ខេត្តព្រះសីហនុ ៖ តាមសេចក្តីរាយការណ៍បឋមបានឱ្យដឹងថា គ្រោះថ្នាក់ចរាចរណ៍រវាងរថយន្តកុងតឺន័រ២គ្រឿងបុកគ្នា បណ្តាលឱ្យភាគីខាងបុរសម្នាក់ជាអ្នកបើកបររថយន្តកុងតឺន័ររងរបួសធ្ងន់ ត្រូវបានគេបញ្ជូនទៅសង្គ្រោះនៅមន្ទីរពេទ្យឯក្រុងភ្នំពេញ ។
ហេតុការណ៍ខាងលើបានកើតឡើងកាលពីវេលាម៉ោងជាង៤រសៀលថ្ងៃទី២៣ ឧសភា ២០១៩ ស្ថិតក្នុងភូមិវាលធំ ឃុំវាលរេញ ស្រុកព្រៃនប់ ។
ភាគីខាងបុរសម្នាក់ជាអ្នកបើកបររថយន្តកុងតឺន័រមួយគ្រឿងដែលរងរបួសធ្ងន់ឈ្មោះ ង៉ែត សុខឃីម អាយុ៣៦ឆ្នាំ មានទីលំនៅក្នុងភូមិអូស្រុកបសែក ខេត្តកំពង់ស្ពី ។
ចំណែកភាគីខាងរថយន្តកុងតឺន័រមួយគ្រឿងទៀត ដែលបើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ។
តាមប្រភពព័ត៌មានពីប្រពន្ធរបស់ជនរងគ្រោះបានប្រាប់ឱ្យដឹងថា មុនពេលកើតហេតុ ប្តីរបស់គាត់បើកបររថយន្តកុងតឺន័រពីខេត្តព្រះសីហនុទៅភ្នំពេញ លុះមកដល់ចំណុចកើតហេតុខាងលើ ប្តីរបស់បានឈប់រថយន្តបំរុងដើរឆ្លងផ្លូវទៅមកទិញបង្គារ ក៍ត្រូវភាគីខាងរថយន្តកុងតឺន័រមួយគ្រឿងទៀតមកបុកពេញទំហឹងតែម្តង ។
ក្រោយពេលកើតហេតុ រថយន្តកុងតឺន័របង្កត្រូវបានសមត្ថកិច្ចឃាត់ទុក រីឯអ្នកបើកបររត់គេចខ្លួនបាត់ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ