មិនសរសើរមិនបាន! ពេលឃើញឆន្ទៈអតីតកីឡាករតេក្វាន់ដូក្នុងវិស័យប្រដាល់
- ភ្នំពេញ
រាជធានីភ្នំពេញ ៖ មកទល់ពេលនេះ អតីតកីឡាករល្បីឈ្មោះផ្នែកតេក្វាន់ដូ លោក ស៊ន អេលីត បងបង្កើតកីឡាការិនី ស៊ន សៀវម៉ី…
រាជធានីភ្នំពេញ ៖ មកទល់ពេលនេះ អតីតកីឡាករល្បីឈ្មោះផ្នែកតេក្វាន់ដូ លោក ស៊ន អេលីត បងបង្កើតកីឡាការិនី ស៊ន សៀវម៉ី នៅតែបន្តបំភ្លេចចោលអាជីពតេក្វាន់ដូដោយងាកមកបង្កើតក្លិបប្រដាល់គុនខ្មែរជាជំនួសវិញ ។ អ្វីដែលគួរសរសើរ គឺលោកមិនត្រឹមតែជួយបណ្ដុះបណ្ដាលឱ្យអ្នកមានឆន្ទៈក្មេងៗក្លាយជាកីឡាករប្រដាល់មានឈ្មោះបោះសំឡេងប៉ុណ្ណោះទេ គឺលោកថែមទាំងដើរតួជាអ្នកផ្គត់ផ្គង់ និងរៃអង្គាសរកជំនួយដើម្បីឱ្យកីឡាករនៅក្នុងបន្ទុករបស់លោកបានបន្តជំហានទៅមុខផងដែរ។
នៅលើទំព័រហ្វេសប៊ុកផ្លូវការរបស់លោក ស៊ន អេលីត គេឃើញសកម្មភាពរបស់លោកស្វះស្វែងរកជំនួយមកទប់ដំណើរការក្លិប និងមកជួយដល់កូនសិស្សរបស់លោកប្រកបដោយឆន្ទៈតែម្ដង ដោយលោកមិនមែនគ្រាន់តែបង្វឹកដោយមិនគិតកម្រៃ និងជួយឱ្យសិស្សមានទីផ្សារឡើងរេញប៉ុណ្ណោះទេ លោកក៏ដើរតួជាអ្នកស្វះស្វែងរកជំនួយដើម្បីឱ្យសិស្សរបស់លោកមួយចំនួនបានបន្តដំណើរទៅមុខផងដែរ ។ លោករមែងនិយាយថា ការសម្រេចបើកក្លិបប្រដាល់ គឺលោកមិនមែនគ្រាន់តែបើកដើម្បីឱ្យមាននោះទេ គឺលោកប្រកាសបើកដោយឆន្ទៈតែម្ដង ។
ជាក់ស្ដែងតាំងពីដំណើរការក្លិបមកទល់ពេលនេះ លោកបានយកថវិកាផ្ទាល់ខ្លួនជួយដល់កីឡាករមិនតិចនាក់នោះទេ បន្ថែមពីលើការស្វះស្វែងរកជំនួយសប្បុរសធម៌ជួយដល់កូនសិស្សរបស់លោកផងដែរ ។ លោកក៏នៅតែសម្ដែងអារម្មណ៍សោកស្ដាយផងដែរ ដែលការប្រដាល់ប្រចាំសប្ដាហ៍នៅក្នុងក្លិបរបស់លោក ត្រូវបានបិទចោល ក្នុងពេលដែលលោកប្រកាសថា ការរំលេចសង្វៀនប្រដាល់នាពេលកន្លងមក គឺបានរួមចំណែកយ៉ាងខ្លាំងធ្វើឱ្យកូនសិស្សរបស់លោក សាំុនឹងការប្រដាល់ ។ លោកថា ការសម្រេចចិត្តបោះបង់ការប្រកួតរាល់អាទិត្យប្រចាំក្លិប គឺគ្មានស្ពុនស័រ និងសំខាន់ជាងគេ គឺលោកគ្មានការលើកទឹកចិត្ត ធ្វើឱ្យលោកលែងចង់តស៊ូព្រោះចាយលុយផ្ទាល់ខ្លួនច្រើនពេក ។
លោកធ្លាប់រំលឹកថា៖«ការពិត ការបើកប្រកួតហ្នឹងគឺល្អណាស់ ព្រោះវាជួយឱ្យក្មេងៗ មានបទពិសោធន៍ឡើងរេញ ហើយស៊ាំនឹងបរិយាកាសក្នុងពេលដែលលោក និងគ្រូបង្វឹកមួយចំនួនដាក់ឱ្យប្រកួតផ្លូវការតាមប៉ុស្តិ៍ ។ ប៉ុន្តែតើឱ្យនៅប្រកួតយ៉ាងម៉េច បើប្រកួតយូរហើយរកតែស្ពុនស័រគ្រាន់ឱ្យគ្រូបង្វឹក និងអ្នកឈ្នះមិនបានផងហ្នឹង ខ្ញុំម្នាក់ឯងមានត្រឹមតែចិត្តប៉ុណ្ណោះ ចុះបើធនធានចំណាយតែរហូតតើទៅយ៉ាងម៉េចរួច អុីចឹងមានតែបិទតែម្ដងទៅ»។
លោកបន្តថា ក្រោយពីអស់សង្ឃឹមលើការបង្ហាត់តេក្វាន់ដូ លោកបានបើកក្លិបប្រដាល់កាលពីអំឡុងខែ៣ ឆ្នាំ២០១៨ ដោយមកដល់ពេលនេះ លោកមានកូនសិស្សហ្វឹកហាត់ជាប់លាប់ចំនួន២០នាក់មកហើយ ខណៈដែល១២នាក់ គឺស្នាក់នៅដេកពួនក្នុងក្លិបរបស់លោកនៅជាប់វិទ្យាល័យប្ញស្សីកែវនោះតែម្ដង ។
លោកមានតែកម្លាំងចិត្តបើកសង្វៀនប្រដាល់ឱ្យក្មេងៗដែលចង់ហ្វឹកហាត់បានបង្ហាញសមត្ថភាព ប៉ុន្តែពេលនេះ លោកត្រូវបិទគម្រោងចោលមួយទៀត ដែលធ្វើឱ្យលោក និងក្មេងប៉ះពាល់អារម្មណ៍ខ្លះៗផងដែរ ។ យ៉ាងណាមិញលោកថា ការបិទសង្វៀនប្រដាល់មិនធ្វើឱ្យសិស្សរបស់លោកឈប់ចង់ហ្វឹកហាត់ ហើយបោះបង់អាជីពចង់បន្តការប្រដាល់នោះទេ គឺនៅបង្កើនការហ្វឹកហាត់ជាប់លាប់ដដែល ដោយគ្រាន់តែអ្នកដែលលោកបានផ្គូផ្គងឱ្យឡើងទូរទស្សន៍បានក៏កាន់តែសប្បាយចិត្តនឹងការហ្វឹកហាត់ ចំណែកអ្នកថ្មីមិនសូវបានឡើងរេញ ក៏រាងបាក់ទឹកចិត្តបន្តិច ។
លោកថា ក្មេងៗនៅតែសកម្មក្នុងម៉ោងលោកបង្ហាត់ ដោយសិស្សខ្លះបានក្លាយជាធនធានដែលខាងបណ្ដាប៉ុស្តិ៍ក៏មានតម្រូវការផង បើទោះជាលោកសម្រេចចិត្តបិទសង្វៀន ដែលធ្លាប់ផ្គូផ្គងឱ្យសិស្សបានបញ្ចេញសមត្ថភាព ។ លោកថា កូនសិស្សទាំងអស់ អត់មានតម្រូវឱ្យបង់លុយក្នុងការហ្វឹកហាត់នោះ ទេតែមួយចំនួនដែលមានលទ្ធភាពគ្រាន់បើ គឺគេឱ្យអង្ករមួយបេ ឬ២បេ ទៅតាមលទ្ធភាព ។ ក្នុងចំណោមកូនសិស្សទាំងនោះមានអាយុពី១៦ ដល់២៥ឆ្នាំ ដោយកីឡាករទាំង២០ត្រូវបានឆ្លាស់គ្នាឡើងប្រកួតចុះឡើងៗស្ទើរតែគ្រប់សង្វៀនមកហើយ ចាប់តាំងពីក្លិបរបស់លោកដំណើរការជាង១ឆ្នាំនេះ ។
លោកបានសម្រេចឱ្យកូនសិស្សទាំងអស់ប្រើត្រកូល អេលីត នៅពេលឡើងប្រកួត ដោយសារតែលោកចង់ពង្រីកកេរ្តិ៍ឈ្មោះឱ្យមានអ្នកស្គាល់កាន់តែច្រើនក្រោយតស៊ូបើកក្លិបប្រដាល់ ។ លោកនៅតែអះអាងថា ហេតុផលដែលលោកហ៊ានបើកក្លិបប្រដាល់ ហើយដើរតួអ្នកបង្ហាត់ផង គឺដោយសារតែមុនក្លាយខ្លួនជាអ្នកតេក្វាន់ដូ លោកក៏ជាអ្នកប្រដាល់អាជីពមួយរូប ដោយលោកប្រកាសថា មុនពេលបោះជំហានចូលផ្នែកតេក្វាន់ដូ គឺលោកឡើងប្រកួតបានជាង១០លើកដែរ ។
លោកថា ការប្រដាល់នៅពេលបន្ថែមបន្ថយក្បាច់គុនតេក្វាន់ដូ កាន់តែងាយស្រួលបង្ហាត់ ទើបលោកពេញចិត្តក្នុងការបង្វឹកសិស្ស ហើយកូនសិស្សរបស់លោកទៀតសោត ក៏ច្រើនតែល្អនៅពេលឡើងរេញ ។ កីឡាករខ្លះលោកថាត្រូវបានគេស្នើឱ្យប្រកួតរកពេលសម្រាកមិនបានព្រោះតែភាពខ្លាំងនោះផង៕
ចែករំលែកព័តមាននេះ