ខេត្តស្ទឹងត្រែង ៖ រដ្ឋបាលខេត្តស្ទឹងត្រែងបានរៀបចំពិធី «បដិបត្តិសមាធិចម្រើនឈាន ដើម្បីសន្តិភាព និងផ្សព្វផ្សាយមេត្តាធម៌បំពេញកុសលផលបុណ្យ ជូនវីរកងទ័ព វីរនគរបាលជាតិ ដែលបានពលីជីវិតដើម្បីការពារជាតិមាតុភូមិកម្ពុជា» ត្រូវបានប្រារព្ធឡើងយ៉ាងអធឹកអធម…
ខេត្តស្ទឹងត្រែង ៖ រដ្ឋបាលខេត្តស្ទឹងត្រែងបានរៀបចំពិធី «បដិបត្តិសមាធិចម្រើនឈាន ដើម្បីសន្តិភាព និងផ្សព្វផ្សាយមេត្តាធម៌បំពេញកុសលផលបុណ្យ ជូនវីរកងទ័ព វីរនគរបាលជាតិ ដែលបានពលីជីវិតដើម្បីការពារជាតិមាតុភូមិកម្ពុជា» ត្រូវបានប្រារព្ធឡើងយ៉ាងអធឹកអធម កាលពីល្ងាចថ្ងៃទី២២ ខែធ្នូ ឆ្នាំ២០២៥ នៅទីលានតេជោធិបតី ស្ថិតក្នុងក្រុងស្ទឹងត្រែង មុខសាលាខេត្ត ។
ពិធីដ៏ពិសិដ្ឋនេះ ត្រូវបានធ្វើឡើងក្រោមវត្តមានដ៏ខ្ពង់ខ្ពស់លោក ជំទាវ ឡុង ភិរម្យ រដ្ឋលេខាធិការក្រសួងទេសចរណ៍ លោក សរ សុពុត្រា អភិបាលនៃគណៈអភិបាលខេត្ត ។ គ្រានោះ លោកអភិបាលខេត្តបានអញ្ជើញថ្លែងសុន្ទរកថា គន្លឹះនិងផ្តល់នូវសារធម៌ដ៏ជ្រាលជ្រៅដល់អង្គពិធី ។
លោកបានលើកឡើងថា គោលបំណងស្នូលនៃពិធីនេះ គឺដើម្បីឧទ្ទិសកុសលផលបុណ្យ និងបង្ហាញនូវសេចក្តីដឹងគុណដ៏ជ្រាលជ្រៅបំផុតជូនដល់វិញ្ញាណក្ខន្ធវីរកងទ័ព និងវីរនគរបាលជាតិទាំងអស់ ដែលបានលះបង់ជីវិតយ៉ាងក្លាហានក្នុងបុព្វហេតុការពារបូរណភាពទឹកដី និងថែរក្សាសន្តិភាពជូនជាតិមាតុភូមិកម្ពុជា ។
ក្នុងសុន្ទរកថាដ៏មានអត្ថន័យនោះ លោក សរ សុពុត្រា បានសង្កត់ធ្ងន់ពីតម្លៃនៃសន្តិភាព និងសារៈសំខាន់នៃការផ្សព្វផ្សាយមេត្តាធម៌តាមរយៈការបដិបត្តិសមាធិចម្រើនឈាន ដើម្បី រួមចំណែកដល់ភាពសុខដុមរមនាជាតិ ។ លោកក៏បានលើកឡើងពីវីរភាពដ៏ឧត្តុង្គឧត្តមរបស់កងកម្លាំងប្រដាប់អាវុធ ដែលបានពលីដើម្បីជាតិនោះ ថាជាគំរូដ៏ថ្លៃថ្លាសម្រាប់កូនចៅជំនាន់ក្រោយ ។
ពិធីនេះ បានប្រព្រឹត្តទៅក្នុងបរិយាកាសដ៏ស័ក្តិសម ដែលមានការចូលរួមយ៉ាងច្រើនកុះករ ពីសំណាក់មន្ត្រីរាជការ កងកម្លាំងប្រដាប់អាវុធ ព្រះសង្ឃ យុវជន យុវតី និងប្រជាពលរដ្ឋជាច្រើនរូប ដែលបានបង្ហាញពីការគោរព និងការដឹងគុណយ៉ាងស្មោះស្ម័គ្រចំពោះវីរជនជាតិ ។
ការចូលរួមដ៏ផុសផុលនេះបានឆ្លុះបញ្ចាំងឱ្យឃើញពីការរួបរួម និងស្មារតីសាមគ្គីភាពជាតិក្នុងការចងចាំនូវគុណូបការៈរបស់វីរបុរសជាតិ៕
ចែករំលែកព័តមាននេះ