រាជធានីភ្នំពេញ ៖ ជំនួបជើងទី១ រវាងក្រុមជម្រើសជាតិកម្ពុជា(គោព្រៃកម្ពុជា) និងក្រុមជម្រើសជាតិប៉ាគីស្ថាន កាលពីល្ងាចថ្ងៃទី៦ មិថុនា នៅពហុកីឡដ្ឋានជាតិអូឡាំពិក បានបង្កើតការរីករាយដល់ប្រជាជនកម្ពុជាយ៉ាងខ្លាំង ដោយក្រុមម្ចាស់ផ្ទះបានលត់ក្រុមភ្ញៀវ…
រាជធានីភ្នំពេញ ៖ ជំនួបជើងទី១ រវាងក្រុមជម្រើសជាតិកម្ពុជា(គោព្រៃកម្ពុជា) និងក្រុមជម្រើសជាតិប៉ាគីស្ថាន កាលពីល្ងាចថ្ងៃទី៦ មិថុនា នៅពហុកីឡដ្ឋានជាតិអូឡាំពិក បានបង្កើតការរីករាយដល់ប្រជាជនកម្ពុជាយ៉ាងខ្លាំង ដោយក្រុមម្ចាស់ផ្ទះបានលត់ក្រុមភ្ញៀវ ២-០ សម្រាប់វគ្គជម្រុះដំបូង នៃពានរង្វាន់បាល់ទាត់ពិភពលោក ឆ្នាំ២០២២ នៅប្រទេសកាតា (2022 FIFA World Cup qualification-AFC) ។
ការប្រកួតក្រោមក្រសែភ្នែកអ្នកទស្សនាផ្ទាល់ប្រមាណជាង៣មុឺននាក់ស្ថិតក្រោមតំណក់ភ្លៀងដែលបង្អុរចុះមកច្រើនគួរសមផងនោះ សម្រាប់តង់ទី១ គេឃើញក្រុមទាំងពីរលេងក្នុងលក្ខណៈស្ទាបស្ទង់មិនសូវដាក់សម្ពាធគ្នានោះទេហើយបញ្ចប់ក្នុងលទ្ធផល០-០ ។ ចូលតង់ទី២ ការលេងរបស់ពួកគេក៏មិនសូវសម្រុកគ្នាប៉ុន្មានដែរធ្វើឱ្យបរិយាកាសនៅទីនោះហាក់ស្ងប់ស្ងាត់បន្តិច ។
ទាល់តែនៅ សល់១០នាទីចុងក្រោយទើបគេលឺសូរសំឡេងហ៊ោកញ្ជ្រៀវពីអ្នកគាំទ្រពេញពហុកីឡដ្ឋានជាតិ តែម្ដងបន្ទាប់ពីកីឡាករ សៀង ចន្ធា និងសិស្សច្បង គួច សុកុម្ភៈ រកបានម្នាក់១គ្រាប់ ជួយក្រុមគោព្រៃកម្ពុជា យកឈ្នះក្រុមប៉ាគីស្ថាន ២-០ នៅនាទីទី៨១ និង៨៤។
ជ័យជម្នះនេះ បានធ្វើឲ្យក្រុមជម្រើសជាតិកម្ពុជា ក្រោមការដឹកនាំផ្ទាល់របស់លោក Keisuke Honda បានកក់កៅអីជុំទី២ជាបណ្ដោះអាសន្ន ដ្បិតក្រុមគោព្រៃកម្ពុជាត្រូវធ្វើដំណើរទៅប្រកួតជើងទី២ ក្រៅដីជាមួយក្រុមជម្រើសជាតិប៉ាគីស្ថាន នៅទីក្រុងដូហា ប្រទេសកាតា នាថ្ងៃទី១១ ខែមិថុនា ខាងមុខ ដើម្បីធានាកៅអីឡើងជុំទី២ នៃពានរង្វាន់បាល់ទាត់ពិភពលោក ឆ្នាំ២០២២ (2022 FIFA World Cup qualification-AFC)៕ (កែសម្រួលដោយ ៖ បុប្ផា)
ចែករំលែកព័តមាននេះ