សហរដ្ឋអាមេរិក ៖ ចៅក្រមសហព័ន្ធអាមេរិកមួយរូប កាលពីថ្ងៃទី២៤ឧសភាបានចេញបញ្ជាដល់រដ្ឋាភិបាល ឲ្យផ្អាកបណ្ដោះអាសន្នការដកប្រាក់១ពាន់លានដុល្លារ នៃថវិកាមន្ទីរប៉ង់តាហ្គោន យកមកកសាងជញ្ជាំងព្រំដែនតាមបណ្ដោយព្រំដែនជាមួយម៉ិកស៊ិក តាមបំណងរបស់ប្រធានាធិបតីលោកដូណាល់ត្រាំ។
ចៅក្រមនៃស្រុកNORTERN DISTRICTរដ្ឋកាលីហ្វ័រនីញ៉ា បានលើកហេតុផលនៃការសម្រេចនោះថា មកពីការដកប្រាក់នេះពុំត្រូវបានអនុម័តដោយសភា។ ចៅក្រមរូបនោះលោកHAYWOOD GILLIAM JRក្នុងបទបញ្ជារបស់លោកសរសេរថា ជំហរដែលថារដ្ឋាភិបាលអាច ពេលសភាបដិសេធសំណើផ្ដល់មូលនិធិ ដកយកប្រាក់ទៅប្រើប្រាស់ដោយពុំឆ្លងកាត់សភា ជាការមិនគោរពបណ្ដាគោលការណ៍នៃការបែងចែកអំណាចគ្នា ដែលមានចាប់តាំងពីបណ្ដាថ្ងៃដំបូងនៃការបង្កើតសាធារណរដ្ឋរបស់យើងមកម៉្លេះ។
ដោយអស់សង្ឃឹមមកពីការបដិសេធរបស់សភា មិនផ្ដល់ប្រាក់ចាំបាច់ សម្រាប់ការកសាងជញ្ជាំងព្រំដែន ដូចការសន្យាក្នុងពេលឃោសនាបោះឆ្នោតឆ្នាំ២០១៦ លោកដូណាល់ត្រាំបានប្រកាសពីភាពអាសន្នជាតិ ដើម្បីអាចដកប្រាក់ប្រមាណជា៦,៧ពាន់លានដុល្លារ ដែលអនុម័តរួចហើយសម្រាប់គោលដៅឯទៀតៗ។ ទឹកប្រាក់១ពាន់លានដុល្លារត្រូវបានសភាអនុម័តសម្រាប់បណ្ដាសកម្មភាពរបស់មន្ទីរប៉ង់តាហ្គោន នៅរដ្ឋអារីហ្សូណានិងតិចសាស់។
ការតតាំងគ្នាខាងតុលាការនឹងបន្តទៀតនាថ្ងៃទី៣០ឧសភានៅក្រុងវ៉ាសិុនតោន ពេលតុលាការសហព័ន្ធមួយនៃDISTRICT OF COLUMBIAពិនិត្យការប្រើសភា ប្រឆាំងការដកប្រាក់៦,១ពាន់លានដុល្លារនៃថវិការបស់មន្ទីរប៉ង់តាហ្គោន ដោយបណ្ដាមេធាវីរបស់សភាលើកហេតុផលពីការរំលោភបំពាន លើការបែងចែកអំណាចគ្នា៕ (កែសម្រួលដោយ ៖ បុប្ផា)
ចែករំលែកព័តមាននេះ