ខេត្តបាត់ដំបង ៖ ដែនជម្រកសត្វស្លាបដ៏ធំ និងទាក់ទាញបំផុតរបស់កម្ពុជាគឺ «ព្រែកទាល់» ជាតំបន់ជីវៈចម្រុះមួយក្នុងចំណោមបីរបស់បឹងទន្លេសាប ដែលទីនេះស្ថិតនៅឃុំកោះជីវាំង ស្រុកឯកភ្នំ ខេត្តបាត់ដំបង ដោយត្រូវធ្វើដំណើរតាមកាណូតលើផ្លូវទឹកចេញពីស្ទឹងសង្កែក្រុង-ខេត្តបាត់ដំបង…
ខេត្តបាត់ដំបង ៖ ដែនជម្រកសត្វស្លាបដ៏ធំ និងទាក់ទាញបំផុតរបស់កម្ពុជាគឺ «ព្រែកទាល់» ជាតំបន់ជីវៈចម្រុះមួយក្នុងចំណោមបីរបស់បឹងទន្លេសាប ដែលទីនេះស្ថិតនៅឃុំកោះជីវាំង ស្រុកឯកភ្នំ ខេត្តបាត់ដំបង ដោយត្រូវធ្វើដំណើរតាមកាណូតលើផ្លូវទឹកចេញពីស្ទឹងសង្កែក្រុង-ខេត្តបាត់ដំបង ត្រូវចំណាយពេលប្រមាណជិត៤ម៉ោងក្នុងចម្ងាយផ្លូវទឹកប្រមាណជាង៥០គីឡូម៉ែត្រ ដោយឆ្លងកាត់តំបន់ប្រវត្តិសាស្ត្រជាច្រើនតាមផ្ទៃទឹក ដូចជា វត្តឈើខ្មៅជាដើម ។
ដោយប្រជាជនមានជំនឿថា តួវិហារវត្តនេះមិនចេះលិចទឹកឡើយ គឺអណ្តែតតាមទឹកឡើង ទោះបីមានទឹកឡើងខ្លាំងលិចតំបន់ផ្សេងៗអស់ក៏ដោយ ហើយក៏ជាព្រំប្រទល់ក្នុងបឹងទន្លេសាបជាមួយខេត្តសៀមរាប និងពោធិសាត់ផងដែរ បើយើងទៅដល់ព្រែកទាល់ ហើយ ចង់ទៅសៀមរាបជាការងាយបំផុត ដោយត្រូវប្រើពេលជិត២ម៉ោង យើងអាចឡើងនៅចំណុចភ្នំក្រោម ក្នុងខេត្តសៀមរាបបាន ។
តាមឯកសាររបស់មន្ទីរទេសចរណ៍ខេត្តបាត់ដំបងបានបញ្ជាក់ថា ជាមួយនឹងជម្រកសត្វស្លាបដ៏ធំ និងគួរឲ្យទាក់ទាញព្រែកទាល់បានក្លាយទៅជាតំបន់មួយ ដែលទទួលបានភ្ងៀវទេសចរជាច្រើនរៀងរាល់ឆ្នាំ ហើយទីនេះជាកន្លែងមួយដែលប្រមូលផ្ដុំនូវសត្វស្លាបដ៏កម្រជាច្រើនប្រភេទមករស់នៅយ៉ាងច្រើនសម្បើម និងបង្កើតជាសម្បុករស់នៅយ៉ាងគួរឲ្យចង់ទស្សនាដែលមានច្រើននៅក្នុងចន្លោះខែធ្នូ ដល់ខែកុម្ភៈ ហើយភ្ញៀវទេសចរនឹងបានឃើញការប្រមូលផ្ដុំដ៏អស្ចារ្យរបស់សត្វបក្សីនានា ដូចដែលអ្នកតែងតែឃើញនៅក្នុងរូបភាពវីឌីអូឯកសារសត្វនោះផងដែរ ។
នៅពេលដែលទឹកនាតំបន់ផ្សេងចាប់ផ្ដើមស្រក សត្វបក្សីមកពីគ្រប់ទិសទីបានមកជួបជុំគ្នានៅទីនេះ ហើយបក្សីទាំងនោះនៅតែបន្តរស់នៅក្នុងតំបន់នេះរហូតដល់ចុងខែកុម្ភៈ ប៉ុន្តែទឹកមិនសូវជាច្រើនដូចពេលមុនប៉ុន្មាននោះទេ ហើយលោកអ្នកក៏អាចឃើញមានសត្វទាំងនេះផងដែរនៅក្នុងអំឡុងខែកញ្ញា ប៉ុន្តែវាមិនសូវមានចំនួនច្រើនប៉ុន្មានដូចខែទឹកស្រកនោះទេ ។
អ្នកជំនាញបានបញ្ជាក់ថា ពេលវេលាដែលល្អបំផុត សម្រាប់ការទស្សនាសត្វនៅទីនេះ គឺពេលព្រឹកព្រលឹម និងពេលរសៀល ដូច្នេះបើអស់លោកអ្នកចង់ទស្សនាទិដ្ឋភាពដ៏អស្ចារ្យរបស់សត្វស្លាបទាំងនេះ អ្នកត្រូវតែចំណាយពេលមួយយប់ ក្នុងការស្នាក់ នៅក្នុងតំបន់ព្រែកទាល់ ដែលលោកអ្នកអាចស្នាក់អាស្រ័យនៅក្នុងការិយាល័យបរិស្ថានព្រែកទាល់បានជាមួយនឹងការរៀបចំការស្នាក់នៅបែបសាមញ្ញ ប៉ុន្តែអាចទទួលយកបានជាមួយតម្លៃចន្លោះ១៥ទៅ២០ដុល្លាតែប៉ុណ្ណោះ ។ សម្រាប់ការចំណាយរបស់អ្នកនៅតំបន់ទេសចរណ៍ព្រែកទាល់ គឺមានន័យថា លោកអ្នកបានចូលរួមចំណែកនៅក្នុងការជួយលើវិស័យអប់រំ និងអភិរក្សស្រឡាញ់ទីនោះសប្បាយជាមួយសត្វបក្សីនៅតំបន់នោះយ៉ាងប្លែកភ្នែកផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ