ទីក្រុងសេអ៊ូល៖ ប្រទេសចិនថ្លែងថាលោកត្រាំ និងលោកស៊ីជីនពីងដែលត្រៀមចូលរួមកិច្ចប្រជុំកំពូលអេប៉ិចចាប់ពីថ្ងៃទី៣១ ខែតុលា ដល់ថ្ងៃទី១ ខែវិច្ឆិកានឹងឆ្លៀតជួបគ្នាទ្វេភាគីដើម្បីដោះស្រាយបញ្ហាជាច្រើន។ មន្ត្រីរដ្ឋាភិបាលចិនអះអាងថាលោកទាំង២នឹងពិភាក្សាគ្នាស៊ីជម្រៅនៅក្នុងបញ្ហាធំៗ។ នេះជាការជួបមុខគ្នាផ្ទាល់ជាលើកដំបូងចាប់តាំងពីលោកត្រាំឡើងកាន់អំណាចនៅអាណត្តិទី២។
ក្រសួងការបរទេសចិនថ្លែងថាគម្រោងជួបគ្នានេះនឹងរៀបចំឡើងនៅទីក្រុងពូសាន (Busan) ដែលស្ថិតនៅមិនឆ្ងាយពីកន្លែងរៀបចំកិច្ចប្រជុំកំពូលអេប៉ិចនៅទីក្រុងគ្យុងជូ (Gyeongju) នោះប៉ុន្មានទេ។ អ្នកនាំពាក្យចិន លោកគួជាឃុន (Guo Jiakun) ថ្លែងថាថ្នាក់ដឹកនាំទាំង២នឹងនិយាយគ្នាលម្អិតអំពីបញ្ហាសំខាន់ជាយុទ្ធសាស្ត្រ និងរយៈពេលវែងនៅក្នុងទំនាក់ទំនងចិន-អាមេរិក។ ក្រៅពីនេះក៏មានការនិយាយអំពីបញ្ហាកង្វល់រួមគ្នាផងដែរ។
អ្នកនាំពាក្យចិនថ្លែងបន្តទៀតថារដ្ឋាភិបាលរបស់ខ្លួនត្រៀមខ្លួនធ្វើការជាមួយភាគីអាមេរិកដើម្បីធានាថាគម្រោងជួបគ្នាលើកនេះនឹងទទួលបានលទ្ធផលជាវិជ្ជមាន ព្រមទាំងផ្ដល់គោលការណ៍ណែនាំថ្មី និងចាក់បញ្ចូលនូវធាតុសំខាន់ៗធ្វើឱ្យទំនាក់ទំនងអាមេរិក-ចិនមានស្ថិរភាព។ លោកត្រាំថ្លែងកាលពីមុននេះថាមានបញ្ហាជាច្រើនដែលត្រូវដោះស្រាយជាមួយលោកស៊ីជីនពីងដើម្បីបន្ធូរបន្ថយសង្គ្រាមពាណិជ្ជកម្មដែលធ្វើឱ្យខាតបង់ផលប្រយោជន៍អស់ជាច្រើន។
លោកត្រាំធ្វើដំណើរទៅដល់កូរ៉េខាងត្បូងកាលពីថ្ងៃពុធ។ លោកមានសុទិដ្ឋិនិយមថាអាចនឹងមានកិច្ចព្រមព្រៀងស្ដីពីបញ្ហាពន្ធគយនៅពេលលោកជួបប្រធានាធិបតីកូរ៉េខាងត្បូង លោកលីជេម្យុង នៅទីក្រុងគ្យុងជូ។ មុនពេលជួបគ្នានោះតែប៉ុន្មានម៉ោងប៉ុណ្ណោះ កូរ៉េខាងជើងបានបាញ់សាកល្បងមីស៊ីលដែលប្រទេសនេះអះអាងថាអាចបំពាក់ក្បាលគ្រាប់នុយក្លេអ៊ែរ។
ប៉ុន្តែលោកត្រាំហាក់ដូចជាមិនចង់យកបញ្ហានេះធ្វើជារឿងធំនោះទេ។ លោកថានេះជារឿងធម្មតា កូរ៉េខាងជើងបាញ់មីស៊ីលរាប់ទសវត្សមកហើយ។ អ្វីដែលសំខាន់គឺគម្រោងជួបគ្នាជាមួយថ្នាក់ដឹកនាំចិន ហើយបើអាចធ្វើទៅបាន លោកក៏ចង់ជួបលោកគីមជុងអ៊ុនផងដែរ។ នេះបើយោងតាមការផ្សាយរបស់ឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ