ទីក្រុងតូក្យូ៖ រដ្ឋាភិបាលជប៉ុនថ្ងៃនេះចាប់ផ្ដើមបញ្ចេញយកមកប្រើប្រាស់នូវប្រេងឆៅដែលបម្រុងទុក។ នេះជាផ្នែក១នៃកិច្ចខិតខំប្រឹងប្រែងដើម្បីរក្សាការផ្គត់ផ្គង់ដោយស្ថិរភាពនៅពេលសង្គ្រាមអ៊ីរ៉ង់នៅតែបន្តឆាបឆេះ រីឯច្រកហ័រម៉ូសក៏បន្តបិទខ្ទប់។ ជប៉ុនបញ្ចេញប្រេងយកមកប្រើលើកនេះមានបរិមាណច្រើនមិនធ្លាប់មាននៅក្នុងប្រវត្តិសាស្ត្ររបស់ខ្លួន។ ការបញ្ចេញប្រេងឆៅដែលអាចផ្គត់ផ្គង់តម្រូវការក្នុងស្រុកបាន៣០ថ្ងៃ ឬស្មើនឹង៨៥០០លានលីត្រនឹងត្រូវសន្មតថាប្រើអស់ត្រឹមចុងខែមេសា។ កាលពីសប្ដាហ៍មុន ជប៉ុនចាប់ផ្ដើមប្រើប្រាស់ប្រេងបម្រុងរបស់វិស័យឯកជនដែលអាចប្រើប្រាស់បានរយៈពេល១៥ថ្ងៃ។
គេព្រួយបារម្ភកាន់តែខ្លាំងឡើងៗអំពីការខ្វះខាតប្រេងនៅជប៉ុនព្រោះប្រទេសនេះពឹងផ្អែកខ្លាំងលើការនាំចូលប្រេងពីមជ្ឈិមបូព៌ារហូតដល់ជាង៩០%។ មូលហេតុដែលគេបារម្ភបែបនេះដោយសារអ៊ីរ៉ង់បិទខ្ទប់ច្រកហ័រម៉ូសដោយជោគជ័យ។ ដើម្បីដោះស្រាយបញ្ហារអាក់រអួលនៃការផ្គត់ផ្គង់ប្រេង រដ្ឋាភិបាលជប៉ុនសម្រេចបញ្ចេញប្រេងឆៅ៨០លានបារ៉ែលដែលអាចផ្គត់ផ្គង់តម្រូវការក្នុងស្រុកបាន៤៥ថ្ងៃ។
ប្រេងដែលបញ្ចេញពីស្តុកនោះនឹងរក្សាទុកនៅលើទីតាំង១១កន្លែងទូទាំងប្រទេសជប៉ុនដោយចាប់ផ្ដើមមុនគេពីប្រេងនៅមូលដ្ឋានគីគូម៉ា (Kikuma) នៃខេត្តអេហ៊ីម៉េ (Ehime)។ ប្រេងនេះបង្ហូរតាមបំពង់ទៅទីតាំងក្បែរនោះដើម្បីចម្រាញ់ដោយក្រុមហ៊ុនតៃយ៉ូ អយ ខូ (Taiyo Oil Co)។ ត្រឹមចុងខែមីនានេះ ជប៉ុននឹងបញ្ចេញប្រេងឆៅពីមូលដ្ឋានចំនួន៨ទៀត។ ប្រេងដែលបញ្ចេញពីស្តុកនេះភាគច្រើនជាប្រេងឆៅដែលត្រូវចម្រាញ់ជាសាំង និងម៉ាស៊ុត។
ប្រេងទាំងនេះនឹងត្រូវលក់ទៅឱ្យក្រុមហ៊ុនបោះដុំចំនួនបួនក្នុងតម្លៃសរុប៣៤០០លានដុល្លារ។ ក្រៅពីប្រេងបម្រុងទុករបស់រដ្ឋ និងឯកជន ជប៉ុនក៏នៅសល់ប្រេងបម្រុងទុកដោយក្រុមហ៊ុនចំនួនបីដែលស្តុកទុកនៅក្នុងស៊ីទែនធំៗ។ គិតត្រឹមចុងឆ្នាំ២០២៥ ប្រេងដែលបម្រុងទុករបស់ជប៉ុនមានចំនួន៤៧០លានបារ៉ែលដែលអាចផ្គត់ផ្គង់តម្រូវការក្នុងស្រុកបាន២៥៤ថ្ងៃ។ ក្នុងនោះ ប្រេងរបស់រដ្ឋអាចប្រើបាន១៤៦ថ្ងៃ និងប្រេងរបស់ឯកជនអាចប្រើបាន១០១ថ្ងៃ៕ ប្រភព៖ ក្យូដូ (Kyodo) និងប្រភពដទៃទៀត
ចែករំលែកព័តមាននេះ