ទីក្រុងម៉ូស្គូ៖ ថ្មីៗនេះ លោកពូទីនអះអាងថាយោធារុស្ស៊ីទើបតែធ្វើតេស្តដោយជោគជ័យនូវគ្រាប់មីស៊ីលដែលបាញ់នៅក្នុងទឹក និងដំណើរការដោយថាមពលនុយក្លេអ៊ែរ។ អ្នកវិភាគយោធាចាត់ទុកថាមីស៊ីលប៉ូសេដុន (Poseidon) អាចវាយប្រហារតំបន់មាត់សមុទ្រ និងបង្កមហន្តរាយយ៉ាងធំធេង។ គេកត់សម្គាល់ថាការបាញ់សាកល្បងមីស៊ីលជាញឹកញាប់របស់លោកពូទីនកើតឡើងបន្ទាប់ពីលោកត្រាំចាប់ផ្ដើមប្រើធម៌ក្ដៅដោយដាក់ទណ្ឌកម្មក្រុមហ៊ុនរុស្ស៊ី និងប្រើវោហារសាស្ត្រក្ដៅដាក់លោកពូទីន។
លោកពូទីនចាប់ផ្ដើមបង្ហាញសាច់ដុំផ្នែកយោធា និងអាវុធយុទ្ធភ័ណ្ឌរបស់រុស្ស៊ី។ កាលពីមុននេះ លោកទើបតែធ្វើតេស្តសាកល្បងគ្រាប់មីស៊ីលបណ្ដែត (ឬគ្រូសមីស៊ីល – cruise missile) ឈ្មោះបុរេវេស្នីក (Burevestnik) កាលពីថ្ងៃទី២១ ខែតុលា។ ក្រោយមក លោករៀបចំការធ្វើសមយុទ្ធយោធាប្រើអាវុធនុយក្លេអ៊ែរថែមទៀត។ គេមិនសូវដឹងលម្អិតអំពីគ្រាប់មីស៊ីលប៉ូសេដុន (Poseidon) ទេ។ គេគ្រាន់តែដឹងថាវាជាមីស៊ីលបំពាក់នុយក្លេអ៊ែរ។
នៅពេលចុះសំណេះសំណាល និងទទួលទានទឹកតែជាមួយយុទ្ធជនរុស្ស៊ីដែលសម្រាកព្យាបាលនៅមន្ទីរពេទ្យមួយកន្លែង លោកពូទីនថ្លែងថាការធ្វើតេស្តនោះរៀបចំឡើងកាលពីថ្ងៃអង្គារ។ លោកថ្លែងថានេះជាលើកដំបូងដែលយើងមិនត្រឹមតែអាចបាញ់មីស៊ីលចេញពីនាវាមុជទឹកប៉ុណ្ណោះទេ ប៉ុន្តែបានបំពាក់អាវុធនុយក្លេអ៊ែរនៅលើគ្រាប់មីស៊ីលថែមទៀត។
លោកពូទីនអះអាងថាមីស៊ីលនេះអាចគេចផុតពីការតាមប្រមាញ់របស់ខែលការពារគ្រប់ប្រភេទ។ អ្នកវិភាគយល់ថាមីស៊ីលនេះមានវង់ប្រតិបត្តិការមួយម៉ឺនគីឡូម៉ែត្រ ហើយអាចហោះបានចម្ងាយ១៨៥គីឡូម៉ែត្រក្នុងមួយម៉ោង។ ការបាញ់សាកល្បងមីស៊ីលបុរេវេស្នីក និងប៉ូសេដុនជាសារនយោបាយដែលរុស្ស៊ីចង់ប្រាប់ទៅក្រុមបស្ចិមប្រទេសថាខ្លួននឹងមិនចុះញ៉មទៅតាមការដាក់សម្ពាធរបស់ពួកគេជាដាច់ខាត។ នេះបើយោងតាមការអះអាងរបស់លោកពូទីន៕
ចែករំលែកព័តមាននេះ