ទីក្រុងកំប៉ាឡា ៖ មេបញ្ជាការកងទ័ពរបស់ប្រទេសអ៊ូហ្កង់ដាបានសរសេរសារដ៏ភ្ញាក់ផ្អើលមួយកាលពីថ្ងៃទី២៥ ខែមីនា ឆ្នាំ២០២៦ ថា ខណៈពេលដែលប្រទេសអ៊ូហ្កង់ដាចង់ឱ្យសង្គ្រាមនៅមជ្ឈិមបូព៌ាបញ្ចប់នោះ ខ្លួននឹងឈរនៅខាងអ៊ីស្រាអែល ប្រសិនបើប្រទេសនេះប្រឈមមុខនឹងការបរាជ័យ។ នេះបើយោងតាមប្រភពពីកាសែត…
ទីក្រុងកំប៉ាឡា ៖ មេបញ្ជាការកងទ័ពរបស់ប្រទេសអ៊ូហ្កង់ដាបានសរសេរសារដ៏ភ្ញាក់ផ្អើលមួយកាលពីថ្ងៃទី២៥ ខែមីនា ឆ្នាំ២០២៦ ថា ខណៈពេលដែលប្រទេសអ៊ូហ្កង់ដាចង់ឱ្យសង្គ្រាមនៅមជ្ឈិមបូព៌ាបញ្ចប់នោះ ខ្លួននឹងឈរនៅខាងអ៊ីស្រាអែល ប្រសិនបើប្រទេសនេះប្រឈមមុខនឹងការបរាជ័យ។ នេះបើយោងតាមប្រភពពីកាសែត New York Post របស់សហរដ្ឋអាមេរិក និងទីភ្នាក់ងារសារព័ត៌មាន Anadolu របស់តួកគីយ៉េ ចេញផ្សាយកាលពីថ្ងៃទី២៦ ខែមីនា ឆ្នាំ២០២៦។
ឧត្តមសេនីយ៍ Muhoozi Kainerugaba ប្រធានកងកម្លាំងការពារប្រជាជនអ៊ូហ្កង់ដា និងជាកូនប្រុសរបស់លោកប្រធានាធិបតី Yoweri Museveni បានសរសេរសារមួយនៅលើបណ្តាញសង្គម X ថា «យើងចង់ឱ្យសង្គ្រាមនៅមជ្ឈិមបូព៌ាបញ្ចប់ឥឡូវនេះ។ ពិភពលោកធុញទ្រាន់នឹងវាហើយ។ ប៉ុន្តែការនិយាយណាមួយអំពីការបំផ្លាញ ឬកម្ចាត់អ៊ីស្រាអែល នឹងនាំយើងចូលទៅក្នុងសង្គ្រាម ដោយឈរនៅខាងអ៊ីស្រាអែល!»។ សារដ៏ភ្ញាក់ផ្អើលនេះ បានផ្ទុះពេញប្រព័ន្ធអ៊ីនធឺណិត ដោយមានអ្នកចូលមើលជាង ២ លានដងលើបណ្តាញសង្គម X ត្រឹមព្រឹកថ្ងៃទី២៧ ខែមីនា ឆ្នាំ២០២៦។
បើទោះបីជាមិនបញ្ចេញឈ្មោះប្រទេសសត្រូវរបស់អ៊ីស្រាអែល ប៉ុន្តែការកត់សម្គាល់របស់លោក Kainerugaba បានកើតឡើងចំពេលមានភាពតានតឹងនៅមជ្ឈិមបូព៌ាកាន់តែខ្លាំងឡើង បន្ទាប់ពីការវាយប្រហារថ្មីៗរបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ និងការវាយប្រហារសងសឹកជាបន្តបន្ទាប់។ ដ្បិតភ្លើងសង្គ្រាមបានឆេះខ្លាំងឡើង ចាប់តាំងពីចុងខែកុម្ភៈមកម្ល៉េះ ដោយមានរបាយការណ៍អំពីអ្នកស្លាប់ និងរបួសដ៏ច្រើន និងផ្លាស់ប្តូរការវាយប្រហារគ្នាទៅវិញទៅមកដោយដ្រូន និងមីស៊ីលគ្រប់ធុនរវាងអ៊ីស្រាអែល និងអ៊ីរ៉ង់ ក៏ដូចជាផលប៉ះពាល់នៅទូទាំងប្រទេសជិតខាងផងដែរ។
នៅក្នុងសារដាច់ដោយឡែកមួយ លោក Kainerugaba ក៏បានអះអាងថា «អ៊ីស្រាអែលបានឈរជាមួយយើងនៅពេលយើងគ្មាននរណាស្គាល់នៅក្នុងទសវត្សរ៍ឆ្នាំ ១៩៨០ និង ១៩៩០។ ហេតុអ្វីបានជាយើងមិនការពារពួកគេ ខណៈដែលឥឡូវនេះផលិតផលក្នុងស្រុកសរុប (GDP) របស់យើងមានចំនួន ១០០ ពាន់លានដុល្លារ? ជាប្រទេសមួយក្នុងចំណោមប្រទេសធំជាងគេនៅទ្វីបអាហ្វ្រិក»។
លោក Kainerugaba ក៏បានទាក់ទាញការចាប់អារម្មណ៍ផងដែរនៅក្នុងរយៈពេលប៉ុន្មានសប្តាហ៍ថ្មីៗនេះ ចំពោះការប្រកាសផែនការសង់រូបសំណាកមួយ ដើម្បីជាកិត្តិយសដល់លោក Yonatan Netanyahu ដែលជាបងប្រុសរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ដែលត្រូវបានសម្លាប់ ខណៈពេលលោកកំពុងដឹកនាំកងកុម្ម៉ង់ដូអ៊ីស្រាអែល អំឡុងពេលជួយសង្គ្រោះចំណាប់ខ្មាំងជាង១០០នាក់ នៅទីក្រុង Entebbe ប្រទេសអ៊ូហ្កង់ដា ឆ្នាំ១៩៧៦ ៕
ចែករំលែកព័តមាននេះ