ទីក្រុងតេអេរ៉ង់៖ រដ្ឋមន្ត្រីការពារជាតិអ៊ីស្រាអែលអះអាងអ៊ីរ៉ង់ស្លាប់មេបញ្ជាការជាន់ខ្ពស់របស់ខ្លួនម្នាក់ទៀតហើយ។ គាត់ជាមេបញ្ជាការកងទ័ពជើងទឹកនៃឆ្មាំបដិវត្តឥស្លាមដែលស្លាប់នៅក្នុងការវាយប្រហារតាមអាកាស។ ការធ្វើឃាតឧត្ដមសេនីយ៍អាលីរេហ្សា ថាងស៊ីរី (Alireza Tangsiri) ធ្វើឡើងកាលពីយប់ថ្ងៃពុធឆ្លងចូលថ្ងៃព្រហស្បតិ៍ ហើយក៏មិនមែនប៉ងផ្ដាច់ផ្ដិលជីវិតតែឧត្ដមសេនីយ៍រូបនេះម្នាក់ទេ ប៉ុន្តែដាក់គោលដៅកម្ចាត់មន្ត្រីជាន់ខ្ពស់ដទៃទៀតនៃបញ្ជាការដ្ឋានកងទ័ពជើងទឹកផងដែរ។
រដ្ឋមន្ត្រីអ៊ីស្រាអែលថ្លែងបន្តទៀតថាបុរសដែលទទួលខុសត្រូវដោយផ្ទាល់ទៅលើប្រតិបត្តិការភេរវកម្មដាក់គ្រាប់មីនបណ្ដែតនៅលើទឹកសមុទ្រ និងបិទខ្ទប់ច្រកហ័រម៉ូសត្រូវបានក្រុមរបស់យើងកម្ទេចចោលហើយ។ ចាប់តាំងពីពេលសង្គ្រាមផ្ទុះឡើងដំបូងរហូតមកដល់ពេលនេះ មន្ត្រីជាន់ខ្ពស់ផ្នែកយោធា និងសន្តិសុខរបស់អ៊ីរ៉ង់ត្រូវអ៊ីស្រាអែលធ្វើឃាតជាហូរហែ។ ក្នុងនោះក៏មានមេដឹកនាំកំពូលអ៊ីរ៉ង់ លោកអាយ៉ាតូឡា អាលី ខាមេនី និងមេបញ្ជាការកំពូលនៃកងសន្តិសុខជាតិ លោកអាលី ឡារីចានី (Ali Larijani) ផងដែរ។
បើនិយាយអំពីចំនួនជនស៊ីវិលរបស់អ៊ីរ៉ង់វិញគឺស្លាប់រឹតតែច្រើនជាងនេះទៅទៀត។ រយៈពេលជិតមួយខែនៃសង្គ្រាម ជនជាតិអ៊ីរ៉ង់ស្លាប់១៩៣៧នាក់ ក្នុងនោះមានស្ត្រី និងកុមារសរុប៤៥២នាក់។ នេះបើយោងតាមការបញ្ជាក់របស់អនុរដ្ឋមន្ត្រីសុខាភិបាល លោកអាលី ចាហ្វារៀន (Ali Jafarian)។ បន្ថែមពីលើនេះ ប្រជាជនយ៉ាងតិច២៤៨០០នាក់រងរបួស។
លោកថាងស៊ីរីជាមេបញ្ជាការមានឈ្មោះបោះសំឡេង។ គាត់ជាមនុស្សសំខាន់ក្នុងការរៀបចំមនោគមន៍វិជ្ជានៃកងទ័ពជើងទឹក។ លទ្ធិនេះហើយដែលគេយកទៅប្រើប្រាស់សម្រាប់បិទខ្ទប់ច្រកហ័រម៉ូស។ គាត់ធ្លាប់កាន់តំណែងជាមេបញ្ជាការកងទ័ពជើងទឹកអស់ជាច្រើនឆ្នាំមកហើយ។ គាត់ក៏ជាអ្នកទទួលរ៉ាប់រងខាងការអភិវឌ្ឍដ្រូនសម្រាប់បម្រើឱ្យវិស័យយោធានៅលើលំហសមុទ្រផងដែរ។ ប៉ុន្មានសប្ដាហ៍ចុងក្រោយនេះ ឧត្ដមសេនីយ៍ថាងស៊ីរីប្រចាំការនៅទីក្រុងកំពង់ផែបានដា អាបាស់ (Bandar Abbas) ដើម្បីត្រួតពិនិត្យមើលការបិទខ្ទប់ច្រកហ័រម៉ូស៕ ប្រភព៖ អាល់ចាស៊ីរ៉ា់ (Al Jazeera) និងប្រភពដទៃទៀត
ចែករំលែកព័តមាននេះ