បេកាំង ៖ យោងតាមសេចក្តីរាយការណ៍របស់ភ្នាក់ងារសារព័ត៌មាន Reuters កាលពីថ្ងៃទី២ មិថុនា កន្លងមកបានឲ្យដឹងថា មន្ត្រីថ្នាក់ខ្ពស់មកពីរដ្ឋាភិបាលចិន និងអ្នកចរចាពាណិជ្ជកម្មម្នាក់បាននិយាយថា សហរដ្ឋអាមេរិកមិនអាចប្រើសម្ពាធដើម្បីបង្ខំឲ្យមានការសម្រេចកិច្ចព្រមព្រៀងពាណិជ្ជកម្មមួយទេ ។
គួរបញ្ជាក់ដែរថា ភាពតានតឹងពាណិជ្ជកម្មរវាងសហរដ្ឋអាមេរិកនិងប្រទេសចិនបានកើនឡើងយ៉ាងខ្លាំងកាលពីខែមុនបន្ទាប់ពីរដ្ឋាភិបាលលោកប្រធានាធិបតី ដូណាល់ ត្រាំ បានចោទប្រកាន់ដល់ប្រទេសចិនថាលេបពាក្យសម្តីដែលបានសន្យាថានឹងធ្វើកំណែទម្រង់រចនាសម្ព័ន្ធសកម្មភាពសេដ្ឋកិច្ចរបស់ពួកគេ ។ បន្ទាប់មក រដ្ឋាភិបាលលោកប្រធានាធិបតី ត្រាំ បានដាក់ពន្ធបន្ថែម ២៥%លើផលិតផលចិនប្រមាណ២០០ប៊ីលានដុល្លារដែលបង្កឲ្យប្រទេសចិនចេញវិធានការឆ្លើយតប ។
លោក Wang Shouwen ដែលជាអនុរដ្ឋមន្ត្រីពាណិជ្ជកម្មចិនបាននិយាយក្នុងសន្និសិទមួយថាសហរដ្ឋអាមេរិកពិតជាគ្មានទំនួលខុសត្រូវណាស់ដែលចោទប្រកាន់ថាប្រទេសចិនលេបពាក្យសម្តីដូច្នេះ ។ លោកបាននិយាយថា «ប្រសិនបើភាគីអាមេរិកចង់ប្រើសម្ពាធដើម្បីបង្កើនភាពតានតឹងជម្លោះពាណិជ្ជកម្មដើម្បីបង្ខំឲ្យប្រទេសចិនចុះចាញ់ និងលះបង់នោះ វាមិនអាចទៅរួចទេ»។
លោកបានបន្តថា «ក្នុងកំឡុងពេលចរចា ប្រទេសចិនបានឆ្លងកាត់ទុក្ខលំបាកជាច្រើន និងបានរកឃើញដំណោះស្រាយដែលអាចអនុវត្តបាន ។ ប៉ុន្តែសហរដ្ឋអាមេរិកបានលេបពាក្យសម្តី ហើយពេលដែលអ្នកឲ្យពួកគេបន្តិច ពួកគេចង់បានលើសនោះបន្ថែមទៀត»។ លោកបានបន្ថែមថា សហរដ្ឋអាមេរិកបានទាមទារមិនសមហេតុសមផល និងបានទាមទារទាក់ទិននឹងសិទ្ធិអធិបតេយ្យភាពរបស់ប្រទេសចិនក្នុងកិច្ចព្រមព្រៀងផងដែរ ។
ជាមួយគ្នានេះផងដែរ លោក Wei Fenghe ដែលជារដ្ឋមន្ត្រីការពារជាតិរបស់ប្រទេសចិនបាននិយាយនៅវេទិកាសន្តិសុខក្នុងប្រទេសសិង្ហបុរីកាលពីថ្ងៃអាទិត្យ ដែរថា «ប្រសិនបើសហរដ្ឋអាមេរិកចង់ចរចា ពួកយើងនឹងរក្សាទ្វាបើកទូលាយ ។ ប្រសិនបើពួកគេចង់ប្រយុទ្ធគ្នា ពួកយើងនឹងប្រយុទ្ធដល់ទីបញ្ចប់»។
លោកប្រធានាធិបតី ត្រាំ បាននិយាយថា លោកនឹងជួបជាមួយនឹងលោកប្រធានាធិបតី ស៊ី ជិនពីង របស់ប្រទេសចិននៅកិច្ចប្រជុំ G20 ក្នុងប្រទេសជប៉ុននៅចុងខែនេះ ប៉ុន្តែប្រទេសចិនមិនទាន់បានបញ្ជាក់ពីកិច្ចប្រជុំនេះទេ ៕
កែសម្រួលដោយ ៖ សំណាង
ចែករំលែកព័តមាននេះ