រាជធានីភ្នំពេញ ៖ ជនជាតិវៀតណាម ១៥នាក់ ត្រូវបានកម្លាំងគណៈបញ្ជាការឯកភាពរាជធានីភ្នំពេញ ឃាត់ខ្លួន បន្ទាប់ពីចុះរដ្ឋបាល ត្រួតពិនិត្យ រកឃើញថា ស្នាក់នៅដោយខុសច្បាប់…
រាជធានីភ្នំពេញ ៖ ជនជាតិវៀតណាម ១៥នាក់ ត្រូវបានកម្លាំងគណៈបញ្ជាការឯកភាពរាជធានីភ្នំពេញ ឃាត់ខ្លួន បន្ទាប់ពីចុះរដ្ឋបាល ត្រួតពិនិត្យ រកឃើញថា ស្នាក់នៅដោយខុសច្បាប់ ។
ការចុះរដ្ឋបាលត្រួតពិនិត្យនេះ បានធ្វើឡើងកាលពីវេលាម៉ោង០១រសៀលថ្ងៃទី១១ ខែមីនា ឆ្នាំ២០២៦ នៅចំណុចផ្ទះល្វែង ផ្លូវ១១៤ ភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។
តាមការបញ្ជាក់ពីកម្លាំងជំនាញ បានអោយដឹងថា ដោយបន្តអនុវត្តន៍តាមការណែនាំពីលោក ឃួង ស្រេង អភិបាលរាជធានីភ្នំពេញ, ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាអោយគណៈអភិបាលទាំង ១៤ខណ្ឌ និងអធិការទាំង ១៤ខណ្ឌ រឹតបណ្តឹងការចុះរដ្ឋបាលចំពោះទីតាំងមានជនបរទេសស្នាក់នៅ និងបង្ក្រាបទីតាំង ដែលសង្ស័យបង្កប់ស្កេមអនឡាញ ក៏ដូចជាកន្លែងរក្សាទុក ឬប្រើប្រាស់គ្រឿងញៀន ហើយគណៈជាការឯកភាពខណ្ឌច្បារអំពៅ ក៏បានចុះធ្វើរដ្ឋបាលជាបន្តបន្ទាប់ និងឈានទៅរកឃើញជនជាតិវៀតណាម ដែលស្នាក់នៅប្រមូលផ្ដុំគ្នាដោយខុសច្បាប់។
តាមសមត្ថកិច្ច បានឲ្យដឹងទៀតថា ក្នុងប្រតិបត្តិការនោះ សមត្ថកិច្ចបានត្រួតពិនិត្យនៅចំណុចផ្ទះល្វែង ផ្លូវ១១៤ ភូមិកោះក្របី សង្កាត់ព្រែកថ្មី រកឃើញជនជាតិវៀតណាម ចំនួន ១៥នាក់(ប្រុស) ចូលមកស្នាក់នៅខុសច្បាប់ ដោយគ្មានលិខិតស្នាមត្រឹមត្រូវ ។
តាមការសួរនាំជាបឋម ជនជាតិវៀតណាមទាំងនេះ មកពីព្រំដែនវៀតណាម តាមច្រកបាវិត ហើយទើបចូលមកស្នាក់នៅ ក្នុង មូលដ្ឋានខណ្ឌច្បារអំពៅ ទើបតែបាន២យប់ នោះទេ ។
បច្ចុប្បន្ន ជនសង្ស័យ ត្រូវបានសមត្ថកិច្ចបញ្ជូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តតាមនីតិវិធី ៕
ចែករំលែកព័តមាននេះ