សហរដ្ឋអាមេរិក-អុីរ៉ង់ ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៩ឧសភាបានគំរាមកម្ទេច អុីរ៉ង់ ខណៈភាពតានតឹងកំពុងតែកើនឡើង រវាងក្រុងវ៉ាស៊ិនតោននិងក្រុងតេហេរ៉ង់។ តាមTWITTERលោកត្រាំថ្លែងថា ប្រសិនបើ អុីរ៉ង់…
សហរដ្ឋអាមេរិក-អុីរ៉ង់ ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៩ឧសភាបានគំរាមកម្ទេច អុីរ៉ង់ ខណៈភាពតានតឹងកំពុងតែកើនឡើង រវាងក្រុងវ៉ាស៊ិនតោននិងក្រុងតេហេរ៉ង់។ តាមTWITTERលោកត្រាំថ្លែងថា ប្រសិនបើ អុីរ៉ង់ ចង់ប្រយុទ្ធនោះវានឹងជាទីបញ្ចប់ផ្លូវការរបស់ អុីរ៉ង់ ហើយ។ ចូរកុំគំរាមសហរដ្ឋអាមេរិកឲ្យសោះ។
ក្រុងវ៉ាស៊ិនតោនបានពង្រឹងទណ្ឌកម្មខាងសេដ្ឋកិច្ច និងពង្រឹងវត្តមានយោធាក្នុងតំបន់ឈូងសមុទ្រពែរ្ស៍ដោយនិយាយថា ខ្លាចអ អុីរ៉ង់ គំរាមកំហែងបណ្ដាផលប្រយោជន៍របស់ខ្លួន។ អុីរ៉ង់ និយាយថានោះជាសង្គ្រាមចិត្តសាស្ត្រនិងជាល្បិចកលនយោបាយមួយ។
ចំណែកពួកឧទ្ទាមយេម៉ែនហ៊ូធីទ្រទ្រង់ដោយ អុីរ៉ង់ ប្រកាសនាថ្ងៃទី១៩ឧសភាថា ការវាយប្រហាររបស់ពួកគេ ប្រឆាំងបណ្ដាទីតាំងរបស់ក្រុមហ៊ុនប្រេងកាតអារ៉ាប៊ីសាអូឌីតARAMCO កាលពីថ្ងៃទី១៤ឧសភា គ្រាន់ជាការចាប់ផ្ដើម នៃយុទ្ធនាការមួយ ប្រឆាំងគោលដៅយោធាប្រទេសនេះចំនួន៣០០កន្លែង។ នេះបើយោងតាមទីភ្នាក់ងារព័ត៌មានSABA ត្រួតត្រាដោយក្រុមស៊ីអុីតនោះ។ ទីភ្នាក់ងារព័ត៌មាននោះបញ្ជាក់ថា គោលដៅទាំងនេះរួមមាន បណ្ដាទីបញ្ចាការដ្ឋានយោធា និងបណ្ដាទីតាំងយោធាសំខាន់ៗនៅអេមីរ៉ាត់អារ៉ាប់រួម និងនៅអារ៉ាប៊ីសាអូឌីត ព្រមទាំងបណ្ដាមូលដ្ខានយោធាពួកគេនៅយេម៉ែន។
អារ៉ាប់ប៊ីសាអូឌីតចង់ចៀសវាងសង្គ្រាមមួយក្នុងតំបន់ប៉ុន្តែនិយាយថា ត្រៀមខ្លួនតបតវិញយ៉ាងខ្លាំងនិងប្រកបដោយការប្ដេជ្ញាចិត្ត ក្រោយការវាយប្រហារប្រឆាំងបណ្ដាទីតាំងប្រេងរបស់ខ្លួនមក។ ចំណែកកងនាវាចរណ៍ទី៥របស់អាមេរិក មានមូលដ្ឋាននៅប្រទេសបារ៉ែន រាយការណ៍នាថ្ងៃទី១៩ឧសភាថា បណ្ដាប្រទេសនៃក្រុមប្រឹក្សាសហប្រតិបត្តិការឈូងសមុទ្រCCG ជាអង្គការតំបន់មួយប្រមូលផ្ដុំដោយប្រទេស៦នៅជាប់ឈូងសមុទ្រពែរ្ស៍ បានចាប់ផ្ដើមកាលពីថ្ងៃ១៨ឧសភានូវការល្បាតក្នុងសមុទ្រ ដើម្បីពង្រឹងសន្តិសុខក្នុងតំបន់នោះ។
ទីបញ្ជាការដ្ឋានកងនាវាចរណ៍ទី៥របស់អាមេរិកបញ្ជាក់ថា បណ្ដាប្រទេសCCGបានបង្កើនជាពិសេស ការប្រាស្រ័យទាក់ទងគ្នានិងការសម្របសម្រួលគ្នា ដើម្បីទ្រទ្រង់ដល់កិច្ចសហប្រតិបត្តិខាងជើងទឹក ក្នុងតំបន់និងកិច្ចសហប្រតិបត្តិការខាងសន្តិសុខសមុទ្រក្នុងឈូងសមុទ្រពែរ្ស៍។
ការប្រកាសនោះកើតមានខណៈអារ៉ាប៊ីសាអូឌីតចោទប្រកាន់អីុរ៉ង់ថា ជាអ្នកនៅពីក្រោយការវាយប្រហារដោយដ្រូន២គ្រឿង បំពាក់គ្រឿងផ្ទុះប្រឆាំងបណ្ដាទីតាំងបូមប្រេងកាតអារ៉ាប៊ីសាអូឌីតកាលពីថ្ងៃទី១៤ឧសភា។
អារ៉ាប៊ីសាអូឌីតដែលកោះប្រជុំកំពូលជាបន្ទាន់ របស់បណ្ដាប្រទេសអារ៉ាប់នៅឈូងសមុទ្រ នាថ្ងៃទី៣០ឧសភានៅក្រុងDJEDDAHនោះ បានឲ្យដឹងនាថ្ងៃទី១៩ឧសភាថា ខ្លួនចង់ចៀសវាងជម្លោះមួយជាមួយអុីរ៉ង់ តែអះអាងថាត្រៀមតបតវិញយ៉ាងខ្លាំងក្លាបំផុតបើចាំបាច់។ អាជ្ញាធរអុីរ៉ង់បានបដិសេធថាពុំបានចូលរួមគ្នុងការវាយប្រហាដោយដ្រូន និងក្នុងអំពើវាយប្រហារវិច្ឆេទកម្ម ប្រឆាំងបណ្ដានាវាក្នុងឈូងសមុទ្រឡើយ៕
ចែករំលែកព័តមាននេះ