ទីក្រុងយេរូសាឡឹម៖ យោធាអ៊ីស្រាអែលថ្លែងថាបទឈប់បាញ់នៅហ្កាហ្សាមានសុពលភាពឡើងវិញហើយ បន្ទាប់ពីខ្លួនបើកយុទ្ធនាការវាយប្រហារសងសឹកបណ្ដាលឱ្យស្លាប់ក្រុមប៉ាឡេស្ទីនជាង១០៤នាក់។ នៅក្នុងចំណោមនោះក៏មានកុមារ៤៦នាក់ផងដែរ។ អ៊ីស្រាអែលថ្លែងថាខ្លួនវាយប្រហារដើម្បីសងសឹកឱ្យទាហានរបស់ខ្លួនដែលត្រូវក្រុមប៉ាឡេស្ទីនបាញ់សម្លាប់នៅពេលទាហានរូបនោះឈរជើងនៅតំបន់ពណ៌លឿង។
ការដែលអ៊ីស្រាអែលវាយប្រហារស្លាប់មនុស្សច្រើនដល់ថ្នាក់នេះធ្វើឱ្យបារម្ភថាបទឈប់បាញ់ដែលមានភាពផុយស្រួយស្រាប់ទៅហើយនោះអាចនឹងបរាជ័យ។ ប៉ុន្តែលោកត្រាំអះអាងថាបទឈប់បាញ់មិនបរាជ័យទេ, បទឈប់បាញ់នៅជាធរមាន។ លោកថាអ៊ីស្រាអែលគ្រាន់តែវាយប្រហារដើម្បីសងសឹកឱ្យយុទ្ធជនរបស់ខ្លួនតែប៉ុណ្ណោះ។ លោកចាត់ទុកថាចំណាត់ការរបស់អ៊ីស្រាអែលជាទង្វើត្រឹមត្រូវ។ លោកថាលើកក្រោយបើមានករណីបាញ់ប្រហារទៅលើទាហានអ៊ីស្រាអែលបែបនេះទៀត អ៊ីស្រាគួរតែវាយប្រហារសងសឹកដូចលើកនេះទៀត។
នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ថ្លែងថាលោកបានចេញបញ្ជាឱ្យវាយប្រហារឱ្យបានខ្លាំងក្លាជាបន្ទាន់។ លោកចោទប្រកាន់ថាក្រុមហាម៉ាស់ជាអ្នករំលោភបទឈប់បាញ់, ពួកគេចាត់ការមិនបានល្អនៅក្នុងការប្រគល់សាកសពចំណាប់ខ្មាំង។ ក្រោយមក បញ្ហាកាន់តែធ្ងន់ធ្ងរនៅពេលទាហានអ៊ីស្រាអែល និងក្រុមប៉ាឡេស្ទីនបាញ់តដៃគ្នាបណ្ដាលឱ្យស្លាប់ទាហានអ៊ីស្រាអែលម្នាក់។ ហេតុការណ៍នេះកើតឡើងនៅតំបន់រ៉ាហ្វា (Rafah) ស្ថិតនៅភាគខាងត្បូងនៃទីក្រុងហ្កាហ្សា។
លោកត្រាំដែលកំពុងបំពេញទស្សនកិច្ចនៅទ្វីបអាស៊ី និងត្រៀមចូលរួមកិច្ចប្រជុំអេប៉ិចនៅកូរ៉េខាងត្បូង លោកឆ្លៀតថ្លែងប្រាប់អ្នកសារព័ត៌មាននៅលើយន្តហោះថាអ៊ីស្រាអែលវាយប្រហារនោះជាការត្រឹមត្រូវព្រោះក្រុមហាម៉ាស់បានបាញ់សម្លាប់ទាហានអ៊ីស្រាអែលម្នាក់។ ទាហានរូបនោះក្រៅពីមានសញ្ជាតិអ៊ីស្រាអែល គាត់ក៏មានសញ្ជាតិអាមេរិកផងដែរ។
ទោះបីមានការចោទប្រកាន់យ៉ាងណាក្ដី ក្រុមហាម៉ាស់បានចេញមុខបដិសេធ។ ហាម៉ាស់អះអាងថាខ្លួនមិនពាក់ព័ន្ធនឹងការបាញ់ប្រហារទាហានអ៊ីស្រាអែលនោះទេ។ ហាម៉ាស់ចោទប្រកាន់បកទៅវិញថាអ៊ីស្រាអែលជាអ្នករំលោភបទឈប់បាញ់។ ដើម្បីបញ្ចេញប្រតិកម្មតបទៅនឹងការវាយប្រហាររបស់អ៊ីស្រាអែល ហាម៉ាស់ប្រកាសថាពួកគេនឹងពន្យារពេលប្រគល់សាកសពចំណាប់ខ្មាំងម្នាក់ទៀតទៅឱ្យអ៊ីស្រាអែល។ នេះបើតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ