រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា កម្ពុជា មានសម្បទានខ្លាំងណាស់ ទៅលើបញ្ហាច្រកព្រំដែន…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា កម្ពុជា មានសម្បទានខ្លាំងណាស់ ទៅលើបញ្ហាច្រកព្រំដែន ជាពិសេសការនាំទំនិញចេញចូល តាមច្រកព្រំដែនរវាងប្រទេសទាំងពីរ ដោយសារតែកងទ័ពថៃ ជាអ្នកបិទច្រកដោយឯកតោភាគីដោយខ្លួនឯង ដូច្នេះគ្រាន់តែបើកដោយឯកតោភាគី ដោយខ្លួនឯងឡើងវិញ ដោយស្ថានភាពវិលទៅរកដូចដើម មុនថ្ងៃទី៧មិថុនា គឺចប់រឿង មិនបាច់ចរចាច្រើននោះទេ ខណៈដែលកម្ពុជា រងចាំឆ្លើយតបទៅវិញ ។
ថ្លែងក្នុងពិធីបិទ មហាសន្និបាតវិសាមញ្ញកាយរឹទិ្ធជាតិកម្ពុជា នៅវិទ្យាស្ថានជាតិអប់រំ នារសៀលថ្ងៃទី១៧ ខែមិថុនា ឆ្នាំ២០២៥នេះ សម្តេចធិបតី ហ៊ុន ម៉ាណែត បានរំលឹកថា ភាគីថៃ បានស្នើសុំឱ្យកម្ពុជា លើកយកបញ្ហាច្រកព្រំដែន នៃប្រទេសទាំងពីរ មកដាក់ក្នុងរបៀបវារៈនៃកិច្ចប្រជុំ JBC កាលពីថ្ងៃទី១៤ ខែមិថុនា កន្លងទៅ ដោយសម្តេចបានឆ្លើយតបវិញភ្លាមៗ ថា វាមិនមែនជាកិច្ចការរបស់ JBC ដោយសារតែ JBC ទទួលខុសត្រូវតែរឿងបច្ចេកទេសព្រំដែន ។
សម្តចបវរធិបតី នាយករដ្ឋមន្ត្រី បានគូសបញ្ជាក់ថា វាសាមញ្ញបំផុត ពេលដែលកងទ័ពថៃ បិទព្រំដែនដោយឯកតោភាគី អត់មានប្រាប់កម្ពុជានោះទេ ហេតុដូច្នេះ វាស្រួលណាស់ បើកវិញឯកតោភាគីទៅចប់ហើយ កម្ពុជាចាំតែទទួលទេ ខណៈដែលសម្តេចធិបតី អះអាងថា កម្ពុជាគ្មានបំណងធ្វើឱ្យប៉ះពាល់បងប្អូន ដែលរស់នៅតាមបណ្តោយព្រំដែន និងគ្មានបំណងធ្វើឱ្យប៉ះពាល់ដល់សេដ្ឋកិច្ច សង្គម និងទំនាក់ទំនងនោះទេ ។
ជាមួយគ្នានេះ សម្តេចធិបតីថ្លែងបញ្ជាក់ថា ៖ “កម្ពុជា ក៏មិនចង់រករឿងដែលយើងសម្បទានដល់ប៉ុណ្ណឹង យើងសម្បទានថា រឿងនេះ យើងអត់ចរចារទេ ប៉ុន្តែបើសិនជាថៃ បើកវិញដោយឯកតោភាគី យើងនឹងបើកឡើងវិញដែរ ៥ម៉ោងក្រោយ ដើម្បីឱ្យលំហូរ នៃទំនិញ នៃប្រជាជនបានដូចដើម យើងសម្បទានដល់ប៉ុណ្ណឹង ព្រោះកម្ពុជា មានសិទ្ធិបើកមិនបើក ប៉ុន្តែដើម្បីកុំឱ្យប៉ះពាល់ប្រជាពលរដ្ឋ ប៉ុន្តែបើហៅមកអង្គុយគ្នាចរចាបើកគឺអត់ទេ ថៃបិទមុន បើកមុនទៅចប់ហើយ អានឹងរឿងមានប៉ុណ្ណឹងតើ” ។
ក្នុងនោះ សម្តេចបវរធិបតី ក៏បានបញ្ជាក់ដែលថា សម្តេចបវតធិបតី ក៏បានជជែកតាមទូរសព្ទជាមួយ នាយករដ្ឋមន្ត្រីថៃ នូវកិច្ចចរចាផ្សេងៗ រួមទាំងកិច្ចការទាហាន និងទាហាន ដើម្បីកែសម្រួលកងទ័ពទាំងសងខាង កុំឱ្យប្រឈមមុខដាក់គ្នា ដោយកិច្ចការទាំងនេះ ត្រូវផ្អែកទៅលើទំនុកទុកចិត្តជាបុរេលក្ខ័ខណ្ឌ ។ បុរេលក្ខ័ខណ្ឌ នូវទំនុកចិត្តនេះ គឺត្រូវឱ្យភាគីថៃ ធ្វើមុនកម្ពុជា ដោយបើកច្រកព្រំដែន ឱ្យវិលទៅរកស្ថានភាពដូចដើម មុនថ្ងៃទី៧មិថុនា ដែលថៃ បានធ្វើដោយឯកតោភាគី មកលើកម្ពុជា នោះទើបអាចឈានទៅកិច្ចចរចា រឿងកងទ័ពបន្ថែមបាន ។
សម្តេចធិបតី ហ៊ុន ម៉ាណែត បានគូសបញ្ជាក់បន្ថែមថា កម្ពុជា អត់ស្រលាញ់សង្គ្រាមទេ ត្រូវបង្ហាញនូវសុច្ឆន្ទៈមុនសិន បង្ហាញនូវភាពបុរេសកម្ម បុរេលក្ខ័ខណ្ឌគឺព្រំដែនត្រូវបើកទាំងសងខាង ទៅលក្ខ័ខណ្ឌដូចដើមវិញ ហើយដើម្បីឱ្យព្រំដែននេះ បើកទៅធម្មតាវិញ មិនបាច់ចរចាគ្នាទេ សូមឱ្យកងព័ទថៃបើកទៅ ព្រោះបិទបិទតែខ្លួនឯង បើកតែខ្លួនឯងទៅ កម្ពុជា នឹងឆ្លើយតបទៅវិញ កម្ពុជា សុំតែប៉ុណ្ណឹង ៕
ចែករំលែកព័តមាននេះ