រាជធានីភ្នំពេញ ៖ បើទោះបីជាវិស័យអចលទ្រព្យ ដីធ្លី និងឧស្សហកម្មវាយនភ័ណ្ឌ បានលូតលាស់ខ្លាំងនិងវ៉ាដាច់លើវិស័យកសិកម្មក្ដី ក៏វិស័យមួយនេះនៅតែជាវិស័យស្នូលមួយក្នុងការចូលរួមអភវិឌ្ឍន៍សេដ្ឋកិច្ចកម្ពុជា ដោយសារតែប្រជាពលរដ្ឋមួយចំនួនធំ នៅតែពឹងលើវិស័យកសិកម្ម ដូច្នេះហើយទើបរដ្ឋាភិបាលនៅតែស្វះស្វែងកសាងហេដ្ឋារចនាសម្ព័ន្ធ…
រាជធានីភ្នំពេញ ៖ បើទោះបីជាវិស័យអចលទ្រព្យ ដីធ្លី និងឧស្សហកម្មវាយនភ័ណ្ឌ បានលូតលាស់ខ្លាំងនិងវ៉ាដាច់លើវិស័យកសិកម្មក្ដី ក៏វិស័យមួយនេះនៅតែជាវិស័យស្នូលមួយក្នុងការចូលរួមអភវិឌ្ឍន៍សេដ្ឋកិច្ចកម្ពុជា ដោយសារតែប្រជាពលរដ្ឋមួយចំនួនធំ នៅតែពឹងលើវិស័យកសិកម្ម ដូច្នេះហើយទើបរដ្ឋាភិបាលនៅតែស្វះស្វែងកសាងហេដ្ឋារចនាសម្ព័ន្ធ ធារាសាស្ត្រជាច្រើនទៀត ដើម្បីលើកកម្ពស់វិស័យកសិកម្ម ។
បើតាមលោក ស្រី វុឌ្ឍី អគ្គលេខាធិការក្រសួងកសិកម្ម រុក្ខាប្រមាញ់ និងនេសាទបានប្រសាសន៍ថា ដោយសារតែវិស័យកសិកម្មនៅតែដើរតួនាទីសំខាន់ក្នុងសេដ្ឋកិច្ចជាតិនិងប្រជាជន ដូច្នេះរដ្ឋាភិបាលបានជំរុញឱ្យមានការអភិវឌ្ឍសហគមន៍ ក្នុងនោះ ក៏មានការសហការរវាងកសិករ និងអ្នកទិញ ដោយមានការចុះកិច្ចសន្យាច្បាស់លាស់ផងដែរ ដើម្បីឱ្យកសិករដែលផលិតទំនិញបានហើយ មិនចាំបាច់ភ័យព្រួយរឿងអត់ទីផ្សារទៀតឡើយ ពីព្រោះ មានអ្នកបញ្ជាទិញនៅរង់ចាំទិញស្រាប់ហើយ ។ លោកបានបន្តថា ក្រៅពីនោះដែរ រដ្ឋាភិបាលក៏នឹងជំរុញអោយមានការអភិវឌ្ឍហេដ្ឋារចនាសម្ព័ន្ធបន្ថែមទៀត ដើម្បីឱ្យការដឹកជញ្ជូនទំនិញកសិកម្មពីទីតាំងទៅកន្លែងកែច្នៃ ឬ សម្រាប់នាំចេញជាដើម ។
អគ្គលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍បញ្ជាក់ថា
« ការអភិវឌ្ឍហេដ្ឋារចនាសម្ព័នផ្លូវកាន់តែច្រើននឹងជួយជំរុញវិស័យកសិកម្មកាន់តែខ្លាំង។ ជាក់ស្ដែងនៅពេលដែលមានផ្លូវកាន់តែស្រួល ការដឹកជញ្ជូនកាន់តែលឿនរហ័ស និងចំណាយអស់តិច ដូច្នេះតម្លៃកសិផលអាចនឹងឡើងខ្ពស់ដែលធ្វើអោយការផលិតកាន់តែច្រើន ។ ការគ្រប់គ្រងទឹក ដោយមិនធ្វើអោយប៉ះពាល់ដល់បរិស្ថាន និងធ្វើកសិកម្មតាមបែប បច្ចេកវិទ្យាថ្មី ទទួលបានទិន្នផលខ្ពស់ » ។
បើតាមលោក ចន្ទ ស៊ីណាត អនុរដ្ឋលេខាធិការ នៃក្រសួងធនធានទឹក និងឧត្តុនិយម បានមានប្រសាសន៍ថា រាជរដ្ឋាភិបាលកម្ពុជាបានវិនិយោគលើប្រព័ន្ធធារាសាស្ត្រជាច្រើនលានដុល្លារអាមេរិកមកហើយ ដែលគិតមកដល់ពេលនេះ ប្រព័ន្ធធារាសាស្ត្រនៅកម្ពុជាមានប្រមាណ៣០០០ហើយ ដើម្បីចូលរួមចំណែកដល់ការស្រោចស្រពដំណាំកសិកម្មរបស់ប្រជាពលរដ្ឋ តែចំនួននេះ មិនទាន់អាចនិយាយថាគ្រប់គ្រាន់សម្រាប់វិស័យកសិកម្មកម្ពុជានៅឡើយទេ ពោលគឺត្រូវការវិនិយោគបន្ថែមទៀត ដើម្បីគាំទ្រដល់វិស័យកសិកម្ម ដែលរដ្ឋាភិបាលបានចាត់ទុកថាជាវិស័យសំខាន់មួយ ។
លោក ស៊ុង សារ៉ន អគ្គនាយកក្រុមហ៊ុន Amru Rice ដែលជាវិស័យឯកជនមួយក្នុង
វិស័យកសិកម្មបានឱ្យដឹងផងដែរថា បើក្រឡេកទៅសណ្ឋានដីកម្ពុជា ធៀបនឹងបណ្ដាប្រទេសជាច្រើនទៀតទាំងតំបន់អាស៊ានផងនោះ កម្ពុជាគឺជាប្រទេសកសិកម្មដ៏មានសសក្ដានុពលមួយ ដូច្នេះកម្ពុជាត្រូវត្រៀមខ្លួនក្នុងការផលិតអាហារ សម្រាប់ផ្គត់ផ្គង់ទាំងប្រជាពលរដ្ឋក្នុងប្រទេស និងបម្រើឱ្យការនាំចេញផងដែរ ។ ទន្ទឹមនឹងឱ្យការផលិតទទួលបានជោគជ័យ និងមានផលចំណេញនោះ អ្វីដែលសំខាន់ត្រូវបន្ត គឺការកសាងហេដ្ឋារចនាសម្ព័ន្ធបន្ថែមទៀត ដើម្បីដឹកកសិផលពីស្រែចំការទៅកាន់ទីផ្សារ ។ ក្រៅពីនោះកម្ពុជា ត្រូវគ្រប់គ្រងការបម្រែបម្រួលអាកាសធាតុឱ្យមានប្រសិទ្ធភាព ដើម្បីកុំអោយទិន្នផលកសិកម្មធ្លាក់ចុះមកនៅកម្រិតទាប ។
លោកបានបន្តថា លោកចង់ឱ្យកសិករប្រើប្រាស់ស្មាតហ្វូន និងអ៊ីនធើណេតប្រកប
ដោយប្រសិទ្ធភាព និងមានប្រយោជន៍ ពីព្រោះថាការប្រើប្រាស់អ៊ីនធើណេត និងស្មាតហ្វូនរបស់ពលរដ្ឋកម្ពុជាសព្វថ្ងៃនេះ ហាក់មិនទទួលបានផលប្រយោជន៍អ្វីជាដុំកំភួន ក្រៅតែពីការកំសាន្តនោះទេ ។ លោកបានបន្ថែមថា «កសិករគួរតែប្រើប្រាស់ Apps មួយ ដើម្បីទទួលបានព័ត៌មានស្ដីពីបច្ចេកវិទ្យាកសិកម្ម និងទីផ្សារច្បាស់លាស់ ដើម្បីកុំអោយផលិតខុសគោលដៅ ។ លោកបន្តថា « យើងចង់អោយកសិករកម្ពុជា ក្លាយជាសហគ្រិន ដូចបណ្ដាប្រទេសមួយចំនួនដែលកសិកររបស់គេក្លាយជាសហគ្រិន និងអ្នកដែលមានចំណូលធូរធារ » ៕ កែសម្រួលដោយ ៖សុឃាក់
ចែករំលែកព័តមាននេះ