យន្តហោះចម្បាំងប៉ូឡូញ ស្ទា.ក់យន្តហោះរុស្ស៊ី នៅលើសមុទ្របាល់ទិក
ប្រទេសប៉ូឡូញ ៖ កងទ័ពអាកាសប៉ូឡូញ កាលពីថ្ងៃទី២៩ ខែតុលា ឆ្នាំ២០២៥ បានឱ្យដឹងថា យន្តហោះចម្បាំងប៉ូឡូញ ២គ្រឿង បានស្ទាក់យន្តហោះរុស្ស៊ី…
ប្រទេសប៉ូឡូញ ៖ កងទ័ពអាកាសប៉ូឡូញ កាលពីថ្ងៃទី២៩ ខែតុលា ឆ្នាំ២០២៥ បានឱ្យដឹងថា យន្តហោះចម្បាំងប៉ូឡូញ ២គ្រឿង បានស្ទាក់យន្តហោះរុស្ស៊ី ១គ្រឿង កាលពីថ្ងៃទី២៨ តុលា កន្លងទៅ ដែលកំពុងហោះហើរសម្រាប់បេសកកម្មឈ្លបយកការណ៍ នៅក្នុងដែនអាកាសអន្តរជាតិលើសមុទ្របាល់ទិក (Baltic) ដោយគ្មានផែនការហោះហើរដែលបានជូនដំណឹងជាមុន ហើយឧបករណ៍បញ្ជូនសញ្ញាយន្តហោះក៏ត្រូវបានបិទ។ នេះបើតាមប្រភពពីទីភ្នាក់ងារសារព័ត៌មាន Reuters និង Euronews បានចេញផ្សាយ។
យន្តហោះចម្បាំង MiG-29 ចំនួន ២គ្រឿងពីកងទ័ពអាកាសប៉ូឡូញ បានស្ទាក់យន្តហោះរុស្ស៊ី ១គ្រឿង ដែលកំពុងហោះហើរពីលើសមុទ្របាល់ទិក។ បញ្ជាការប្រតិបត្តិការនៃកងកម្លាំងប្រដាប់អាវុធប៉ូឡូញបានកំណត់អត្តសញ្ញាណយន្តហោះរុស្ស៊ីនោះថា Il-20 ហើយបានបញ្ជាក់ថា វាកំពុងហោះហើរក្នុងដែនអាកាសអន្តរជាតិ។ ដ្បិត Il-20 គឺជាយន្តហោះឈ្លបយកការណ៍សម័យសហភាពសូវៀត ដែលប្រើប្រាស់សម្រាប់បេសកកម្មឈ្លបយកការណ៍ និងស្តាប់តាមប្រព័ន្ធអេឡិចត្រូនិក។
ទោះយ៉ាងណា កងទ័ពអាកាសប៉ូឡូញអះអាងថា យន្តហោះរុស្ស៊ី១គ្រឿងនោះ មិនបានរំលោភលើដែនអាកាសប៉ូឡូញនោះទេ។ ប៉ុន្តែការស្ទាក់ត្រូវបានអនុវត្តដោយសារហេតុផលសំខាន់ៗដូចជា យន្តហោះ Il-20 របស់រុស្ស៊ីមិនមានផែនការហោះហើរដែលបានជូនដំណឹងជាមុនទេ ហើយឧបករណ៍បញ្ជូនសញ្ញាដែលអនុញ្ញាតឱ្យតាមដានទីតាំងរបស់យន្តហោះ ក៏ត្រូវបានបិទថែមទៀត។ កត្តាទាំងនេះធ្វើឱ្យការហោះហើរគួរឱ្យសង្ស័យ និងអាចគំរាមកំហែងដល់សន្តិសុខក្នុងតំបន់។
កងកម្លាំងប្រដាប់អាវុធប៉ូឡូញបានសង្កត់ធ្ងន់ថា ជាមួយនឹងការត្រៀមខ្លួនប្រយុទ្ធកម្រិតខ្ពស់ វិជ្ជាជីវៈរបស់អ្នកបើកយន្តហោះ និងប្រតិបត្តិការប្រកបដោយប្រសិទ្ធភាពនៃប្រព័ន្ធការពារដែនអាកាស ការស្ទាក់យន្តហោះឈ្លបយកការណ៍របស់រុស្ស៊ី ត្រូវបានអនុវត្តយ៉ាងឆាប់រហ័ស មានប្រសិទ្ធភាព និងសុវត្ថិភាព។ កងកម្លាំងប្រដាប់អាវុធប៉ូឡូញតែងតែត្រៀមខ្លួនជាស្រេច ដើម្បីឆ្លើយតបទៅនឹងការគំរាមកំហែងណាមួយ ដើម្បីការពារបូរណភាពនៃទឹកដីជាតិរបស់ខ្លួន៕
ចែករំលែកព័តមាននេះ