រាជធានីភ្នំពេញ ៖ ក្រសួងអប់រំយុវជន និងកីឡាបានស្នើឲ្យសមត្ថកិច្ចពាក់ព័ន្ធទាំងអស់ចាប់ខ្លួនម្ចាស់អាខោនឈ្មោះ«សេវាផ្សេងទៀត» ដើម្បីដាក់ទោសតាមផ្លូវច្បាប់ជាធរមាន ។ ការប្រកាសរបស់ក្រសួងអប់រំ បន្ទាប់ពីអាខោនហ្វេសប៊ុកឈ្មោះ «សេវាផ្សេងទៀត» បានបង្ហោះព័ត៌មានដែលចរិកបោកប្រាស់…
រាជធានីភ្នំពេញ ៖ ក្រសួងអប់រំយុវជន និងកីឡាបានស្នើឲ្យសមត្ថកិច្ចពាក់ព័ន្ធទាំងអស់ចាប់ខ្លួនម្ចាស់អាខោនឈ្មោះ«សេវាផ្សេងទៀត» ដើម្បីដាក់ទោសតាមផ្លូវច្បាប់ជាធរមាន ។ ការប្រកាសរបស់ក្រសួងអប់រំ បន្ទាប់ពីអាខោនហ្វេសប៊ុកឈ្មោះ «សេវាផ្សេងទៀត» បានបង្ហោះព័ត៌មានដែលចរិកបោកប្រាស់ និងបង្ខូចកេរ្តិ៍ឈ្មោះរបស់ក្រសួងអប់រំ យុវជន និងកីឡា ពាក់ព័ន្ធនឹងការធ្វើសញ្ញាបត្របាក់ឌុប និងបរិញ្ញាបត្រគ្រប់ផ្នែក ។
យោងតាមសេចក្តីប្រកាសព័ត៌មានរបស់ក្រសួងអប់រំចេញផ្សាយ កាលពីថ្ងៃទី២០ ខែឧសភា បញ្ជាក់ថា «ការបង្ហោះព័ត៌មានបែបនេះជាអំពើខុសច្បាប់ ដែលបំពានដល់សេចក្តីថ្លៃថ្នូរ និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក៏ដូចជា ការអនុវត្តកំណែទំរង់របស់ក្រសួងអប់រំ យុវជន និងកីឡា ក្នុងការលើកកម្ពស់គុណភាពអប់រំនៅកម្ពុជា ជាពិសេសប៉ះពាល់ដល់ស្មារតី និងការខិតខំរៀនសូត្ររបស់សិស្សានុសិស្ស និងនិស្សិតកម្ពុជា»។
ក្រសួងអប់រំ យុវជន និងកីឡាបាន និងកំពុងសហការជាមួយសមត្ថកិច្ចពាក់ព័ន្ធទាំងអស់ក្នុងការស្វែងរកជនដែលបង្ហោះព័ត៌មានខាងលើនេះ ដើម្បីចាត់វិធានការតាមផ្លូវច្បាប់ ។ ក្នុងនោះដែរក្រសួងក៏អំពាវនាវដល់សាធារណជន និងប្រព័ន្ធផ្សព្វផ្សាយគ្រប់ប្រភេទចូលរួមទប់ស្កាត់ការចែកចាយព័ត៌មាននេះតាមគ្រប់រូបភាព ព្រមទាំងសហការផ្តល់ព័ត៌មានជូនសមត្ថកិច្ចក្នុងការឈានទៅកំណត់មុខសញ្ញាជនដែលបានប្រព្រឹត្តអំពើខាងលើ ៕
ចែករំលែកព័តមាននេះ