ទីក្រុងសេអ៊ូល៖ អាមេរិកនឹងចែករំលែកបច្ចេកវិទ្យាដ៏ទំនើបរបស់ខ្លួន និងដែលលាក់ទុកជាការណ៍សម្ងាត់ជាយូរមកហើយទៅឱ្យកូរ៉េខាងត្បូងដើម្បីឱ្យប្រទេសនេះមានលទ្ធភាពផលិតនាវាមុជទឹកនុយក្លេអ៊ែរ។ នេះបើយោងតាមការបង្ហោះសាររបស់លោកត្រាំនៅលើបណ្ដាញសង្គមក្រោយពេលលោកជួបគ្នាទ្វេភាគីជាមួយប្រធានាធិបតីកូរ៉េខាងត្បូង លោកលីជេម្យុង។
នៅក្នុងកិច្ចជំនួបទ្វេភាគីថ្មីៗនេះ លោកលីជេម្យុងបានជម្រាបជូនលោកត្រាំថាគោលបំណងនៃការសាងសង់នាវាមុជទឹកនុយក្លេអ៊ែរនោះដើម្បីធ្វើទំនើបកម្មសម្ព័ន្ធភាពយោធារវាងអាមេរិក និងកូរ៉េខាងត្បូង។ លោកក៏បង្ហើបឱ្យដឹងផងដែរអំពីគម្រោងបង្កើនខ្ទង់ចំណាយលើវិស័យការពារជាតិដើម្បីជួយសម្រាលបន្ទុករបស់អាមេរិកខ្លះ កុំឱ្យរ៉ាប់រងច្រើនពេកតែម្នាក់ឯង។
មេដឹកនាំកូរ៉េខាងត្បូងរូបនេះថ្លែងថាអាចនឹងមានការបកស្រាយច្រឡំនៅពេលលោកទាំង២និយាយកាលពីខែសីហាអំពីផែនការសាងសង់នាវានុយក្លេអ៊ែរ។ ហេតុនេះលោកសូមបញ្ជាក់ឱ្យច្បាស់ឡើងវិញត្រង់ចំណុចនេះថាកូរ៉េខាងត្បូងមិនមែនចង់បាននាវាដែលបំពាក់អាវុធនុយក្លេអ៊ែរទេ ប៉ុន្តែចង់បាននាវាមុជទឹកដែលដើរដោយថាមពលនុយក្លេអ៊ែរតែប៉ុណ្ណោះ។
លោកត្រាំបង្ហោះសារដាច់ដោយឡែកមួយទៀតនៅលើបណ្ដាញសង្គមថាការសាងសង់នាវាមុជទឹកនោះនឹងធ្វើឡើងនៅកំពង់ផែហ្វ៊ីលី (Philly) ដែលក្រុមហ៊ុនកូរ៉េខាងត្បូងហានវ៉ាគ្រុប (Hanwha Group) បានទិញយកកាលពីឆ្នាំមុន។ រហូតមកដល់ពេលនេះ គេមិនទាន់ដឹងច្បាស់ថាតើនាវាមុជទឹកដែលគ្រោងសាងសង់នោះមានទំហំប៉ុណ្ណា ហើយត្រូវចំណាយថវិកាប៉ុន្មាននៅក្នុងការសាងសង់។ បើតាមការអះអាងរបស់កូរ៉េខាងត្បូង រដ្ឋាភិបាលរបស់ខ្លួនត្រៀមថវិកា១៥០ពាន់លានដុល្លារ។
បច្ចេកវិទ្យាសាងសង់នាវានុយក្លេអ៊ែររបស់អាមេរិកត្រូវបានរក្សាទុកជាការណ៍សម្ងាត់។ អាមេរិកមិនងាយចែករំលែកបច្ចេកវិទ្យានេះទៅឱ្យប្រទេសដទៃទេ លើកលែងតែប្រទេសនោះជាសម្ព័ន្ធមិត្តដ៏ជិតស្និទ្ធបំផុត។ រហូតមកដល់ពេលនេះ មានតែអង់គ្លេស និងអូស្ត្រាលីប៉ុណ្ណោះដែលអាមេរិកចែករំលែកបច្ចេកវិទ្យាសាងសង់នាវាមុជទឹកនុយក្លេអ៊ែរ។ ការប្រកាសអំពីការផ្ដល់បច្ចេកវិទ្យានេះទៅឱ្យកូរ៉េខាងត្បូងកើតឡើងចំពេលដែលកូរ៉េខាងជើងបន្តអភិវឌ្ឍកម្មវិធីនុយក្លេអ៊ែរ និងមីស៊ីល និងទើបតែធ្វើតេស្តមីស៊ីលបំពាក់ក្បាលគ្រាប់នុយក្លេអ៊ែររបស់ខ្លួន។ នេះបើតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ