ប្រទេសស៊ីរី ៖ ការវាយប្រហារតាមអាកាសរបស់របបស៊ីរី កាលពីថ្ងៃទី២២ឧសភាបានសម្លាប់ជនស៊ីវិលយ៉ាងតិច២៣នាក់ ក្នុងនោះប្រមាណជាង១០នាក់ស្លាប់ក្នុងផ្សារមានមនុស្សកុះករមួយ នាទីតាំងចុងក្រោយរបស់ពួកឧទ្ទាមជីហាដនៅភាគពា័យ្យស៊ីរី។
ខេត្តអុីដលីបនិងតំបន់មួយចំនួននៃខេត្តជាប់ជិតខាងហាម៉ា អាឡែបនិងឡាតាគីយេ គ្រប់គ្រងជាពិសេសដោយក្រុមHAYAT TAHRIR AL CHAM ជាអតីតសាខាអាល់កាល់ដានៅស៊ីរី។ ទីតាំងទាំងនោះចាប់តាំងពីដំណាច់ខែមេសាមក ជាទីលាននៃការប៉ះទង្គិចគ្នាដ៏បង្ហូរឈាម រវាងពួកជីហាដនិងកងទ័ពស៊ីរីជួយទ្រទ្រង់ដោយរុស្ស៊ី។
ចាប់តាំងពីយប់ថ្ងៃទី២១ឧសភាមក ការប្រយុទ្ធគ្នាខ្លាំងក្លារវាងភាគីទាំង២ នៅជុំវិញទីក្រុង KAFR NABUDAបណ្ដាលឲ្យយុទ្ធជនស្លាប់៨៧នាក់។ នេះបើយោងតាមអង្គការសិទ្ធិមនុស្សស៊ីរីOSDH មានប្រភពព័ត៌មានច្រើនក្នុងប្រទេស។ ក្នុងចំណោមយុទ្ធជនដែលស្លាប់ទាំងនោះ មានទាហាន៥១នាក់និងពួកជីហាដ៣៦នាក់។ OSDHអះអាងទៀតថា ជនស៊ីវិល២៣នាក់បានត្រូវស្លាប់ក្នុងការវាយប្រហារតាមអាកាសរបស់កងទ័ពស៊ីរីនាពេលយប់ ក្នុងនោះ១២នាក់ក្នុងផ្សារមួយនៃទីក្រុងMAARET AL NOOMANE។
ចំណែកសាកសពមនុស្ស៦៧០នាក់ត្រូវបានកាយរកឃើញ ក្នុងរណ្ដៅកប់សពរួមដ៏ធំបំផុតមួយ ពុំធ្លាប់ដែលរកឃើញនៅភាគខាងជើងស៊ីរី។ សាកសពទាំងនេះជាជនរងគ្រោះដោយសារអំពើភេរវកម្មរបស់ក្រុមរដ្ឋអ៊ិស្លាម។ សាកសពទាំងនោះកាយរកឃើញនាសប្ដាហ៍ចុងក្រោយនេះនៅក្រុងរ៉ាកា ដែលកាលពីមុនជារដ្ឋធានីរបស់ក្រុមរដ្ឋអ៊ិស្លាមនៅស៊ីរី។ រណ្ដៅកប់សពរួមនេះដែលរកឃើញតាំងពីថ្ងៃទី៩មករាមកស្ថិតនៅ AL FUKHEIKA ជាតំបន់ជាយក្រុងមួយនៃក្រុងរ៉ាកា៕ (កែសម្រួលដោយ ៖ បុប្ផា)
ចែករំលែកព័តមាននេះ