ខេត្តកំពង់ឆ្នាំង ៖ នគរបាលក្រុងកំពង់ឆ្នាំង បានឃាត់ខ្លួនជនម្នាក់ ដែលបានបង្ហាញកេរភេទ និងអំពើអាសប្រឆាំងអនីតិជនក្រោមអាយុ១៥ឆ្នាំ ដោយបានប្រព្រឹត្តចំនួន២ដងក្នុងថ្ងៃតែមួយ គឺថ្ងៃទី២៦ ខែតុលា ឆ្នាំ២០២៥…
ខេត្តកំពង់ឆ្នាំង ៖ នគរបាលក្រុងកំពង់ឆ្នាំង បានឃាត់ខ្លួនជនម្នាក់ ដែលបានបង្ហាញកេរភេទ និងអំពើអាសប្រឆាំងអនីតិជនក្រោមអាយុ១៥ឆ្នាំ ដោយបានប្រព្រឹត្តចំនួន២ដងក្នុងថ្ងៃតែមួយ គឺថ្ងៃទី២៦ ខែតុលា ឆ្នាំ២០២៥ នៅភូមិកំពង់អុស សង្កាត់ផ្សារឆ្នាំង ក្រុងកំពង់ឆ្នាំង ។
គួររំឭកថា មុនពេលឃាត់ខ្លួនបុរសចិត្តល្អបង្អួតប្រដាប់ភេទរូបនេះ មានហ្វេសបុ៊កឈ្មោះ pisey Chorn និងសារព័ត៌មានផ្សេងទៀត បានផុសនិងស៊ែរ(Share)ថា ករណីដាក់ថ្នាំលើក្មេងស្រីនៅកំពង់ឆ្នាំង ។ ក្រោយពេលមានបាតុភាពបែបនេះ នគរបាលក្រុងកំពង់ឆ្នាំងបានធ្វើការស្រាវជ្រាវ និងឃាត់ខ្លួនជនឈ្មោះ អុល សារ៉ាត់ ភេទប្រុស អាយុ៤១ឆ្នាំ មានទីលំនៅក្នុងភូមិមេលំ ឃុំមេលំ ស្រុកបរិបូណ៌ ។
បើតាមអ្នកនាំពាក្យស្នងការដ្ឋាននគរបាលខេត្ត បានឲ្យដឹងថា កាលពីថ្ងៃទី២៦ ខែតុលា ឆ្នាំ២០២៥ វេលាម៉ោងប្រមាណ៤និង៣០នាទីរសៀល នៅក្រោយវត្តកំពង់អុស ស្ថិតក្នុងភូមិកំពង់អុស សង្កាត់កំពង់ឆ្នាំង ក្រុងកំពង់ឆ្នាំង មានប្រជាពលរដ្ឋផ្អើលថា មានករណីដាក់ថ្នាំលើក្មេងស្រី ។ ក្រោយពេលបានទទួលព័ត៌មាននេះ កម្លាំងនគរបាលខេត្ត សហការជាមួយនគរបាលក្រុងកំពង់ឆ្នាំង បានធ្វើអន្តរាគមន៍ បង្ក្រាប និងឃាត់ខ្លួនជនឈ្មោះ អុល សារ៉ាត់ ហៅព្រុញ មកសាកសួរ ។
នៅចំពោះមុខសមត្ថកិច្ច ជនឈ្មោះ អុល សារ៉ាត់ ឆ្លើយថា នៅវេលាម៉ោង១១និង៣០នាទីថ្ងៃត្រង់ថ្ងៃទី២៦ ខែតុលានោះ ខ្លួនបានទៅតូបលក់ដូរមុខវត្តកំពង់អុស ទិញសាប៊ូ និងទឹកបរិសុទ្ធពីក្មេងស្រីម្នាក់អាយុ១៥ឆ្នាំ ។ ដោយឃើញឱកាសល្អ ខ្លួនក៏បានរូតខោបង្ហាញប្រដាប់ភេទរបស់ខ្លួនឲ្យក្មេងស្រីមើល ហើយក្មេងស្រីក៏រត់ចូលទៅក្នុងផ្ទះបាត់ទៅ ។
លុះនៅវេលាម៉ោងជាង៤រសៀល ខ្លួនបានជិះម៉ូតូទៅសាលាបុណ្យភូមិកណ្ដាល សង្កាត់កំពង់ឆ្នាំង ឃើញក្មេងស្រីម្នាក់អាយុ៨ឆ្នាំ ក៏បានលួងលោមបបួលទៅទិញនំហូប ។ ខ្លួនបានដឹកក្មេងស្រីតាមម៉ូតូទៅក្រោយវត្តកំពង់អុស និងបានស្រាតខោរបស់ខ្លួនបង្ហាញប្រដាប់ភេទឱ្យក្មេងស្រីមើល ប៉ុន្តែត្រូវបានអ្នកភូមិមកទាន់ ក៏ផ្អើលឆោឡោ ហើយត្រូវសមត្ថកិច្ចឃាត់ខ្លួនតែម្ដង ។
ជនរោគចិត្តរូបនេះ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ពីបទបង្ហាញកេរភេទ និងអំពើអាស ប្រព្រឹត្តទៅលើអនីតិជនអាយុក្រោម១៥ឆ្នាំ ។
ជុំវិញករណីខាងលើនេះ លោក កេត សុឃា មេឃុំមេលំ បានប្រាប់ភ្នាក់ងារកោះសន្តិភាពតាមទូរស័ព្ទថា ជនឈ្មោះ អុល សារ៉ាត់ ធ្លាប់ធ្វើទាហាន និងពេទ្យទាហានផងដែរ ប៉ុន្តែក្រោយមកក៏បានឈប់ធ្វើទាហាន ហើយយូរៗឃើញមកផ្ទះម្ដង ។ គាត់ជាមនុស្សចូលចិត្តផឹកស្រា ហើយមួយរយៈចុងក្រោយនេះ ឃើញដូចជាចង់សរសៃប្រសាទ ។ ប្រពន្ធ និងកូនតូចៗ២នាក់ វេទនាលំបាកខ្លាំងស្ទើរគ្មានអ្វីហូប ។
នៅថ្ងៃទី២៧ ខែតុលា ឆ្នាំ២០២៥ ពេលទទួលព័ត៌មានពីការចាប់ខ្លួនបុរសរូបនេះ រូបគាត់ជាមេឃុំ បានទៅដល់ផ្ទះឃើញប្រពន្ធកូនគ្មានអ្វីហូប ក៏ទៅសុំអង្ករព្រះសង្ឃបានមួយការុង យកមកឲ្យគ្រាន់ដោះស្រាយបានមួយគ្រា ៕
ចែករំលែកព័តមាននេះ