ខេត្តព្រះសីហនុ ៖ សពបុរសអណ្តែតទឹកម្នាក់ត្រូវបានគេប្រទះឃើញនៅចំណុចប្រឡាយទឹកជាប់ផ្លូវលំចូលទៅចំការមួយកន្លែង ស្ថិតក្នុងភូមិបឹងរាំង ឃុំសាមគ្គី ស្រុកព្រៃនប់ ខេត្តព្រះសីហនុ កាលពីវេលាម៉ោង៩យប់ថ្ងៃទី២៧ ឧសភា ឆ្នាំ២០១៩ ។
លោកវរសេនីយ៍ទោ ហួ យ៉ៃ អធិការនគរបាលស្រុកបានអោយដឹងថា ជនរងគ្រោះដែលស្លាប់ឈ្មោះ ជា ហាប់ ភេទប្រុស អាយុ៦០ឆ្នាំ មានទីលំនៅចំណុច ភូមិ ឃុំកើតហេតុខាងលើ ។
លោកអធិការនគរបាលស្រុកបានបន្តថា តាមការរៀបរាប់ពីកូនបង្កើតរបស់ជនរងគ្រោះឈ្មោះ ហាប់ ធុច បានបញ្ជាក់ប្រាប់ថា ឪពុករបស់គាត់តែងតែស្រវឹង និងបាត់ពីផ្ទះ២ទៅ៣ថ្ងៃជាញឹកញាប់ ហើយកាលពីថ្ងៃ២៥ ឧសភា ឆ្នាំ២០១៩ ឪពុករបស់គាត់បានបាត់ពីផ្ទះទៀត ប៉ុន្តែក្រុមគ្រួសារមិនបានដើររកនោះទេ លុះរហូតដល់ថ្ងៃកើតហេតុ ទើបប្រទះឃើញសពឪពុកស្លាប់អណ្តែតទឹកប្រឡាយបង្កការភ្ញាក់ផ្អើលតែម្តង។
ឆ្លងតាមការពិនិត្យសពជនរងគ្រោះ ត្រូវបានសមត្ថកិច្ចឱ្យដឹងថាមិនមែនជាករណីឃាតកម្មឡើយ អាចបណ្តាលមកពីជនរងគ្រោះស្រវឹងស្រា ហើយដើរធ្លាក់ទឹកប្រឡាយរួចក៏ឈ្លក់ទឹកស្លាប់តែម្តង បច្ចុប្បន្នសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ