ប្រទេសអង់គ្លេស ៖ ប្រទេសអង់គ្លេសកាលពីថ្ងៃ២២ឧសភា ទទួលរកការគាបសង្កត់ដ៏ខ្លាំងមួយ ក្នុងមហាសន្និបាតអ.ស.បដែលប្រទេសភាគច្រើន ទាមទារឲ្យខ្លួនប្រគល់ក្នុងរយៈពេល៦ខែទៀត នូវប្រជុំកោះCHAGOS ដែលមានមូលដ្ឋានយោធាយុទ្ធសាស្ត្រ អង់គ្លេស-អាមេរិកទៅឲ្យប្រទេសម៉ូរីសវិញ។ តាមការផ្ដួចផ្ដើមគំនិតរបស់ម៉ូរីស…
ប្រទេសអង់គ្លេស ៖ ប្រទេសអង់គ្លេសកាលពីថ្ងៃ២២ឧសភា ទទួលរកការគាបសង្កត់ដ៏ខ្លាំងមួយ ក្នុងមហាសន្និបាតអ.ស.បដែលប្រទេសភាគច្រើន ទាមទារឲ្យខ្លួនប្រគល់ក្នុងរយៈពេល៦ខែទៀត នូវប្រជុំកោះCHAGOS ដែលមានមូលដ្ឋានយោធាយុទ្ធសាស្ត្រ អង់គ្លេស-អាមេរិកទៅឲ្យប្រទេសម៉ូរីសវិញ។
តាមការផ្ដួចផ្ដើមគំនិតរបស់ម៉ូរីស ដំណោះស្រាយមួយក្នុងន័យនេះ ដែលពុំមានការចាប់បង្ខំតែមានទម្ងន់នយោបាយខ្លាំង ត្រូវបានអនុម័តដោយប្រទេស១១៦ ក្នុងចំណោមប្រទេសជាសមាជិកអ.ស.ប ហើយមានប្រទេសតែ៦ប៉ុណ្ណោះដែលប្រឆាំង ក្នុងនោះមានអង់គ្លេស សហរដ្ឋអាមេរិក អូស្ត្រាលីនិងហុងគ្រី។
ចំណែករដ្ឋ៥៦ទៀតបោះឆ្នោតអនុប្បវាទ។ បណ្ដាប្រទេសអាហ្វ្រិកបានបោះឆ្នោតគគ្រឹកគគ្រេងគាំទ្រដំណោះស្រាយនោះ តែបណ្ដាប្រទេសនៅអឺរ៉ុបមានជំហរខ្វែងគ្នា ដែលខ្លះគាំទ្រដល់ប្រទេសនៃសហភាពអឺរ៉ុបមួយ និងការគោរពច្បាប់អន្តរជាតិ។ បារាំង អាល្លឺម៉ង់ អុីតាលី បែលហ្ស៊ិក ឬប៉ូឡូញបានបោះឆ្នោតអនុប្បវាទ។ អេស្ប៉ាញ ក្រិក និងអូទ្រីសបានបោះឆ្នោតគាំទ្រដំណោះស្រាយនេះ។
ប្រជុំកោះCHAGOSមានជម្លោះចាប់តាំងពី៥ទសវត្សមកហើយ គឺចាប់តាំងពីការសម្រេច កាលពីឆ្នាំ១៩៦៥របស់អង់គ្លេស បំបែកប្រជុំកោះនោះចេញពីម៉ូរីស ហើយបង្កើតមូលដ្ឋានយោធារួមមួយជាមួយសហរដ្ឋអាមេរិក នៅលើកោះសំខាន់DIEGO GARCIA។
ម៉ូរីសទទួលបានឯករាជ្យកាលពីឆ្នាំ១៩៦៨។ ប្រទេសអង់គ្លេសបានចាប់បណ្ដេញប្រជាជននៃប្រជុំកោះCHAGOSប្រមាណជា២០០០នាក់ ទៅកាន់ម៉ូរីសនិងប្រទេសសីសែ្ហលដើម្បីបង្កើតមូលដ្ឋានយោធារួមនោះ។ ចាប់តាំងពីឆ្នាំំ១៩៧៥មក ម៉ូរីសបានបង្កើននីតិវិធីខាងផ្លូវច្បាប់ដើម្បីឲ្យមានការប្រគល់ប្រជុំកោះនោះមកឲ្យខ្លួនវិញ។ នាយករដ្ឋមន្ត្រីម៉ូរីសលោកPRAVIND JUGNAUTH លើកឡើងថា លទ្ធិអាណានិគមនិយមមិនអាចអនុគ្រោះឲ្យបានទៀតទេ។
លោកសម្ដែងការសោកស្ដាយដែលអង់គ្លេសពុំគោរពយោបល់របស់តុលាការយុត្តិធម៌អន្តរជាតិ។ តុលាការនោះថ្លែងកាលពីដំណាច់ខែកុម្ភៈថា ក្រុងឡុងដ៏ក្នុងពេលដ៏ឆាប់ ត្រូវបញ្ចប់ការគ្រប់គ្រងរបស់ខ្លួនលើប្រជុំកោះCHAGOS។ តែយោបល់នោះនៅតែពុំមានការធ្វើតាម ទើបម៉ូរីសបានសម្រេចនាំយកសំណុំរឿងនោះ ទៅដាក់ជូនមហាសន្និបាតអ.ស.ប ទោះបីការសម្រេចរបស់មហាសន្និបាតនោះ ពុំមែនជាកម្លាំងច្បាប់អន្តរជាតិមួយ ដូចការសម្រេចរបស់ក្រុមប្រឹក្សាសន្តិសុខអ.ស.បក៏ដោយ។
ឯកអគ្គរាជទូតអង់គ្លេសប្រចាំអ.ស.បលោកស្រីKAREN PIERCEថ្លែងថា នោះជាសំណុំរឿងទ្វេភាគី ហើយលោកស្រីទទូចលើតួនាទីសំខាន់បំផុតនៃមូលដ្ឋានយោធា សម្រាប់ការពារសន្តិសុខក្នុងតំបន់ ក្នុងនោះមានទាំងប្រទេសម៉ូរីសផងដែរ។ តាមយោបល់របស់ខ្លួនបណ្ដាចៅក្រមនៃតុលាការយុត្តិធម៌អន្តរជាតិ ធ្លាប់បានវាយតម្លៃថាអង់គ្លេសបានបំបែកដោយខុសច្បាប់ប្រជុំកោះនោះចេញពីម៉ូរីស៕ (កែសម្រួលដោយ ៖ បុប្ផា)
ចែករំលែកព័តមាននេះ