ទីក្រុងឡាហាវ៉ាន៖ នៅទីបំផុត ខ្យល់ព្យុះមេលីសាបានបក់ទៅដល់ប្រទេសគុយបាជាបណ្ដើរៗហើយបន្ទាប់ពីព្យុះនេះទើបតែវាយប្រហារប្រទេសចាម៉ៃកា (Jamaica) យ៉ាងដំណំជាមួយនឹងល្បឿនជាង២០០គីឡូម៉ែត្រក្នុងមួយម៉ោង។ តាំងពីមុនពេលមកដល់នៃខ្យល់ព្យុះ អាជ្ញាធរគុយបាបានជម្លៀសមនុស្សជាងកន្លះលាននាក់ចេញពីតំបន់គ្រោះថ្នាក់។ នេះបើយោងតាមសេចក្ដីប្រកាសរបស់ប្រធានាធិបតីគុយបា លោកមីហ្គែល ឌីយ៉ាស់ កាណែល (Miguel Díaz-Canel)។ ក្រុមឧតុនិយមព្យាករថាខ្យល់ព្យុះនេះនឹងបង្កការខូចខាតធ្ងន់ធ្ងរសម្រាប់ខេត្តសាន់ធីអាហ្គោ ដឺ គុយបា (Santiago de Cuba) និងតំបន់ជុំវិញនោះ។
នៅពេលបក់ទៅដល់គុយបា ខ្យល់ព្យុះមេលីសាមានល្បឿន១៨៣គីឡូម៉ែត្រក្នុងមួយម៉ោង។ ដូច្នេះ ប្រទេសគុយបាដែលជួបប្រទះនឹងបញ្ហាលំបាកស្រាប់ដោយសារការហ៊ុមព័ទ្ធសេដ្ឋកិច្ច ឥឡូវនេះ ថែមខ្យល់ព្យុះវាយប្រហារទៀតរឹតតែធ្វើឱ្យប្រទេសនេះរងគ្រោះថែមមួយជាន់ទៀត ឬនិយាយម៉្យាងទៀតថាទុក្ខជាន់លើទុក្ខ។ អាជ្ញាធរថ្លែងថារហូតមកដល់ពេលនេះ គេបានជម្លៀសប្រជាជនជាង៧សែននាក់។ គេព្យាករថាគុយបាភាគប៉ែកខាងកើតអាចនឹងទទួលបានរបបទឹកភ្លៀង៥១សង់ទីម៉ែត្រ។
បន្ទាប់ពីវាយប្រហារគុយបារួចហើយ ខ្យល់ព្យុះមេលីសានឹងបង្ហួសដំណើរទៅប្រទេសបាហាម៉ាស់ (Bahamas) ជាបន្តទៀត។ ទោះបីបក់ផុតប្រទេសគុយបាក៏ដោយ ក៏ចំហាយនៃខ្យល់ព្យុះនឹងបង្កជាភ្លៀងធ្លាក់ឥតដាច់គ្រាប់នៅប្រទេសនេះជាបន្តទៀត ហើយនឹងបង្កជាគ្រោះទឹកជំនន់ និងការបាក់ដី។ នេះបើយោងតាមក្រុមឧតុនិយមដែលមានទីស្នាក់ការនៅទីក្រុងម៉ាយអាមី (Miami) ប្រទេសអាមេរិក។ ប្រទេសបឺមូដា (Bermuda) ក៏កំពុងតាមដានបញ្ហាខ្យល់ព្យុះនេះដោយយកចិត្តទុកដាក់ផងដែរ។
ខ្យល់ព្យុះធ្វើឱ្យគុយបាមានវិបត្តិសេដ្ឋកិច្ចកាន់តែខ្លាំង
នៅពេលខ្យល់ព្យុះមេលីសាបក់ទៅដល់តំបន់ដីគោកប្រទេសគុយបា គេបារម្ភកាន់តែខ្លាំងអំពីផលវិបាកដែលនឹងកើតមាននៅគុយបា។ ពោលគឺមិនត្រឹមតែបារម្ភអំពីផលវិបាកភ្លាមៗនៅចំពោះមុខប៉ុណ្ណោះទេ ប៉ុន្តែក៏បារម្ភអំពីផលវិបាករយៈពេលវែងផងដែរ។ គុយបាប្រឈមនឹងបញ្ហាខ្វះខាតភ្លើងអគ្គិសនី និងស្បៀងអាហារតាំងពីយូរមកហើយ។ ឥឡូវនេះថែមខ្យល់ព្យុះមេលីសាបក់មកថែមទៀតធ្វើឱ្យគុយបាលិចលង់រឹតតែខ្លាំង។
ប្រធានាធិបតីគុយបាថ្លែងថាយើងមានកិច្ចការជាច្រើនដែលត្រូវធ្វើ។ យើងដឹងថាការខូចខាតមានទំហំធំ។ ប៉ុន្តែលោកសូមធានាថាមិនទុកឱ្យនរណាម្នាក់នៅឯកោ ហើយត្រូវតែប្រើប្រាស់ធនធានដែលមានទាំងអស់ដើម្បីការពារអាយុជីវិតរបស់ប្រជាជនយើង។ លោកក៏សូមក្រើនរំលឹកប្រជាជនសូមកុំមើលស្រាលខ្យល់ព្យុះមេលីសាឱ្យសោះ។ នេះជាព្យុះដ៏ធំបំផុតមិនធ្លាប់មាននៅក្នុងប្រវត្តិសាស្ត្រ។ ទីតាំងមួយចំនួនចាប់ពីខេត្តក្វានតាណាម៉ូ (Guantánamo) នៃតំបន់ចុងបូព៌ារហូតដល់ទីក្រុងកាម៉ាហ្កួយ (Camagüey) ចាប់ផ្ដើមបិទសាលារៀនជាបណ្ដើរៗតាំងពីថ្ងៃចន្ទ។ នេះបើយោងតាមការផ្សាយរបស់យួរ៉ូ ញូស៍ (Euro News)៕
ចែករំលែកព័តមាននេះ