ប្រទេសប៉ាគីស្ថាន ៖ បើតាមប៉ូលិសបានរាយការណ៍កាលពីថ្ងៃទី២៩ ឧសភាថា បុរសម្នាក់បានចាប់ប្រពន្ធព្យួរ.កសម្លាប់ ក្រោយពីការធ្វើតេស្តឈាមប្រពន្ធរូបនោះដឹងថា មានផ្ទុកវីរុសអេដស៍ក្នុងតំបន់មួយនាភាគខាងត្បូងប៉ាគីស្ថាន ដែលនាពេលថ្មីៗនេះ រងការឆ្លងរាលដាលខ្លាំងនៃជំងឺអេដស៍ មកពីសេវាកម្មសុខាភិបាលមិនល្អ។
ជនរងគ្រោះជានារីម្នាក់អាយុ៣២ឆ្នាំ មានកូន៤នាក់ រស់នៅក្នុងភូមិមួយនៃស្រុកSHIKARPUR ត្រូវបានប្ដីខ្ទប់មាត់ហើយចាប់ព្យួរកនៅនឹងដើមឈើមួយដើមមុខផ្ទះ។ បុរសជាប្ដីដែលសង្ស័យភរិយាលួចមានប្រុសក្រៅ ត្រូវបានចាប់ខ្លួន ចំណែកអ្នករួមដៃដែលជួយចាប់ព្យួរកកំពុងរត់គេចខ្លួន។ ស្រុកSHIKARPURស្ថិតនៅជិតតំបន់RATODERO ដែលនៅទីនោះមនុស្ស៦៨១នាក់ ក្នុងនោះមានកុមារ៥៣៧នាក់មានអាយុពី២ទៅ១២ឆ្នាំ ត្រូវបានធ្វើតេស្តឈាម រកឃើញមានផ្ទុកវីរុសអេដស៍។ នេះបើតាមតួលេខផ្លូវការចេញផ្សាយកាលពីថ្ងៃទី២៦ឧសភា។
ខេត្តSINDHដែលមានស្រុកSHIKARPURនិងRATODERO ចាប់តាំងពីយូរមកហើយជាខេត្តក្រីក្របំផុត ហើយប្រជាជនមានការយល់ដឹងនិងទទួលការអប់រំតិច ជាតួទៅទទួលបានការផ្សព្វផ្សាយតិចតួច ពីការចម្លងវីរុសអេដស៍។ ការប្រើសេរ៉ាំងចាក់ថ្នាំរួមគ្នាឬសេរ៉ាំងចាស់អាចជាមូលហេតុសំខាន់មួយនៃការឆ្លងជំងឺនោះ។
នេះជាការលើកឡើងរបស់លោកZAFAR MIRZA ទីប្រឹក្សាខាងសុខាភិបាលរបស់នាយករដ្ឋមន្ត្រីប៉ាគីស្ថាន លោកអីុមរ៉ានខាន់។ លោកបន្តថាមនុស្សជាង២១.០០០នាក់ បានធ្វើតេស្តឈាមក្នុងតំបន់នោះ៕ (កែសម្រួលដោយ ៖ បុប្ផា)
ចែករំលែកព័តមាននេះ