ស្ត្រីភាគច្រើនធ្លាប់ជួបប្រទះរោគសញ្ញមានដូចជា ហើមពោះ អស់កម្លាំង ឈឺចាប់ចុករមួលក្នុងពោះ ឈឺក្បាល ការរំលាយអាហារមានបញ្ហា និងអារម្មណ៍មិនសូវល្អនៅមុនពេលនិងអំឡុងពេលវដ្តរដូវ ។ វិធីមួយក្នុងចំណោមវិធីដ៏ល្អបំផុតដើម្បីការពារនិងព្យាបាលរោគសញ្ញា ទាំងនេះគឺតាមរយៈរបបអាហារទទួលទានដែលផ្តល់អត្ថប្រយោជន៍ដល់សុខភាពជាទូទៅ ។ ចូរសាកល្បងទទួលទានអាហារខាងក្រោមនេះ ៖
១-ពពួកសណ្តែក ៖
យោងតាមវេជ្ជបណ្ឌិត Susan Lark នាយកមជ្ឈមណ្ឌលជួយខ្លួនឯង PMS នៅទីក្រុង Los Alto រដ្ឋកាលីហ្វ័រនីញ៉ា សហរដ្ឋអាមេរិកបានឱ្យដឹងថា វត្តមានសារធាតុសរសៃដ៏ច្រើនលើសលុបក្នុងពពួកសណ្តែក មានប្រសិទ្ធភាពកាត់បន្ថយអាការៈឈឺចុកចាប់ក្នុងពោះតាមរយៈការធ្វើឱ្យដុំលាមកកាន់តែធំជាងមុន ហើយសម្បូរដោយជាតិទឹកច្រើន ។ បែបនេះនឹងជួយបំបាត់សារធាតុរាវពីរាងកាយ និងព្រមទាំងជួយឱ្យការរំលាយអាហារត្រឡប់មកភាពប្រក្រតីវិញ កាត់បន្ថយបានទាំងការទល់លាមកនិងទាំងការរាករូស ។ លោកបានបន្តថា៖ «ពពួកបន្លែក៏ជាប្រភពយ៉ាងសម្បូរបែបនៃវីតាមីនB ដែលមានប្រសិទ្ធភាពការពារការឈឺចុករមួល និងការអស់កម្លាំងក្នុងពេលមករដូវ ។ បើទោះបីជាពពួកសណ្តែកអាចបង្កើតជាឧស្ម័នច្រើនក្តី ប៉ុន្តែគេអាចចៀសវាងហេតុការណ៍នេះបានដោយត្រូវទទួលទានក្នុងចំនួនតិច ហើយបន្ទាប់មកអាចបង្កើនចំនួនបន្តិចម្តងៗ ។
២-ពពួកបន្លែពណ៌បៃតង ៖
ពពួកបន្លែពណ៌បៃតងសម្បូរទៅដោយកាល់ស្យូម ម៉ាញេស្យូម និងប៉ូតាស្យូម ។ សារធាតុរ៉ែទាំងអស់នេះត្រូវគេជឿថាមានប្រសិទ្ធភាពជួយបំបាត់និងទប់ស្កាត់ការរមួលសាច់ដុំដែលនាំឱ្យមានការឈឺចាប់ ។ វេជ្ជបណ្ឌិត Susan Larkបានថ្លែងថា រ៉ែកាល់ស្យូម ម៉ាញេស្យូម និងប៉ូតាស្យូមអាចជួយឱ្យអារម្មណ៍ស្ងប់ស្ងាត់ កាត់បន្ថយបានការឆាប់ខឹង ។ ឯពពួកបន្លែពណ៌បៃតងចាស់ក៏មានអត្ថប្រយោជន៍ផងដែរដោយវាអាចជួយឱ្យឈាមឆាប់កក ទប់ស្កាត់បានការហូរឈាមច្រើនហួសហេតុ ។ ប្រសិទ្ធភាពបែបនេះ ក៏ព្រោះបន្លែពណ៌បៃតងចាស់ផ្ទុកទៅដោយវីតាមីន Kក្នុងកម្រិតមួយខ្ពស់ ។
៣- អាស៊ីដខ្លាញ់អូមេហ្គា-3 ៖
ក្រុមនៃសារធាតុសណ្ឋានដូចជាអ័រម៉ូនក្នុងរាងកាយដែលមានឈ្មោះថា prostaglandins ត្រូវគេដឹងថាជាដើមហេតុនាំឱ្យមានការកន្ត្រាក់សាច់ដុំឈឺចាប់ពេលមករដូវ ។ ដូច្នេះមធ្យោបាយមួយដើម្បីបិទប្រសិទ្ធភាព prostaglandinគឺដោយការប្រើប្រាស់អាស៊ីតខ្លាញ់អូមេហ្គា-3ដែលមានច្រើនក្នុងពពួកត្រីសម្បូរខ្លាញ់ និងបណ្តាសណ្តែកដែលមានជាតិប្រេង ។ ការសិក្សាមួយកាលឆ្នាំ១៩៩៥ ដែលចុះផ្សាយក្នុងព្រឹត្តិប័ត្រ European Journal of Clinical បានរកឃើញថា ស្ត្រីដែលរបបអាហារទទួលទានរបស់ខ្លួនសម្បូរដោយខ្លាញ់អូមេហ្គា-៣ ហាក់គ្មានអាការៈឈឺចាប់ខ្លាំងពេលមករដូវ ។
៤- ម្នាស់ ៖
របាយការណ៍មួយរបស់វេជ្ជបណ្ឌិត Phyllis Johnson មកពីមជ្ឈមណ្ឌលអាហារូបត្ថម្ភមនុស្សនៃក្រសួងកសិកម្ម រដ្ឋដាកូតាខាងជើង សហរដ្ឋអាមេរិកបានបង្ហាញថា ស្រ្តីវ័យក្មេងដែលប្រើប្រាស់រ៉ែម៉ង់ហ្គាណែសក្នុងបរិមាណទាបបង្កើនការលំហូរវដ្តរដូវរហូតដល់ទៅ៥០ភាគរយ ។ ចំណុចនេះបាននាំឱ្យវេជ្ជបណ្ឌិត Johnson ស្នើឡើងថា បណ្តាស្ត្រីដែលធ្វើទុក្ខខ្លាំងក្នុងពេលមករដូវគួរបង្កើនការប្រើប្រាស់រ៉ែម៉ង់កាណែសឱ្យបានច្រើន ។ ម្នាស់ជាផ្លែឈើមួយប្រភេទដែលសម្បូរដោយរ៉ែមង់កាណែស ។ បន្ថែមពីលើនេះទៀត ម្នាស់ក៏មានផ្ទុក bromelain (ជាអង់ស៊ីមដែលអាចជួយបន្ធូរសាច់ដុំ ការពារការឈឺចុករមួលក្នុងពោះ) កម្រិតខ្ពស់ផងដែរ ។
៥-ទឹកតែ ៖
តែគឺជាប្រភពមួយទៀតនៃរ៉ែម៉ង់ហ្គាណែស។ នេះបើយោងតាមវេជ្ជបណ្ឌិត Johnson ។ ពិសេសជាងនេះទៅទៀត តែខ្ញីមានប្រសិទ្ធភាពខ្ពស់បន្ថយអាការៈចង្អោរ និងហើមពោះ ។
៦- ទឹកពិសាអនាម័យ ៖
ការទប់មិនឱ្យហូរចេញនូវសារធាតុរាវច្រើនលើសលុបគឺជាមូលហេតុចម្បងនៃការរំលាយអាហារដែលបង្ហាញតាមរយៈការឈឺចាប់ចុករមួលខ្មាញ់ ។ មធ្យោបាយល្អបំផុតមួយដើម្បីជួយកាត់បន្ថយអាការៈបែបនេះគឺត្រូវបង្កើនការផឹកទឹកឱ្យបានច្រើន ។ ប្រសិនជាស្ត្រីម្នាក់ផឹកទឹកមិនបានគ្រប់គ្រាន់នោះ រាងកាយរបស់នាងអាចប្រឈមនឹងបញ្ហា ។ ចំណែកអាហារ២ប្រភេទផ្សេងទៀតមានគ្រាប់ធញ្ញជាតិទាំងមូល និងទឹកដោះគោយ៉ាអួ ៕
ចែករំលែកព័តមាននេះ