មកដឹងពីទំនាយបវេណី…ក្រោយផ្សងគោឧសភរាជបរិភោគអាហារទាំង៧
- តាកែវ
ខេត្តតាកែវ ៖ ការផ្សងតាមរយៈគោឧសភរាជបរិភោគអាហារចំនួន៧មុខបង្ហាញថា ការបង្កបង្កើនផលនៅឆ្នាំ២០១៩នេះ ស្រូវ ពោត និងសណ្តែក ទទួលបានផលល្អប្រសើរ ដោយឡែកល្ង ស្មៅ…
ខេត្តតាកែវ ៖ ការផ្សងតាមរយៈគោឧសភរាជបរិភោគអាហារចំនួន៧មុខបង្ហាញថា ការបង្កបង្កើនផលនៅឆ្នាំ២០១៩នេះ ស្រូវ ពោត និងសណ្តែក ទទួលបានផលល្អប្រសើរ ដោយឡែកល្ង ស្មៅ…
ខេត្តតាកែវ ៖ ការផ្សងតាមរយៈគោឧសភរាជបរិភោគអាហារចំនួន៧មុខបង្ហាញថា ការបង្កបង្កើនផល
នៅឆ្នាំ២០១៩នេះ ស្រូវ ពោត និងសណ្តែក ទទួលបានផលល្អប្រសើរ ដោយឡែកល្ង ស្មៅ ស្រា និងទឹក
គោឧសភរាជមិនបរិភោគទេ ។ លទ្ធផលនៃការផ្សងនេះ គឺដូចគ្នាទៅនឹងឆ្នាំ២០១៨កន្លងមកដែរ។ ការផ្សងតាមរយៈគោឧសភរាជបរិភោគអាហារ៧មុខនេះ គឺនៅក្នុងព្រះរាជពិធីច្រត់ព្រះនង្គ័លក្រោមព្រះរាជាធិបតីភាពនៃព្រះករុណាមហាក្សត្រ សម្តេចព្រះបរមនាថ នរោត្តម សីហមុនី កាលពីព្រឹកថ្ងៃទី២២ ខែឧសភា ត្រូវនឹងថ្ងៃ៤រោច ខែពិសាខ ដែលបានប្រារព្ធធ្វើនៅក្នុងបរិវេណកីឡដ្ឋានក្រុងដូនកែវ ។
អញ្ជើញចូលរួមក្នុងព្រះរាជពិធីនេះមាន សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភាសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មន្ត្រីជាន់ខ្ពស់រាជរដ្ឋាភិបាល មន្ត្រីអង្គទូតនៃបណ្តាប្រទេសជាមិត្តប្រចាំនៅកម្ពុជាមន្ត្រីរាជការ កងកម្លាំងប្រដាប់អាវុធ សិស្សានុសិស្ស និងប្រជាពលរដ្ឋយ៉ាងច្រើនកុះករ ។
តាមលំអានព្រះរាជបវេណីតាំងពីដើមរៀងមក មុននឹងចាប់ផ្តើមព្រះរាជពិធី តាអាចារ្យធ្វើពិធីបួងសួងដល់ទសបរមីទេវតាថែរក្សាប្រទេសកម្ពុជា និងវត្ថុស័ក្តិសិទ្ធិក្នុងលោកប្រោះព្រំប្រសិទ្ធពរជ័យសិរីមហាប្រសើរថ្វាយព្រះកុរណាព្រះមហាក្សត្រ និងសម្តេចព្រះមហាក្សត្រីព្រះវររាជមាតាជាតិខ្មែរ និងប្រជារាស្ត្រខ្មែរ ក៏ដូចជាសុំឱ្យទឹកភ្លៀងធ្លាក់បរិបូរណ៍ទៀងទាត់តាមកាលវេលា និងសូមឱ្យការបង្កបង្កើនផលទទួលបានផលល្អប្រសើរ ។
បន្ទាប់ពីលោកតាអាចារ្យបួងសួងរួចរាល់ហើយ លោក អ៊ូច ភា អភិបាលខេត្ត ដែលត្រូវបានព្រះមហាក្សត្ររាជានុញ្ញាតឱ្យធ្វើជាស្តេចមាឃ តំណាងដ៏ខ្ពង់ខ្ពស់របស់ព្រះអង្គ ចាប់ផ្តើម ភ្ជួរលើវាលព្រះស្រែចំនួន៣ជុំ និងព្រោះគ្រាប់ស្រូវដោយលោកជំទាវ ស្រី ប៊ុណ្ណាដាវី ជាភរិយា ដែលជ្រើសតាំងជាមេហួ ។
ក្រោយពេលភ្ជួរនិងព្រោះគ្រាប់ស្រូវចំនួន៣ជុំរួចមក ព្រាហ្មណ៍ព្រះរាជគ្រូបុរោហិត បានធ្វើពិធីសូត្រមន្តប្រោះព្រំទឹកលើគោឧសភរាជ និងលែងឱ្យទៅបរិភោគអាហារចំនួន៧មុខរួមមាន ស្រូវ ពោត សណ្តែក ល្ង ស្មៅ ស្រា និងទឹក ដែលបានរៀបចំទុករួចជាស្រេច ។ ក្នុងចំណោមអាហារទាំង៧មុខនេះ គោឧសភរាជបរិភោគស្រូវ៨៥ភាគរយ ពោត៩០ភាគរយ និងសណ្តែក៨៨ភាគរយ ដោយឡែកល្ង ស្មៅ ស្រា និងទឹក គោឧសភរាជមិនបរិភោគទេ ។
សូមបញ្ជាក់ថា ព្រះរាជពិធីបុណ្យច្រត់ព្រះនង្គ័ល ជាព្រះរាជប្បវេណីដ៏សំខាន់ចាត់ទុកជាវប្បមង្គលមួយ
ដ៏ប្រសើររបស់ប្រជាពលរដ្ឋកម្ពុជា ដែលមហាក្សត្រគ្រប់ព្រះអង្គ តែងតែដឹកនាំធ្វើពុំដែលខានតាំងពីបុរាណកាលរៀងមក ដើម្បីជាការប្រកាសដល់ប្រជាពលរដ្ឋខ្មែរថា រដូវបង្កបង្កើនផល រដូវធ្វើស្រែបានចូលមកដល់ហើយ ។
ព្រះរាជពិធីនេះ កាលពីដើមឡើយតែងតែប្រារព្ធធ្វើនៅវាលព្រះមេរុជិតព្រះបរមរាជវាំង តែក្រោយៗមកព្រះរាជពិធីត្រូវបានព្រះករុណាជាអម្ចាស់ជីវិតលើត្បូង ព្រះរាជានុញ្ញាតឱ្យធ្វើនៅតាមខេត្តវិញម្តង ដើម្បីឱ្យប្រជាពលរដ្ឋខ្មែរបានចូលរួមក្នុងព្រះរាជបវេណីដ៏សំខាន់មួយនេះ។
ព្រះរាជពិធីច្រត់ព្រះនង្គ័ល ដែលត្រូវបានប្រារព្ធធ្វើឡើងជារៀងរាល់ឆ្នាំនៅក្នុងខែពិសាខ គឺជាព្រះរាជពិធីមួយសំខាន់បំផុត បន្ទាប់ពីព្រះរាជាអភិសេក ហើយក៏ជាព្រះរាជពិធីមួយស្ថិតក្នុងចំណោមព្រះរាជពិធីផ្សេងៗទៀតប្រចាំឆ្នាំ ដែលចាត់ចូលជាព្រះរាជពិធីទ្វារទសមាស ។
នៅប្រទេស ឥណ្ឌាបុរាណ និងនៅព្រះរាជាណាចក្រកម្ពុជា ការប្រកបរបរកសិកម្មជាមុខរបរចម្បង ដោយពឹងពាក់ទាំងស្រុងលើស្រូវអង្ករ និងភោគផល ដំណាំដទៃៗទៀត (បច្ចុប្បន្ន ប្រជានុរាស្ត្រខ្មែរ ប្រកបមុខរបរធ្វើស្រែចម្ការពី៨៣ទៅ៨៥%)។តាមពិតទៅ ការបង្កើតផលិតផលស្រូវអង្ករ ឬក៏ផលដំណាំផ្សេងៗដូចជាពោត សណ្តែក ល្ង ដោយ ព្រះរាជាតាមរយៈព្រះរាជពិធីខាងលើនេះបណ្តាល មកពីកត្តាចម្បងមួយ គឺលក្ខណៈស័ក្តិសិទ្ធិរបស់ តួអង្គ«ស្តេច» ក្នុងក្រសែភ្នែករបស់ប្រជានុរាស្ត្រ ។
មានន័យថា ផលដំណាំពុំមែនស្ថិតនៅត្រឹមតែការ ដាំដុះ បច្ចេកទេស ឬសេដ្ឋកិច្ចនោះទេ ពោលគឺប្រាកដជាបណ្តាលមកពីពិធីកម្មនេះឯង ។ តាមទម្លាប់ ពិធីនេះធ្វើឡើងក្នុងការផ្សង មើលប្រផ្នូលរបស់ស្រុកទេស ទៅតាមការបរិភោគ របស់«គោឧសភរាជ»។ គោ១នឹមដែលទឹមច្រត់ ព្រះនង្គ័លនោះ គេហៅថា«គោឧសភរាជ» ក៏មានកំណត់ក្នុងលក្ខណៈតាមបែបនិយមបច្ចុប្បន្ន គឺសម្បុរខ្មៅ ស្នែងរាងច្រពាស់ ឈ្នក់ ឬប្រក់នាគ គឺរាងខុបទៅមុខបន្ដិចហើយវាត់ចុងទៅលើបន្ដិច ។ គោ២នឹមទៀត ដែលសម្រាប់ហែមុខហែក្រោយឃើញថា មិនទាន់កំណត់លក្ខណៈ តែតាមដែលធ្លាប់ប្រើមកហើយឃើញច្រើនតែសម្បុរក្រហម ។ ឯ«គោឧសភរាជ»នោះ វេលាទឹមច្រត់ព្រះនង្គ័ល គេប្រដាប់ដោយគ្រឿងគឺពាក់ស្រោមមុខ ស្រោមស្នែង និងពាក់សំពត់កម្រាល សម្បុរក្រហមលើខ្នងផង ។
ឯព្រះនង្គ័លទាំង៣នោះ គេលាបថ្នាំពណ៌ខ្មៅកាត់ខ្សែក្រហមដោយអន្លើៗ ឯចន្ទោលព្រះនង្គ័ល សម្រាប់អ្នកតំណាងព្រះអង្គនោះមានលក្ខណៈពិសេសគឺធ្វើជារូបនាគលាបថ្នាំពណ៌លឿងបែបយ៉ាងពណ៌មាស ។ នៅត្រង់កនាគមានភូធ្វើពីរោមសត្វសម្បុរបែបភូទួន ។
ទាក់ទិននឹងការផ្សងគោឧសភរាជ គឺ ព្រាហ្មណ៍ព្រះរាជគ្រូសូត្រពាក្យអធិដ្ឋានផ្សងគោឧសភរាជ ដែលទឹមច្រត់ព្រះនង្គ័លនោះ ឱ្យបរិភោគអាហារ៧យ៉ាង ដែលភ្នាក់ងាររៀបដាក់តុប្រាក់ធំៗតាំង ទុកនៅទីមុខព្រះពន្លា គឺគ្រាប់ស្រូវ១តុ គ្រាប់ សណ្ដែក១តុ គ្រាប់ពោត១តុ គ្រាប់ល្ង១តុ ស្មៅស្រស់១តុ ទឹក១តុ ស្រា១តុ ។ ពេលសូត្រចប់ព្រាហ្មណ៍ព្រះរាជគ្រូ យកទឹកមន្ដប្រោះក្បាលព្រះ គោទាំងពីរ ហើយមន្ដ្រីម្នាក់ដែលកាន់នង្គ័លស្ដេចមាឃ ដឹកគោឧសភរាជទាំងពីរទៅឱ្យបរិភោគ របស់ទាំង៧យ៉ាង គឺដឹកទៅជិតរបស់៧យ៉ាងស្រេចហើយ តែគោឧសភរាជចូលចិត្ដបរិភោគអ្វី ក៏បរិភោគទៅ គេមិនបង្ខំឱ្យបរិភោគចំពោះអាហារណានីមួយៗទេ ។ កាលព្រះគោបរិភោគអ្វីមួយយ៉ាងឬពីរយ៉ាង ព្រាហ្មណ៍ក៏ទាយផលប្រផ្នូលទៅខាងមុខតាមនោះ ៕ (សម្រួលដោយ៖ ស្រីណា)
ចែករំលែកព័តមាននេះ