ទីក្រុងកង់បេរ៉ា ៖ ប្រទេសអូស្ត្រាលីបានហាមឃាត់អ្នកទេសចរអ៊ីរ៉ង់មិនឱ្យចូលទឹកដីខ្លួនជាបណ្តោះអាសន្ន ដោយបានអះអាងថា សង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់បានបង្កើនក្តីបារម្ភដែលអ្នកកាន់លិខិតឆ្លងដែនប្រទេសនេះមិនត្រឡប់ទៅវិញ នៅពេលទិដ្ឋាការរយៈពេលខ្លីពួកគេផុតកំណត់។ នេះបើយោងតាមប្រភពពី AFP បានចេញផ្សាយ។…
ទីក្រុងកង់បេរ៉ា ៖ ប្រទេសអូស្ត្រាលីបានហាមឃាត់អ្នកទេសចរអ៊ីរ៉ង់មិនឱ្យចូលទឹកដីខ្លួនជាបណ្តោះអាសន្ន ដោយបានអះអាងថា សង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់បានបង្កើនក្តីបារម្ភដែលអ្នកកាន់លិខិតឆ្លងដែនប្រទេសនេះមិនត្រឡប់ទៅវិញ នៅពេលទិដ្ឋាការរយៈពេលខ្លីពួកគេផុតកំណត់។ នេះបើយោងតាមប្រភពពី AFP បានចេញផ្សាយ។
ក្រសួងមហាផ្ទៃអូស្ត្រាលី កាលពីថ្ងៃទី២៥ ខែមីនា ឆ្នាំ២០២៦ បានឱ្យដឹងថា ការរឹតបន្តឹងលើអ្នកទេសចរអ៊ីរ៉ង់នឹងមានរយៈពេល៦ខែ ដោយហៅការរឹតបន្តឹងនេះថាផលប្រយោជន៍ជាតិ អំឡុងពេលស្ថានភាពពិភពលោកដែលកំពុងផ្លាស់ប្តូរយ៉ាងឆាប់រហ័ស។ សង្គ្រាមនៅអ៊ីរ៉ង់បានបង្កើនហានិភ័យដែលអ្នកកាន់ទិដ្ឋាការបណ្ដោះអាសន្នមួយចំនួនប្រហែលជាអាចមិនអាច ឬទំនងជាមិនចាកចេញពីប្រទេសអូស្ត្រាលី នៅពេលទិដ្ឋាការរបស់ពួកគេផុតកំណត់។ ក្រសួងបានបន្ថែមថា ករណីលើកលែងមួយចំនួននឹងត្រូវបានធ្វើឡើងតាមករណីជាក់ស្តែងផ្សេងៗ ដូចជា ឪពុកម្តាយមានកូនសញ្ជាតិអូស្ត្រាលីជាដើម។
លោក Tony Burke រដ្ឋមន្ត្រីក្រសួងមហាផ្ទៃអូស្ត្រាលីបានថ្លែងថា ទិដ្ឋាការទេសចរណ៍ជាច្រើនត្រូវបានផ្តល់ឱ្យមុនពេលកើតមានជម្លោះ ប៉ុន្តែនឹងគ្មានការផ្តល់ឱ្យជាបណ្តោះអាសន្នសម្រាប់អ្នកដាក់ពាក្យសុំនៅពេលនេះ។ លោកបានបន្តថា ការសម្រេចចិត្តលើអ្នកដែលអាចស្នាក់នៅជាអចិន្ត្រៃយ៍ គួរតែត្រូវបានផ្តល់ដោយរដ្ឋាភិបាល មិនគួរជាផលវិបាកដោយចៃដន្យនៅពេលក្រោយរបស់អ្នកស្នើចង់មកវិស្សមកាលនៅទីនេះនោះទេ។
យោងតាមតួលេខរបស់រដ្ឋាភិបាលបានបង្ហាញថា ប្រជាជនអូស្ត្រាលីជាង ៨៥ ០០០នាក់បានកើតនៅក្នុងប្រទេសអ៊ីរ៉ង់ ហើយអូស្ត្រាលីក៏មានសហគមន៍ជនភៀសខ្លួនក្នុងទីក្រុងធំៗដូចជា ស៊ីដនី (Sydney) និងមែលប៊ន (Melbourne) ផងដែរ។
គួររំលឹកថា អូស្ត្រាលីទើបតែធ្វើឱ្យអ៊ីរ៉ង់ខឹងសម្បារប៉ុន្មានថ្ងៃមុននេះ ដោយបានផ្តល់សិទ្ធិជ្រកកោនដល់កីឡាការិនី និងមន្ត្រី ៧ នាក់ពីក្រុមបាល់ទាត់ជម្រើសជាតិនារីអ៊ីរ៉ង បន្ទាប់ពីកីឡាការិនីទាំងនោះត្រូវបានចោទជនក្បត់ជាតិនៅអ៊ីរ៉ង់ បន្ទាប់ពីមិនព្រមច្រៀងចម្រៀងជាតិ មុនការប្រកួតពានរង្វាន់ Asian Cup ដែលអូស្ត្រាលីជាម្ចាស់ផ្ទះនោះ ដើម្បីបង្ហាញសកម្មភាពប្រឆាំងនឹងសាធារណរដ្ឋអ៊ីស្លាមអ៊ីរ៉ង់។ ប៉ុន្តែទោះយ៉ាងណា នៅក្នុងចំណោមអ្នកទាំង ៧ នាក់នោះ ៥ នាក់សម្រេចចិត្តបោះបង់សិទ្ធិជ្រកកោនវិញ ដែលជំរុញឱ្យមានការសង្ស័យថា ក្រុមគ្រួសារពួកគេនៅអ៊ីរ៉ង់ប្រហែលជាស្ថិតក្រោមការគំរាមកំហែង៕
ចែករំលែកព័តមាននេះ