តើ​ពង្រាង​ប្លង់​មេ​កំពុង​សិក្សា​ដោយ​អ្នកជំនាញ​ចិន​នឹង​អភិវឌ្ឍន៍​ខេត្ត​ព្រះ​សីហ​នុ​ឲ្យ​ក្លាយជា​ទីក្រុង​ស៊ិ​ន​ជិន​ទី​២​ឬ?


រាជធានី​ភ្នំពេញ ៖ អ្នកជំនាញ​មក​ពី​វិទ្យាស្ថាន​ផ្នែក​គំរូ​ប្លង់ និង​នគរ​រូប​នី​យ​កម្ម នៃ​ទីក្រុង ស៊ិ​ន​ជិន​(Shenzhen) ប្រទេស​ចិន​ថ្មី​ៗ​បាន​ចូលរួម​លើ​ការ​សិក្សា​ពង្រាង​ប្លង់​មេ​សម្រាប់​អភិវឌ្ឍន៍​ខេត្ត​ព្រះ​សីហ​នុ ដែល​ខេត្ត​មាត់សមុទ្រ​មួយ​នេះ ត្រូវ​បាន​រាជរដ្ឋាភិបាល​ចាត់​ចូល​ជា​តំបន់​សេដ្ឋកិច្ច​ពិសេស​ពហុ​បំណង​។ នេះ​បើ​តាម​ការ​ចេញផ្សាយ​របស់​ក្រសួង​ឧស្សាហកម្ម និង​សិប្បកម្ម​ចេញ​កាលពី​ព្រឹក​ថ្ងៃ​ទី ២៣ ខែឧសភា កន្លង​ទៅ​នេះ ។

ក្នុង​ជំនួប​ពិភាក្សា​ការងារ​រវាង លោក ចម ប្រសិទ្ធ ទេស​រដ្ឋមន្ត្រី រដ្ឋមន្ត្រីក្រសួង​ឧស្សាហកម្ម និង​សិប្បកម្ម ជាមួយ​ប្រតិភូ​វិទ្យាស្ថាន​គំរូ​ប្លង់ និង​នគរ​រូប​នី​យ​កម្ម នៃ​ទីក្រុង Shenzhen ប្រទេស​ចិន ដឹកនាំ​ដោយ​លោក ស៊ា​វ ស៊ី​ម៉ា (Xiao Sima ) កាលពី​ថ្ងៃ​ទី ២១ ខែ ឧសភា ឆ្នាំ ២០១៩ ដៃគូ​សន្ទនា​បាន​ផ្តោត​ការ​យកចិត្តទុកដាក់​សំខាន់​ទៅ​លើ​ការងារ​ពង្រាង​ប្លង់​មេ ដែល​ធ្វើ​ឡើង​ដោយ​អ្នកជំនាញ​មក​ពី​វិទ្យាស្ថាន​ផ្នែក​គំរូ​ប្លង់ និង​នគរ​រូប​នី​យ​កម្ម នៃ​ទីក្រុង Shenzhen សម្រាប់​អភិវឌ្ឍន៍​ខេត្ត​ព្រះ​សីហ​នុ ។

លោក​ទេស​រដ្ឋមន្ត្រី ចម ប្រសិទ្ធ​បាន​ថ្លែងប្រាប់​អ្នកជំនាញ​ការ​របស់​ចិន​ថា «​គំរូ​ប្លង់​មេ​ដែល​ធ្វើ​ឡើង​ដោយ​អ្នកជំនាញ​ផ្នែក​នគរ​រូប​នី​យ​កម្ម នៃ​ទីក្រុង Shenzhen នឹង​មាន​លក្ខណៈ​ល្អ​ប្រសើរ​សម្រាប់​អភិវឌ្ឍន៍​នៅ​ខេត្ត​ព្រះ​សីហ​នុ ឲ្យ​មាន​លក្ខណៈ​ស៊ី​វិ​ល័យ ការពារ​បាន​នូវ​កំរិត​បរិស្ថាន​ខ្ពស់ និង​ជាទី​តាំង​ដ៏​ទាក់ទាញ​សម្រាប់​ការ​វិនិយោគ និង​តំបន់ឧស្សាហកម្ម ក្នុង​បរិបទ​នៃ​បដិវត្តន៍​ឧស្សាហកម្ម​ជំនាន់​ទី​៤​យើង​នេះ » ។ លោក​បាន​បញ្ជាក់​បន្ថែម​ទៀត​ថា នៅ​ពេល​ដែល​ពង្រាង​ប្លង់​មេនេះ លេច​ចេញ​ជា​រូបរាង​ហើយ យើង​នឹង​យក​មក​ដាក់​ការ​ពិភាក្សា​ក្នុង​កិច្ចប្រជុំ​អន្តរក្រសួង មុន​នឹង​ដាក់​ឆ្លង​ទៅ​គណៈរដ្ឋមន្ត្រី​សម្រេច​។

យ៉ាងណាមិញ លោក ស៊ា​វ ស៊ី​ម៉ា បាន​បញ្ជាក់​ថា​ក្រុមការងារ​បច្ចេកទេស​នៃ​វិទ្យាស្ថាន​របស់​លោក បាន​មក​សិក្សា​លើក​ទី​១ កាលពី​ខែ មីនា កន្លង​ទៅ ដោយ​បានឃើញ​នូវ​ភាព​រីក​ចម្រើន និង​សក្តានុពល​របស់​កម្ពុជា គួរ​ជាទី​ចាប់អារម្មណ៍​សម្រាប់​ការ​វិនិយោគ និង​បង្កើត​សួន​ឧស្សាហកម្ម​។ លោក ស៊ា​វ ស៊ី​ម៉ា បាន​បន្ថែម​ថា «​វិទ្យា ស្ថាន​របស់​លោក នឹង​យក​បទ​ពិសោធ​ជោគជ័យ និង​ដំណោះស្រាយ​ឈ្នះ​ៗ ដែល​ធ្លាប់​បាន​អភិវឌ្ឍន៍​នៅ​ទីក្រុង Shenzhen មក​អភិវឌ្ឍន៍​នៅ​កម្ពុជា ដោយ​ធ្វើ​យ៉ាងណា​ឲ្យ​ស្រប​និង​គោលនយោបាយ​អភិវឌ្ឍន៍​វិស័យ​ឧស្សាហកម្ម​កម្ពុជា​ពី​ឆ្នាំ ២០១៥ ដល់​ឆ្នាំ​២០២៥» ។

ប៉ុន្មាន​ឆ្នាំ​ចុង​ក្រោយ​នេះ​ខេត្ត​ព្រះ​សីហ​នុ បាន​ប្រែប្រួល​មុខមាត់​យ៉ាង​ខ្លាំង ដោយសារ​តែ​ការ​សម្រុក​វិនិយោគ​លើ​វិស័យ​សំណង់​អាគារ កាស៊ីណូ និង​ក្លឹ​ប​កំសាន្ត​នានា ពី​សំណាក់​វិ​និ យោគិន​ចិន ៕ កែសម្រួលដោយ ៖ សុឃាក់

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ