សហរដ្ឋអាមេរិក-អុីរ៉ង់ ៖ ការកើនឡើងនៃភាពតានតឹងនៅតំបន់មជ្ឈឹមបូព៌ា រវាងសហរដ្ឋអាមេរិកនិងអុីរ៉ង់ កាលពីថ្ងៃទី១៥ឧសភានាំឲ្យមានបណ្ដាវិធានការប្រុងប្រយ័ត្នគួរឲ្យភ្ញាក់ផ្អើល ប៉ុន្តែគេពិនិត្យឃើញភាពមិនច្បាស់លាស់នានា និងភាពមិនប្រាកដនិយមនៃការគំរាមកំហែង។
ក្រោយរយៈពេល១០ថ្ងៃនៃការគំរាមគ្នាទៅវិញទៅមក អាមេរិកបានបង្កើនសកម្មភាពខាងការទូត ហើយដាក់ពង្រាយកងកម្លាំងយោធាក្នុងតំបន់ឈូងសមុទ្រពែរ្ស៍ ដែលនោះជាការសម្រេចជាក់ស្ដែងដំបូង ឆ្នើយតបចំពោះសភាពការណ៍ដែលមានគ្រោះថ្នាក់ខ្ពស់។ សហរដ្ឋអាមេរិកកាលពីថ្ងៃទី១៥ឧសភា បានហៅបុគ្គលិកមិនសំខាន់ទាំងអស់របស់ខ្លួននៅអុីរ៉ាក់ ឲ្យត្រឡប់ទៅស្រុកវិញ ចំណែកកងទ័ពអាល្លឺម៉ង់និងហូឡង់ បានផ្អាកប្រតិបត្តិការជួយបណ្ដុះបណ្ដាលខាងយោធាក្នុងប្រទេសនេះ។
ទទួលការចោទប្រកាន់ថាបង្កើតដោយខ្លួនឯងនូវភាពតានតឹង តាមរយៈការប្រកាសក្ដុងក្ដាំងទាំងនោះ រដ្ឋការលោកដូណាល់ត្រាំបានលើកហេតុផលពីការគំរាមកំហែងបន្ទាន់ភ្លាមៗនិងពិតប្រាកដ ដែលទាក់ទិនដោយផ្ទាល់ជាមួយអុីរ៉ង់។
អាមេរិកចាប់តាំងពីថ្ងៃទី៥ឧសភាមក បានបង្កើនការចោទប្រកាន់ធ្ងន់ធ្ងរ តែមិនច្បាស់លាស់ចំពោះអាជ្ញាធរក្រុងតេហេរ៉ង់ តែមិនបញ្ជាក់ច្បាស់ពីប្រភេទនៃការគំរាមកំហែងទាំងនេះឡើយ។ ព្រឹទ្ធសមាជិកគណបក្សប្រជាធិបតេយ្យ លោកBOB MENENDEZបរិហារនាថ្ងៃទី១៥ឧសភាថា រដ្ឋការលោកត្រាំពុំបានផ្ដល់ព័ត៌មានណាមួយដល់សភាឡើយ ពីបណ្ដាព័ត៌មានដែលយកធ្វើជាលេសសម្រាប់ សេចក្ដីសម្រេចរបស់ខ្លួន ក៏ដូចជាពីអ្វីដែលខ្លួនប្រុងធ្វើដែរ។
ចំពោះពាក្យពេចន៍របស់ឧត្ដមសេនីយអង់គ្លេសម្នាក់ នៃក្រុមចម្រុះអន្តរជាតិប្រឆាំងជីហាដនៅអុីរ៉ាក់និងនៅស៊ីរី ដែលបដិសេធរាល់ការកើនឡើងនៃការគំរាមកំហែងចេញមកពីបណ្ដាកងកម្លាំងស្និទ្ធអុីរ៉ង់ បាននាំឲ្យគេមានការសង្ស័យលើការសម្រេចទាំងឡាយរបស់អាមេរិក។ មនុស្សទាំងឡាយបានប្រៀបធៀបសភាពការណ៍ពេលនេះជាមួយអុីរ៉ង់ ទៅនឹងសភាពការណ៍ឆ្នាំ២០០៣ ពេលរដ្ឋការលោកចចដាប់ប៊លយូប៊ូស លើកទាំងបោកប្រាស់ពីវត្តមានអាវុធសម្លាប់រង្គាល យកធ្វើជាហេតុផលសម្រាប់ធ្វើអន្តរាគមន៍លុកលុយចូលអុីរ៉ាក់។
យោងតាមអ្នកទទួលខុសត្រូវខាងយោធាអាមេរិកជាច្រើនថា ព័ត៌មានស៊ើបការណ៍កត់សំគាល់ឃើញចលនាអាវុធ និងក្រុមស្និទ្ធអុីរ៉ង់នៅលើគោកនិងក្នុងសមុទ្រ ដើម្បីវាយប្រហារបណ្ដាផលប្រយោជន៍អាមេរិក ដូចជាបណ្ដាស្ថានទូត ស្ថានកុងស៊ុលឬកងទាហាន។ ទោះបីយ៉ាងណាតាមTWITTERលោកត្រាំរំលឹកពីការអំពាវនាវ ឲ្យមានការចរចាជាមួយអុីរ៉ង់។ លោកថាខ្ញុំប្រាកដក្នុងចិត្តដែលអុីរ៉ង់ចង់ចរចាឆាប់ៗ។
បណ្ដាអ្នកទទួលខុសត្រូវយោធាអុីរ៉ង់ថ្លែងកាលពីថ្ងៃទី១៥ឧសភាថា អុីរ៉ង់កំពុងតែស្ថិតនៅមាត់ជ្រោះនៃការប៉ះទង្គិចគ្នាទាំងស្រុង ជាមួយពួកសត្រូវហើយត្រៀមខ្លួនប្រឆាំងរាល់ការគំរាមកំហែង។ រដ្ឋមន្ត្រីការពារប្រទេសអុីរ៉ង់ លោកAMIR HATAMIបានសន្យាថា យើងនឹងយកឈ្នះលើពួកសត្រូវអាមេរិកនិងអុីស្រាអែល ហើយត្រៀមផែនការយោធា ក្នុងការប្រឈមមុខនឹងរាល់ការគំរាមកំហែងគ្រប់ប្រភេទ ព្រមទាំងការទាមទារជ្រុលហួសហេតុនានា។
ដោយចោទប្រកាន់អុីរ៉ង់ថារៀបចំការវាយប្រហារ ប្រឆាំងបណ្ដាផលប្រយោជន៍អាមេរិកនៅមជ្ឈឹមបូព៌ាមន្ទីរប៉ង់តាហ្គោនបានបញ្ជូនទៅកាន់តំបន់នោះ នូវនាវាផ្ទុកយន្តហោះ១គ្រឿងនិងបណ្ដានាវាចម្បាំងអម ព្រមទាំងបណ្ដាយន្តហោះទម្លាក់គ្រាប់បែកយុទ្ធសាស្ត្រB-52 និងប្រព័ន្ធមីស៊ីលការពារអាកាសPATRIOT៕
ចែករំលែកព័តមាននេះ