ខេត្តកណ្តាល ៖ សេចក្តីរាយការណ៍បឋមបានឲ្យដឹងថា អំពើហិង្សាមួយបានកើតឡើង បង្កដោយបុរសម្នាក់បានយកដំបងវាយស្ត្រីអ៊ីស្លាមរងរបួសធ្ងន់ ត្រូវបាននគរបាលក្រុងតាខ្មៅចាប់វាយខ្នោះ ដែលហេតុការណ៍នេះបានកើតឡើងនៅថ្ងៃទី២១ ខែឧសភា ឆ្នាំ២០១៩ វេលាម៉ោង១៨ និង០០នាទី នៅចំណុចក្នុងការដ្ឋានសំណង់បុរីគ្រីស្តាល់ ក្រុមទី៣៦ ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល ។
សេចក្តីរាយការណ៍បានបន្តថា ជនរងគ្រោះមានឈ្មោះ ស្មាន់ ម៉ារី អាយុ៤៨ឆ្នាំ ជនជាតិខ្មែរអ៊ីស្លាម មុខរបរកម្មករសំណង់ ស្នាក់នៅក្នុងការដ្ឋាន សំណង់បុរី គ្រីស្តាល់ ភូមិសង្កាត់កើតហេតុ ។ ជនសង្ស័យឈ្មោះនុត វង្ស ភេទប្រុស អាយុ៣៨ឆ្នាំ មុខរបរកម្មករសំណង់ ស្នាក់នៅក្នុងការដ្ឋានបូរីគ្រីស្តាល់ ភូមិសង្កាត់កើតហេតុ (ឃាត់ខ្លួន) ។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានអោយដឹងថា នៅវេលា និងទីកន្លែងកើតហេតុដូចខាងលើជនរងគ្រោះបានឈ្លោះប្រកែកជេរបញ្ចោរគ្នាជាមួយស្ត្រីម្នាក់ទៀត ពេលនោះជនសង្ស័យក៏ដើរទៅមើល ហើយនិយាយថា ចាម និងខ្មែរឈ្លោះគ្នាប៉ុណ្ណឹងហើយមិនព្រមវ៉ៃគ្នាទៀត ធ្វើឲ្យជនរងគ្រោះខឹងក៏បានជេរបញ្ចោរជនសង្ស័យ ពេលនោះជនសង្ស័យ ខឹងបានទាញដំបងវាយជនរងគ្រោះ៣ដំបងចំដៃខាងស្តាំ និងភ្នែកខាងស្តាំ បណ្តាលឲ្យមានរបួសស្នាម ហើយជនសង្ស័យរត់គេចខ្លួនបាត់ទៅ ។ លុះមកដល់ថ្ងៃទី២៤ ខែឆ្នាំដដែល ទើបប៉ុស្តិ៍រដ្ឋបាលតាខ្មៅបានធ្វើការឃាត់ខ្លួន ដើម្បីកសាងសំណុំរឿងចាត់ការតាមនីតិវិធី ៕កែសម្រួលដោយ៖ សុឃាក់
ចែករំលែកព័តមាននេះ