ខេត្តតាកែវ ៖ ជនសង្ស័យចំនួន២នាក់កំពុងប្រើប្រាស់សារធាតុញៀនជាក់ស្តែង ត្រូវបានប៉ូលិសជំនាញស្រុកបាទីសហការជាមួយនឹងកម្លាំងនគរបាលរដ្ឋបាលប៉ុស្តិ៍កណ្តឹងចុះបង្ក្រាបបានរួមជាមួយនឹងវត្ថុតាងយកមកកសាងសំណុំរឿង និងបញ្ជូនបន្តមកកាន់ការិយាល័យប្រឆាំងការជួញដូគ្រឿងញៀនដើម្បីចាត់ការបន្ត។
ហេតុការណ៍នគរបាលចាប់ខ្លួនជនសង្ស័យប្រើប្រាស់គ្រឿងញៀននេះបានកើតឡើងកាលពីវេលាម៉ោង៥និង៥០នាទីល្ងាចថ្ងៃទី១ ខែមិថុនា ឆ្នាំ២០១៩ នៅចំណុចភូមិត្រពាំងលើក ឃុំកណ្តឹង ស្រុកបាទី ខេត្តតាកែវ។
លោកង៉ាន់ សារី អធិការនគរបាលស្រុកបាទីបានប្រាប់ថា ជនសង្ស័យទាំង២នាក់ដែលបានឃាត់ខ្លួនខាងលើ ក្នុងនោះម្នាក់ឈ្មោះ ហ៊ុល តារា ភេទប្រុស អាយុ២១ឆ្នាំ មុខរបរមិនពិតប្រាកដ រស់នៅភូមិត្រពាំងលើក ឃុំកណ្តឹង ស្រុកបាទី និងម្នាក់ទៀតឈ្មោះ ចាន់ រិទ្ធី ភេទប្រុស អាយុ១៧ឆ្នាំ មុខរបរមិនពិតប្រាកដ រស់នៅភូមិកណ្តឹងតូច ឃុំកណ្តឹង ស្រុកបាទី។ ចំណែកវត្ថុតាងដកហូតបានមានថ្នាំញៀន៣កញ្ចប់តូច និងទូរស័ព្ទដៃ២គ្រឿងផងដែរ។
ក្រោយសមត្ថកិច្ចចាប់ឃាត់ខ្លួន ជនសង្ស័យបានឆ្លើយសារភាពថា ពួកខ្លួនពិតជាបានប្រើប្រាស់គ្រឿងញៀនពិតប្រាកដមែន។
មន្ត្រីការិយាល័យប្រឆាំងការជួញដូគ្រឿងញៀនខេត្តបានអោយដឹងថា ជនសង្ស័យទាំង២នាក់ដែលជាប់ពាក់ព័ន្ធនឹងករណីប្រើប្រាស់ថ្នាំញៀនដោយខុសច្បាប់ខាងលើនេះ ត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ