ខេត្តសៀមរាប ៖ នគរបាលក្រុងសៀមរាប សហការជាមួយនគរបាលខេត្តកំពង់ធំ បានតាមប្រមាញ់ឃាត់ ខ្លួនជនសង្ស័យ២នាក់ជាបន្តបន្ទាប់ កាលពីថ្ងៃទី២និងទី៣ ខែមិថុនា នៅខេត្តសៀមរាបនិងខេត្តកំពង់ធំ ពីបទដើរជួលម៉ូតូនៅតាមហាងម៉ូតូមួយចំនួនក្នុងក្រុងសៀមរាប…
ខេត្តសៀមរាប ៖ នគរបាលក្រុងសៀមរាប សហការជាមួយនគរបាលខេត្តកំពង់ធំ បានតាមប្រមាញ់ឃាត់ ខ្លួនជនសង្ស័យ២នាក់ជាបន្តបន្ទាប់ កាលពីថ្ងៃទី២និងទី៣ ខែមិថុនា នៅខេត្តសៀមរាបនិងខេត្តកំពង់ធំ ពីបទដើរជួលម៉ូតូនៅតាមហាងម៉ូតូមួយចំនួនក្នុងក្រុងសៀមរាប ហើយយកទៅលក់នៅភ្នំពេញ គឺជួលស៊ីដាច់ម៉ាត់ ។
ប្រភពពីនគរបាលក្រុងសៀមរាបបានឱ្យដឹងថា កាលពីថ្ងៃទី២៩ និងទី៣១ ខែឧសភា ឆ្នាំ២០១៩ មានជនម្នាក់ឈ្មោះ អៀង គាហេង ភេទប្រុស អាយុ២៣ឆ្នាំ ស្នាក់នៅក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ និងបក្ខពួកម្នាក់ទៀត បានក្លែងធ្វើជាជួលម៉ូតូឱ្យភ្ញៀវជិះកម្សាន្តនៅក្នុងក្រុងសៀមរាប ពីហាងម៉ូតូយីហោ «សៀមរាប ស្គូតធឺរេនថល»ស្ថិតនៅភូមិវិហារចិន សង្កាត់ស្វាយដង្គំ ក្រុងសៀមរាប ។
ក្រុមនេះ ជួលម៉ូតូបានចំនួន៥គ្រឿង មានម៉ាកហ្សូ៊ម័រអុិច ស៊េរីឆ្នាំ២០១៨ចំនួន៣គ្រឿង ពាក់ផ្លាកលេខ សៀមរាប ១AE-៩៧៥២ សៀមរាប ១AC-៩៥០៨ បាត់ដំបង១AF-០០៦៦ ម៉ាកគ្លីក១គ្រឿង ស៊េរីឆ្នាំ២០១៩ ពាក់ផ្លាកលេខ សៀមរាប ១AC -៦១៩៥ និងម៉ាកPCXមួយគ្រឿង ស៊េរីឆ្នាំ២០១៨ ពាក់ផ្លាកលេខ សៀមរាប ១AC-១៥៧៦ ។ ម្ចាស់ហាងម៉ូតូខាងលើនេះ ឈ្មោះ ហុង សុថុល ភេទប្រុស អាយុ៣៣ឆ្នាំ ។
លុះមកដល់ថ្ងៃទី១ខែមិថុនា ឆ្នាំ២០១៩ វេលាម៉ោង១០យប់ ជនសង្ស័យខាងលើបានមករកជួលម៉ូតូបន្ថែមទៀតតែម្ចាស់ហាងឆ្ងល់ក៏សួរថា ចុះម៉ូតូ៥គ្រឿងមុន យកទៅណាទើបមិនឃើញ ? ឯជនសង្ស័យឆ្លើយថា ម៉ូតូដែលជួលជិះនោះនៅផ្ទះសំណាក់ ។ ដោយមានការសង្ស័យ ព្រោះមិនឃើញម៉ូ តូដែលជនសង្ស័យជួលជិះនោះជាច្រើនគ្រឿង ហើយបន្តជួលជិះបន្ថែមទៀត ម្ចាស់ហាងក៏បានប្តឹងសមត្ថកិច្ច និងនាំជនសង្ស័យទៅប៉ុស្តិ៍នគរបាលរដ្ឋបាលសង្កាត់ស្វាយដង្គំ ដើម្បីសាកសួរ និងដាក់ពាក្យបណ្ដឹង ហើយជនសង្ស័យក៏ត្រូវបាន
ឃាត់ខ្លួន ។
ប្រភពព័ត៌មានឲ្យដឹងថា ក្រោយពីទទួលបានចម្លើយពីជនសង្ស័យហើយ នៅថ្ងៃទី២ ខែមិថុនា ឆ្នាំ២០១៩ កម្លាំងនគរបាលប៉ុស្តិ៍សង្កាត់ស្វាយដង្គំ និងនគរបាលផ្នែកព្រហ្មទណ្ឌក្រុងសៀមរាប ដឹកនាំដោយលោកអធិការ ក្រោមកិច្ចសហការរវាងផែនព្រហ្មទណខេត្តសៀមរាប និងផែនព្រហ្មទណ្ឌរាជធានីភ្នំពេញ និងដឹក
នាំនីតិវិធីដោយលោកវរសេនីយ៍ទោ នួន ស័ក្តិចំរើនរិទ្ធ បាននាំម្ចាស់ហាងទៅរាជធានីភ្នំពេញ សហការគ្នាជាមួយនគរបាលខណ្ឌដូនពេញ ធ្វើការស្រាវជ្រាវនិងដកហូតម៉ូតូរបស់ជនរងគ្រោះចំនួន៥គ្រឿងត្រឡប់មកវិញ ។
នៅថ្ងៃទី៣ ខែមិថុនា ឆ្នាំ២០១៩ វេលាម៉ោង១២ថ្ងៃត្រង់ ខណៈនគរបាលនិងម្ចាស់ហាងត្រឡប់មកសៀមរាបវិញ បុគ្គលិកហាងបានទូរស័ព្ទប្រាប់ជនរងគ្រោះថា មានជនម្នាក់ឈ្មោះ អុឺង ឆាយហេង ភេទប្រុស អាយុ២២ឆ្នាំ រស់នៅភូមិ១ សង្កាត់បឹងព្រលឹត ខណ្ឌ៧មករា រាជធានីភ្នំពេញ បានមកជួលម៉ូតូហុងដាគ្លីក ពណ៌ស ស៊េរីឆ្នាំ២០១៩ ពាក់ផ្លាកលេខ សៀមរាប ១AC-៦១៣៥ ដោយប្រាប់ថាជួលជិះក្នុងក្រុងសៀមរាបតែសង្ស័យថាកំពុងជិះគេចខ្លួនទៅភ្នំពេញ ។
នៅពេលទទួលបានព័ត៌មាននេះភ្លាម ម្ចាស់ហាងនិងនគរបាលក្រុងសៀមរាប ក៏បានស្នើតាម រយៈលោកឧត្ដមសេនីយ៍ត្រី ភឹង ចិន្តារ៉េត ស្នងការរងនគរបាលខេត្តទទួលផែនព្រហ្មទណ្ឌ ដើម្បីសុំកិច្ចសហការពីអធិការដ្ឋាននគរបាលក្រុងស្ទឹង សែន និងស្រុកកំពង់ស្វាយ ខេត្តកំពង់ធំ បានស្ទាក់តាមផ្លូវជាតិឃាត់ខ្លួនជនសង្ស័យរួមនឹងម៉ូតូបានមែន រួចនាំយកមកអធិការដ្ឋាននគរបាលក្រុងសៀមរាបដើម្បីសាកសួរ ។
ជនសង្ស័យឈ្មោះ អុឺង ឆាយហេង បានសារភាពថា ខ្លួនពិតជាយកម៉ូតូពីហាងខាងលើបម្រុងយកទៅលក់នៅរាជធានីភ្នំពេញមែន ។ យោងតាមចម្លើយ និងពាក្យបណ្ដឹងរបស់ម្ចាស់ហាងជនសង្ស័យទាំង២នាក់ ត្រូវបានកសាងសំណុំរឿងបញ្ជូនទៅសាលាដំបូងនៅថ្ងៃទី៤ ខែមិថុនា ៕
ចែករំលែកព័តមាននេះ