ខេត្តបន្ទាយមានជ័យ ៖ បុរសម្នាក់ដែលគេស្គាល់ជាទាហានផឹកស្រាស្រវឹងទៅរករឿងអ្នកលតឆាបង្កជាជម្លោះត្រូវអ្នកលក់លតឆាវាយមួយវែកបែកក្បាលឈាមហូរជោកខ្លួនដេរ៣ថ្នេរ ចំណែកអ្នកលក់លតឆាក៏ត្រូវរបួសជាំដៃផងដែរ ។ អំពើហិង្សានេះបានកើតឡើងនៅវេលាម៉ោង៨យប់ថ្ងៃទី២១ ខែឧសភា ឆ្នាំ២០១៩ នៅចំណុចមុខវេទិកាសួនមានជ័យ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
ប្រភពព័ត៌មានពីនគរបាលមូលដ្ឋានបានឲ្យដឹងថា ភាគីអ្នកលក់លតឆាឈ្មោះ គីម សីម៉ា ភេទប្រុស អាយុ ៤២ឆ្នាំ រស់នៅភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។ ចំណែកភាគីម្ខាងទៀតដែលបង្កជម្លោះឈ្មោះ ឡុង ភក្តី ភេទប្រុស អាយុ៣០ឆ្នាំ រស់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ មុខរបរទាហាន ។
ប្រភពដដែលបានបញ្ជាក់ថា នៅមុនពេលកើតហេតុ ឡុង ភក្តី ដែលគេស្គាល់ថា ជាទាហានបានឈប់ទិញលតឆាទាំងស្រវឹងស្រាហើយបានយកស្រាទៅចាក់ចូលក្នុងខ្ទះលតឆារបស់ឈ្មោះ គឹម សីម៉ា ធ្វើឲ្យអ្នកលក់ឈ្មោះ គឹម សីម៉ា ខឹងសម្បាក៏ឈ្លោះទាស់ពាក្យសម្តីគ្នារហូតឈានដល់អំពើហិង្សា ។
ក្រោយមកឈ្មោះ គឹម សីម៉ា បានទាញវែកឆាវាយទៅលើក្បាលឈ្មោះ ឡុង ភក្តី មួយវែកឆាយ៉ាងដំណំបណ្តាលឲ្យបែកក្បាលហូរឈាមជោកខ្លួនដេរ៣ថ្នេរ ចំណែកឈ្មោះ គឹម សីម៉ា ក៏ត្រូវឈ្មោះ ឡុង ភក្តី ទាញកៅអីជ័រវាយតបមកវិញរបួសជាំដៃខាងឆ្វេង ហើយត្រូវបានអ្នកជិតខាងចូលទៅឃាត់ និងរាយការណ៍ទៅកាន់សមត្ថកិច្ច និងបានចុះទៅដល់កន្លែងកើតហេតុ ។
ហើយចំពោះជុំវិញករណីហិង្សានេះគេនៅមិនទាន់ដឹងថា ភាគីទាំងសងខាងមានដំណោះស្រាយជាមួយគ្នាយ៉ាងណានោះទេ ព្រោះពេលនេះសមត្ថកិច្ចកំពុងធ្វើការសួរនាំភាគីទាំង២ ៕
កែសម្រួលដោយ ៖ សំណាង
ចែករំលែកព័តមាននេះ