រាជធានីភ្នំពេញ ៖ មន្ត្រីជាន់ខ្ពស់គណបក្សប្រជាជនកម្ពុជា និងជាអ្នកនាំពាក្យលោកសុខ ឥសាន បានអះអាងថា ថ្ងៃទី៩ មិថុនា ជាថ្ងៃហូបនំបញ្ចុកទូទាំងប្រទេសនោះ ក្រុមអតីតគណបក្សសង្គ្រោះជាតិនាំគ្នាហូបបានតែ១០%ប៉ុណ្ណោះ ផ្ទុយទៅគណបក្សប្រជាជនកម្ពុជាបាន៩០%។
ទោះបីជាមានអ្នកនាំពាក្យគណបក្សកាន់អំណាចបានអះអាងមានសកម្មជនរបស់ខ្លួនបានចូលរួមហូបនំបញ្ចុកច្រើនយ៉ាងណាក្តីលោកសម រង្ស៊ី នៅតែក្រៅប្រទេសឯណោះវិញក៏បាន អះអាងថា ទទួលបានជោគជ័យក្នុងការប្រកាសឲ្យសកម្មជនគាំទ្រខ្លួនហូបនំបញ្ចុកផងដែរ ។ យ៉ាងណាក្តីលោកសុខ ឥសាន បានបញ្ជាក់ថា ឲ្យដឹងនៅថ្ងៃទី១០ មិថុនានេះ យ៉ាងដូច្នេះថា ៖«អតីតបក្សប្រឆាំងថា ហូបនំបញ្ចុកដូចស៊ូណាមី ចំណែកឯគណបក្សប្រជាជនកម្ពុជាដូចមហាស៊ូណាមី ។
អតីតបក្សប្រឆាំងស៊ូណាមីតែ១០% ឯគណបក្សប្រជាជនកម្ពុជាមហាស៊ូណាមី៩០% ឯណោះ » ។ លោកសុខ ឥសាន ក៏បានឲ្យដឹងថា គណបក្សប្រជាជនកម្ពុជាហូបនំបញ្ចុកមួយកន្លែងរាប់តោនដែលបង្ហាញភាពខ្លាំង និងមានឧត្តមភាពលើបក្សដទៃ ហើយនេះ គឺជានយោបាយយកពូថៅវាយកម្ទេចបន្លាផងដែរ ។ លោកបន្ថែមថា ហូបនំបញ្ចុក ដើម្បីរួបរួមគ្នាប្រជាជនកម្ពុជាទាំងមូលលើកលែងតែក្រុមជនក្បត់ជាតិប៉ុណ្ណោះ ។
សូមជម្រាបថា លោកសម រង្ស៊ី បានសរសេរលើបណ្តាញសង្គមនៅថ្ងៃទី៩ ខែមិថុនា ឆ្នាំ២០១៩ហៅការហូបបញ្ចុកនេះជាជ័យជំនះរបស់អតីតគណបក្សសង្គ្រោះជាតិ (CNRP) ដែលបង្ខំឲ្យ សម្ដេចតេជោហ៊ុន សែន នាយករដ្ឋមន្ដ្រីនៃកម្ពុជា និងជាប្រធានគណបក្សសង្គ្រោះជាតិរត់តាមក្នុងការជួបជុំគ្នា ដើម្បីទទួលទាននំបញ្ចុក ។ លោកសម រង្ស៊ីថា «នេះជាជ័យជំនះមួយរបស់អតីតគណបក្សសង្គ្រោះជាតិ ដែលយើងបានបង្ខំឲ្យសម្ដេចតេជោរត់តាមយើងក្នុងការជួបជុំគ្នា ដើម្បីទទួលទាននំបញ្ចុកជាមួយគ្នា ។ មានយុទ្ធសាស្ត្រមួយដែលចែងថា បើយើងមិនអាចយក ឈ្នះលើគេបានទេ យើងត្រូវតែទៅចូលរួមជាមួយគេ ។ ជាមួយគ្នានោះដែរអតីតមេបក្សប្រឆាំងក៏បានអំពាវនាវដល់សកម្មជនខ្លួនបន្តហូបនំបញ្ចុកជារៀងរាល់ថ្ងៃទៀតផងដែរ ។
ចំណែកសម្ដេចតេជោ ហ៊ុន សែន វិញក៏បានសរសេរសារនៅលើបណ្ដាញសង្គមហ្វេសប៊ុក នៅថ្ងៃដដែលថា ពលរដ្ឋខ្មែរទូទាំងប្រទេសបានហូបនំបញ្ចុករួមគ្នាដោយមិនប្រកាន់ក្រុម ប្រកាន់ជំនឿសាសនា ឬប្រកាន់និន្នាការនយោបាយអ្វីឡើយ ។ សម្ដេចបញ្ជាក់ថា «យើងហូបនំបញ្ចុកជាមួយគ្នាថ្ងៃនេះ ដើម្បីខ្មែរយើងកាន់តែរឹងមាំ ដើម្បីយើងរួមគ្នាកសាង និងអភិវឌ្ឍន៍ប្រទេសជាតិឲ្យកាន់តែចម្រើនរុងរឿង ។ យើងហូបនំបញ្ចុកថ្ងៃនេះ គឺបង្ហាញពីការស្រឡាញ់រាប់អានគ្នា និងពង្រឹងសាមគ្គីភាពរវាងគ្នានឹងគ្នាឲ្យកាន់តែល្អប្រសើរឡើងទាំងនៅក្នុងទីក្រុង និងនៅតាមបណ្តាខេត្ត និងតាមតំបន់ជនបទស្រុកស្រែចំការដោយគ្មានការរើសអើងឡើយ»។
គួរបញ្ជាក់ដែរថា បើតាមការសង្កេតនៅថ្ងៃហូបនំបញ្ចុកគេឃើញថា ភាគីគណបក្សប្រជាជនកម្ពុជាបានបើកការហូបនំបញ្ចុកមានទ្រង់ទ្រាយធំ ដូចជា សង់រោងរៀបចំតុសម្រាប់សកម្មជនទទួលទានជុំគ្នា ។ ផ្ទុយពីអតីតសកម្មជនបក្សប្រឆាំងហូបនំបញ្ចុកតាមផ្ទះ ដែលប្រមូលផ្តុំគ្នាតែមនុស្ស១០ ឬ២០នាក់តែប៉ុណ្ណោះ ៕ កែសម្រួលដោយ ៖សុឃាក់
ចែករំលែកព័តមាននេះ