អន្តរជាតិ ៖ ប្រទេសហ្វីលីពីន និងបារាំង បានចុះហត្ថលេខាលើកិច្ចព្រមព្រៀងយោធាដ៏សំខាន់មួយ ដែលនឹងអនុញ្ញាតឱ្យប្រទេសទាំងពីរធ្វើការហ្វឹកហ្វឺនយោធារួមគ្នានៅក្នុងទឹកដីប្រទេសទាំងពីរទៅវិញទៅមក ខណៈទីក្រុងម៉ានីលកំពុងពង្រីកទំនាក់ទំនងការពារជាតិ ចំពេលមានភាពតានតឹងកើនឡើងជាមួយទីក្រុងប៉េកាំង នៅក្នុងសមុទ្រចិនខាងត្បូង។ នេះបើតាមប្រភពពី…
អន្តរជាតិ ៖ ប្រទេសហ្វីលីពីន និងបារាំង បានចុះហត្ថលេខាលើកិច្ចព្រមព្រៀងយោធាដ៏សំខាន់មួយ ដែលនឹងអនុញ្ញាតឱ្យប្រទេសទាំងពីរធ្វើការហ្វឹកហ្វឺនយោធារួមគ្នានៅក្នុងទឹកដីប្រទេសទាំងពីរទៅវិញទៅមក ខណៈទីក្រុងម៉ានីលកំពុងពង្រីកទំនាក់ទំនងការពារជាតិ ចំពេលមានភាពតានតឹងកើនឡើងជាមួយទីក្រុងប៉េកាំង នៅក្នុងសមុទ្រចិនខាងត្បូង។ នេះបើតាមប្រភពពី Reuters ចេញផ្សាយនៅថ្ងៃទី២៧ ខែមីនា ឆ្នាំ២០២៦។
រដ្ឋមន្ត្រីក្រសួងការពារជាតិហ្វីលីពីន លោក Gilberto Teodoro និងរដ្ឋមន្ត្រីក្រសួងកងកម្លាំងប្រដាប់អាវុធបារាំង លោកស្រី Catherine Vautrin បានចុះហត្ថលេខាលើកិច្ចព្រមព្រៀងនេះ នៅថ្ងៃទី២៦ ខែមីនា ឆ្នាំ២០២៦ អំឡុងពេលកិច្ចប្រជុំមួយនៅទីក្រុងប៉ារីស ជាកន្លែងដែលមន្ត្រីជាន់ខ្ពស់ទាំងពីរពិភាក្សាគ្នាអំពីបញ្ហាប្រឈមសន្តិសុខក្នុងតំបន់ និងបានបញ្ជាក់ជាថ្មីនូវការគាំទ្រចំពោះសណ្តាប់ធ្នាប់អន្តរជាតិផ្អែកលើមូលដ្ឋានច្បាប់។
ក្រសួងការពារជាតិហ្វីលីពីនបានបញ្ជាក់នៅក្នុងសេចក្តីថ្លែងការណ៍ថា កិច្ចព្រមព្រៀងនេះ នឹងជំរុញកិច្ចសហប្រតិបត្តិការទ្វេភាគីយ៉ាងខ្លាំង ក៏ដូចជាផ្តល់នូវកម្រិតនៃការការពារផ្នែកច្បាប់គ្រប់គ្រាន់ដល់សកម្មភាពរួមគ្នារវាងកងកម្លាំងប្រដាប់អាវុធហ្វីលីពីន និងកងកម្លាំងប្រដាប់អាវុធបារាំង។
ការចុះហត្ថលេខាលើកិច្ចព្រមព្រៀងយោធាដ៏សំខាន់កាលពីពេលថ្មីៗនេះ កើតឡើង១ថ្ងៃ បន្ទាប់ពីយោធាហ្វីលីពីនបានអះអាងថា នាវាចម្បាំងមីស៊ីលចិន១គ្រឿងបានធ្វើសមយុទ្ធគ្មានសុវត្ថិភាព និងគ្មានវិជ្ជាជីវៈ ប្រឆាំងនឹងនាវាកងទ័ពជើងទឹកហ្វីលីពីនដែលកំពុងតែធ្វើប្រតិបត្តិការសមុទ្រនៅជិតកោះ Thitu ដែលជាប៉ុស្តិ៍ដ៏សំខាន់មួយរបស់ហ្វីលីពីននៅក្នុងសមុទ្រដែលកំពុងមានជម្លោះ។
គួរបញ្ជាក់ថា ក្រៅពីប្រទេសបារាំង ប្រទេសហ្វីលីពីនក៏មានកិច្ចព្រមព្រៀងយោធាជាមួយនឹងសហរដ្ឋអាមេរិក អូស្ត្រាលី ជប៉ុន និងនូវែលសេឡង់ផងដែរ៕
ចែករំលែកព័តមាននេះ