រាជធានីភ្នំពេញ ៖ ជាមួយនឹងមកដល់យ៉ាងគំហុកនៃវិនិយោគិនជនជាតិចិនក្នុងការវិនិយោគលើវិស័យនានាក្នុងប្រទេសកម្ពុជា ជាក់ស្តែងគេក៏កត់សម្គាល់ឃើញថាខេត្តព្រះសីហនុ ទទួលបាននូវការវិនិយោគខ្លាំងក្លាជាងបណ្តាខេត្តនានាលើវិស័យសំណង់ សណ្ឋាគារ និងអចលទ្រព្យ ដែលបានធ្វើឲ្យតម្លៃដីធ្លីហក់ឡើងខ្ពស់ រហូតមានអ្នកមូលដ្ឋានត្អូញត្អែរថាការបំពុលបរិស្ថានក៏ជាបញ្ហាចម្បងផងដែរ ។
ជាក់ស្តែងសម្រាប់រយៈពេល ៥ ខែ ដើមឆ្នាំ២០១៩ នេះគឺមានទុនវិនិយោគប្រមាណ ជាង ៥៨២លានដុល្លារអាមេរិក បានហូរចូលខេត្តព្រះសីហនុ ជាមួយនឹងគំរោងវិនិយោគសរុប ១៨៦។ នេះបើតាមការឲ្យដឹងរបស់ប្រធានមន្ទីររៀបចំដែនដី សំណង់ និងសូរីយោដីខេត្តព្រះសីហនុ លោក ចេង ស្រុង នៅថ្ងៃទី២៨ ខែឧសភា ម្សិលមិញនេះ ។ ប្រភពដដែលបានអះអាងថា ឆ្នាំ ២០១៩ នេះ ក្នុងចំណោមគម្រោងវិនិយោគទាំងនោះ រួមមាន គំរោងអនុម័តដោយសមត្ថកិច្ចថ្នាក់ជាតិចំនួន៥៩គម្រោង គំរោងអនុម័តដោយសមត្ថកិច្ចថ្នាក់ក្រោមជាតិចំនួន២២គម្រោង និងគម្រោងអនុម័តដោយសមត្ថកិច្ចក្រុង ស្រុកចំនួនទូទាំងខេត្តព្រះសីហនុមានចំនួន១០៥គំរោង នាំឲ្យការអភិវឌ្ឍន៏ហក់ឡើងខ្ពស់ ។ លោក បានបន្តថា សំណង់ស្ទើរតែទាំងអស់នៅក្នុងខេត្តព្រះសីហនុ ជាប្រភេទសណ្ឋាគារ ផ្ទះសំណាក់ខុនដូ និង ផ្ទះល្វែងជាដើម ព្រមទាំងសំណង់ដែលខ្ពស់បំផុតនៅក្នុងខេត្តមួយនេះគឺមានចំនួន៤៣ជាន់ ដែលកំពុងសាងសង់ ហើយគិតមកទល់បច្ចុប្បន្ន គម្រោងនេះបានបញ្ចប់ប្រមាណជាង១៤ជាន់ហើយ។
យ៉ាងណាមិញ លោក បន្ថែមថា ជាមួយគ្នានឹងការកើនឡើងនៃសំណង់នេះដែរ ក៏ធ្វើឲ្យមានការប៉ះពាល់សណ្ដាប់ធ្នាប់សាធារណៈ និងបរិស្ថានផងដែរ រួមជាមួយនឹងការខ្វះមន្ត្រីជំនាញក្នុងការចុះត្រួតពិនិត្យនៅតាមការដ្ឋាសំណង់នានា ។ លោកបន្តថា ដោយមានតការណែនាំរបស់អភិបាលខេត្ត សមត្ថកិច្ច មន្ត្រីជំនាញ និងអាជ្ញាធរខេត្ដ បានបន្តចុះរៀបចំសណ្តាប់ធ្លាប់ នៅតាមការរដ្ឋានសំណង់ និង ការសាងសង់ខ្វះលក្ខណៈបច្ចេកទេស ដូចជា ការដ្ឋានគ្មានរបងបិទបាំង យកចិញ្ជើមផ្លូវដាក់សម្ភារៈសំណង់ជាដើម។
ចំណែក លោកយន្ត មីន អភិបាលខេត្តព្រះសីហនុ ធ្លាប់បានឲ្យដឹងកន្លងមកថា វឌ្ឍនភាពរបស់ខេត្ដ នៃការកើនឡើងសំណង់ និងអ្នកវិនិយោគនេះ គឺដោយសារកត្ដាធំៗពីរ ទី១)- កត្ដាសន្ដិភាព បានផ្ដល់នូវសុវត្ថិភាពក្នុងការកងសាង និងប្រកបរបររកស៊ីដោយសេរី និងទី២)- កត្ដាច្បាប់ដែលផ្តល់ការពារប្រជាពលរដ្ឋ អ្នកវិនិយោគប្រកបដោយស្ថេរភាពល្អ សម្រាប់បរិស្ថានវិនិយោគនៅក្នុងខេត្ដព្រះសីហនុ ក៏ដូចជាទូទាំងប្រទេសកម្ពុជា។ កំណើនសំណង់នេះ ក៏បានបង្ហាញនូវផលវិជ្ជមានច្រើន គឺប្រយោជន៍ដល់ប្រជាពលរដ្ឋ និងសេដ្ឋកិច្ចរបស់ខេត្ដ ក្នុងនោះជីឌីភីរបស់ប្រជាពលរដ្ឋខេត្ដព្រះសីហនុ មានកំណើនជាលំដាប់ដែរ ជាក់ស្ដែងពលរដ្ឋម្នាក់ពីជាង១០០០ដុល្លារ រហូតដល់ជាង២០០០ដុល្លារក្នុង១ឆ្នាំ។
ក្នុងឆ្នាំ ២០១៨ ខេត្តព្រះសីហនុ បានទទួលគម្រោងវិនិយោគលើវិស័យសំណង់មានចំនួន៣៣៦គម្រោង និងទុនវិនិយោគជាង១ពាន់លានដុល្លារអាមេរិក ដោយក្នុងនោះគម្រោង ដែលអនុម័តដោយសមត្ថកិច្ចថ្នាក់ជាតិមានចំនួន៦២ គម្រោងថ្នាក់ក្រោមជាតិមានចំនួន៥៣ និងថ្នាក់ក្រុង-ស្រុកចំនួន ១៦៦ គម្រោង៕កែសម្រួលដោយ ៖ សុឃាក់
ចែករំលែកព័តមាននេះ