ទីក្រុងយេរូសាឡឹម៖ យោធាអ៊ីស្រាអែលប្រកាសថាចំណាប់ខ្មាំង២០នាក់ដែលនៅរស់ និងដែលធ្លាប់ស្ថិតក្រោមការបង្ខាំងទុកពីក្រុមហាម៉ាស់នោះឥឡូវនេះត្រូវបានដោះលែងវិញហើយ ហើយបានប្រគល់តាមរយៈកាកបាទក្រហមអន្តរជាតិ។ អ៊ីស្រាអែលជឿជាក់ថានៅក្នុងចំណោមចំណាប់ខ្មាំងនៅសល់៤៨នាក់ មានតែម្ភៃនាក់ប៉ុណ្ណោះដែលនៅរស់។ ក្រៅពីនេះអ៊ីស្រាអែលជឿជាក់ថាបានស្លាប់អស់ហើយ។
យោធាអ៊ីស្រាអែលថ្លែងថាចំណាប់ខ្មាំងដែលដោះលែងថ្ងៃនេះត្រូវគេបញ្ជូនបន្តទៅដល់ដៃអ៊ីស្រាអែលគ្រប់ចំនួនអស់ហើយ។ ពួកគេអាចវិលត្រឡប់មកវិញបន្ទាប់ពីអ៊ីស្រាអែល និងហាម៉ាស់យល់ព្រមទទួលយកបទឈប់បាញ់ និងដូរចំណាប់ខ្មាំង ជាមួយអ្នកទោស។ នេះជាការអនុវត្តដំណាក់កាលទីមួយនៃផែនការសន្តិភាពម្ភៃចំណុចរបស់លោកដូណាល់ត្រាំ។
លោកត្រាំកំពុងបំពេញទស្សនកិច្ចនៅអ៊ីស្រាអែល និងត្រៀមឡើងថ្លែងសុន្ទរកថានៅក្នុងរដ្ឋសភាអ៊ីស្រាអែល។ បន្ទាប់មក លោកនឹងបន្តដំណើរទៅប្រទេសអេហ្ស៊ីបដើម្បីចូលរួមកិច្ចប្រជុំកំពូលដើម្បីស្វែងរកសន្តិភាពនៅហ្កាហ្សា និងមជ្ឈិមបូព៌ា។ យោងតាមកិច្ចព្រមព្រៀងនោះ ក្រុមហាម៉ាស់យល់ព្រមដោះលែងចំណាប់ខ្មាំង និងប្រគល់សាកសពចំណាប់ខ្មាំងដែលនៅសេសសល់ទាំងអស់មួយកញ្ចប់ធំតែម្ដង។ ជាថ្នូរត្រឡប់មកវិញ អ៊ីស្រាអែលយល់ព្រមដោះលែងអ្នកជាប់ឃុំ និងទណ្ឌិតជនជាតិប៉ាឡេស្ទីនជាច្រើននាក់។
ក្រុមហាម៉ាស់បានចេញសេចក្ដីប្រកាសមួយបញ្ជាក់អំពីជំហររបស់ខ្លួនថាខ្លួននៅតែគោរពយ៉ាងខ្ជាប់ខ្ជួនទៅតាមស្មារតីនៃកិច្ចព្រមព្រៀងនោះជានិច្ច ដរាបណាអ៊ីស្រាអែលគោរពកិច្ចព្រមព្រៀងនោះដែរ។ ឥឡូវនេះ ពិភពលោកកំពុងគិតគូរអំពីអ្វីដែលត្រូវធ្វើជាបន្តទៀត។ នៅមានបញ្ហាធំៗជាច្រើនដែលត្រូវធ្វើ។ ក្រុមហាម៉ាស់ធ្លាប់ប្រកាសរួចហើយថានៅក្នុងចំណោមផែនការសន្តិភាពរបស់លោកត្រាំនោះ ខ្លួនមិនទាន់ឯកភាព១០០%ទេព្រោះត្រូវការពិភាក្សាជាមួយក្រុមប៉ាឡេស្ទីនគ្រប់និន្នាការ។ ខាងលើនេះជាការផ្សាយរបស់ទូរទស្សន៍អឹនអេចខេ និងប្រភពដទៃទៀត៕
ចែករំលែកព័តមាននេះ