានអ្នកជំងឺគ្រុនឈាមកំពុងសម្រាកព្យាបាលក្នុងមន្ទីរពេទ្យមានចំនួន៨០ករណី ។
លោកបានបញ្ជាក់ដែរថា ក្នុងចំណោមអ្នកជំងឺទាំងអស់មានមនុស្សចាស់ចំនួន៣នាក់កើតជំងឺគ្រុនឈាមផងដែរ ។ ទោះបីជាយ៉ាងនេះក្តី ពុំមាននរណាម្នាក់បានរងគ្រោះថ្នាក់ដល់ជីវិតនោះទេ ។
លោកសូមអំពាវនាវដល់ប្រជាពលរដ្ឋសូមចូលរួមប្រុងប្រយ័ត្ន គឺត្រូវសម្រាន្តនៅក្នុងមុង ការពារកូនចៅកុំឱ្យលេងនៅទីងងឹត និងមានវិធានការកម្ចាត់មូសខ្លា ដូចជាត្រូវលុបបាត់ទឹកដក់ក្នុងសំបកកង់ឡាន ក្នុងថ្លុកត្រពាំងក្បែរផ្ទះ ត្រូវដុតសំរាមជុំវិញផ្ទះ និងត្រូវដាក់ថ្នាំអាបែតក្នុងពាង ឬអាងទឹកដែលភ្នាក់ងារយកទៅចែកជូនតាមផ្ទះបងប្អូនជាដើម ។
តាមការបញ្ជាក់របស់គ្រូពេទ្យនៅអាគារកុមារដែលកំពុងព្យាបាលជំងឺគ្រុនឈាមបានដឹងថាចំនួនអ្នកដែលមកព្យាបាលច្រើនជាងគេគឺនៅស្រុករលាប្អៀរនិងស្រុកបរិបូណ៌ បន្ទាប់មកស្រុកទឹកផុស និងស្រុកកំពង់លែង ៕ (កែសម្រួលដោយ ៖ ធីតា)
ចែករំលែកព័តមាននេះ