ទីក្រុងម៉ូស្គូ៖ លោកពូទីនថ្លែងកោតសរសើរលោកត្រាំចំពោះកិច្ចខិតខំប្រឹងប្រែងដោះស្រាយបញ្ហាដើម្បីស្វះស្វែងរកសន្តិភាពជូនពិភពលោក។ ប៉ុណ្ណឹងហើយលោកនៅតែមិនបានទទួលរង្វាន់ណូបែលសន្តិភាពនៅឡើយទេ។ នៅពេលអ្នកសារព័ត៌មានសួរថាតើលោកពូទីនយល់ថាជារឿងអយុត្តិធម៌ដែរឬទេដែលគណៈកម្មការរង្វាន់ណូបែលសុខចិត្តផ្ដល់រង្វាន់ជូនអ្នកផ្សេងក្រៅពីលោកត្រាំ? លោកពូទីនឆ្លើយតបថាលោកមិនមែនជាគណៈកម្មការផ្ដល់រង្វាន់នេះទេ។ ប៉ុន្តែចំពោះលោកវិញ លោកនឹងផ្ដល់រង្វាន់ជូនលោកត្រាំចំពោះកិច្ចខិតខំប្រឹងប្រែងដោះស្រាយបញ្ហានៅតំបន់ហ្កាហ្សា និងអ៊ុយក្រែន។
លោកពូទីនថ្លែងបន្តទៀតថាគាត់ (លោកត្រាំ) បានខិតខំច្រើនណាស់ដើម្បីដោះស្រាយវិបត្តិដ៏ស្មុគស្មាញដែលកើតឡើងជាច្រើនឆ្នាំ ឬជាច្រើនទសវត្សមកហើយ។ លោកពូទីនកត់សម្គាល់ថាបើតំបន់ហ្កាហ្សាអាចសម្រេចបានកិច្ចព្រមព្រៀងឈប់បាញ់គ្នាមែន វានឹងក្លាយជាសមិទ្ធផលដ៏ធំធេងជាប្រវត្តិសាស្ត្រ (របស់លោកត្រាំ)។
គ្រាន់តែស្ដាប់ឮសម្ដីនេះភ្លាម លោកត្រាំក៏បង្ហោះសារឆ្លើយតបតាមបណ្ដាញសង្គមដើម្បីអរគុណលោកពូទីន។ លោកក៏បានដកស្រង់យកពាក្យសម្ដីរបស់លោកពូទីនត្រង់ចំណុចដែលថាលោកបានខិតខំដោះស្រាយវិបត្តិពិភពលោក។ កាលពីយប់មិញ ជ័យលាភីរង្វាន់ណូបែលសន្តិភាពឆ្នាំ២០២៥ លោកស្រីម៉ាឆាដូ (Machado) ក៏បានសន្ទនាតាមទូរស័ព្ទជាមួយលោកត្រាំ និងសូមឧទ្ទិសពានរង្វាន់នេះជូនចំពោះប្រជាជនវេណេហ្ស៊ូអេឡា និងលោកត្រាំផងដែរ។
លោកពូទីនមិនបាននិយាយពាក់ព័ន្ធនឹងឈ្មោះរបស់លោកស្រីម៉ាឆាដូដែលត្រូវបានគណៈកម្មការពានរង្វាន់ណូបែលសន្តិភាពនៅទីក្រុងអូស្លូ ប្រទេសន័រវេ សម្រេចផ្ដល់រង្វាន់នោះទេ។ ប៉ុន្តែលោកនិយាយជាទូទៅដោយមិនបញ្ចេញឈ្មោះបុគ្គលណាទេថាគណៈកម្មរង្វាន់ណូបែលកាលពីពេលកន្លងមកច្រើនផ្ដល់រង្វាន់សម្រាប់អ្នកដែលមានស្នាដៃតិចតួចក្នុងការកសាងសន្តិភាពពិភពលោក។
ប្រតិកម្មក៏មានផងដែរពីសេតវិមានចំពោះការសម្រេចចិត្តមិនផ្ដល់រង្វាន់ណូបែលជូនលោកត្រាំ។ សេតវិមានកាលពីយប់មិញបានរិះគន់គណៈកម្មរង្វាន់ណូបែលថាជាស្ថាប័នដែលធ្វើការលម្អៀងដោយប្រកាន់រឿងនយោបាយច្រើនជាងគិតអំពីសន្តិភាព។ ជាក់ស្ដែងគណៈកម្មការនេះសុខចិត្តប្រគល់រង្វាន់ជូនសកម្មជនប្រជាធិបតេយ្យនៅវេណេហ្ស៊ូអេឡាជាជាងប្រគល់ជូនលោកត្រាំ។
លោកត្រាំធ្លាប់បាននិយាយដោយឥតលាក់លៀមតាំងពីយូរមកហើយថាលោកចង់បានរង្វាន់ណូបែលជាខ្លាំង។ លោកបានអះអាងពីស្នាដៃដែលសម្រេចបាននៅក្នុងការបិទបញ្ចប់ជម្លោះជាច្រើននៅលើសាកលលោក។ សូម្បីតែនៅពេលចូលរួមនៅក្នុងមហាសន្និបាតអង្គការសហប្រជាជាតិ លោកក៏បានលើកឡើងអំពីបញ្ហានេះផងដែរ។ មន្ត្រីសេតវិមានម្នាក់បានប្រាប់ទូរទស្សន៍ស៊ីប៊ីអែស (CBS) ថាលោកត្រាំបានហៅទូរស័ព្ទទៅលោកស្រីម៉ាឆាដូដើម្បីអបអរសាទរចំពោះការទទួលបានរង្វាន់ណូបែលសន្តិភាព។ លោកយល់ថាលោកស្រីស័ក្ដិសមនឹងទទួលបានរង្វាន់នេះ។ នេះបើយោងតាមការផ្សាយរបស់អេភី (AP), ប៊ីប៊ីស៊ី (BBC) និងប្រភពដទៃទៀត៕
ចែករំលែកព័តមាននេះ