រាជធានីភ្នំពេញ ៖ សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា បានគូសបញ្ជាក់ថា កម្ពុជាត្រៀមធ្វើការយ៉ាងជិតស្និទ្ធ ជាមួយបណ្តាដៃគូពាក់ព័ន្ធ ដើម្បីកសាងអនាគតមួយសម្រាប់ស្ត្រី…
រាជធានីភ្នំពេញ ៖ សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា បានគូសបញ្ជាក់ថា កម្ពុជាត្រៀមធ្វើការយ៉ាងជិតស្និទ្ធ ជាមួយបណ្តាដៃគូពាក់ព័ន្ធ ដើម្បីកសាងអនាគតមួយសម្រាប់ស្ត្រី និងក្មេងស្រី អាចរស់នៅដោយភាពថ្លៃថ្នូរ សមភាព និងមានឱកាសគ្រប់ៗគ្នា។
សម្តេចប្រធានរដ្ឋសភាកម្ពុជា បានអញ្ជើញថ្លែងសុន្ទរកថា ស្តីពីវឌ្ឍនភាព នៃការរីកចម្រើនវិស័យសមភាពយេនឌ័រ នៅក្នុងប្រទេសកម្ពុជា ជម្រាបជូនកិច្ចប្រជុំថ្នាក់ដឹកនាំពិភពលោក ស្តីពីស្ត្រី នៅក្នុងទីក្រុងប៉េកាំង សាធារណរដ្ឋប្រជាមានិតចិន នៅរសៀលថ្ងៃទី១៣ ខែតុលាឆ្នាំ២០២៥ សម្តេចថា ចាប់តាំងពីឆ្នាំ១៩៩៥ មកប្រទេសកម្ពុជា បានអនុវត្ត នូវសេចក្តីថ្លែងការណ៍ និងផែនការសកម្មភាពទីក្រុងប៉េកាំង ដែលជាគោលការណ៍ណែនាំមួយនៅក្នុងការអភិវឌ្ឍជាតិ។ “ស្ត្រី គឺជាឆ្អឹងខ្នងនៃសេដ្ឋកិច្ច និងសង្គម” ។
ការថ្លែងរបស់សម្តេចប្រធានរដ្ឋសភាកម្ពុជា នៅចំពោះមុខថ្នាក់ដឹកនាំស្ថាប័ននីតិប្បញ្ញត្តិ នីតិប្រតិបត្តិ ភ្នាក់ងារអង្គការសហប្រជាជាតិ ដៃគូអភិវឌ្ឍន៍ និងអង្គការអន្តរជាតិពាក់ព័ន្ធ មកពីបណ្តាប្រទេសជាង១០០ ពីគ្រប់ទ្វីបទាំង៥ នៃពិភពលោក ។
សម្តេចបានគូសបញ្ជាក់ថា ៖ “កម្ពុជាត្រៀមខ្លួនជាស្រេច ក្នុងការធ្វើការដោយជិតស្និទ្ធជាមួយបណ្តាដៃគូពាក់ព័ន្ធទាំងអស់ ដើម្បីកសាងអនាគតមួយ ដែលគ្រប់ស្ត្រីនិងក្មេងស្រី អាចរស់នៅប្រកបដោយភាពថ្លៃថ្នូរ សមភាព និងមានឱកាសគ្រប់ៗគ្នា” ។
សម្តេចរដ្ឋសភាធិបតី ឃួន សុដារី បានគូសបញ្ជាក់ថា កម្ពុជាបានជំរុញភាពស្នើគ្នា នៃយេនឌ័រនៅក្នុងកម្រិតបឋមសិក្សា និងមធ្យមសិក្សា ហើយក្មេងស្រីជាច្រើន បានបន្តការសិក្សានៅកម្រិតឧត្តមសិក្សាផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ថែមទៀតផង។ អត្រាមរណភាពមាតា បានធ្លាក់ចុះពី ៤៣៧ ក្នុង ១០០,០០០ កំណើតរស់នៅឆ្នាំ២០០០ មកនៅត្រឹម ១៥៤ ក្នុងឆ្នាំ២០២២។ អំពើហិ,ង្សាក្នុងគ្រួសារបានធ្លាក់ចុះពី២៩ ភាគរយ ក្នុងឆ្នាំ២០១៤ មកនៅត្រឹម១៤ ភាគរយ ក្នុងឆ្នាំ២០២១ ដោយសារតែយើងមានច្បាប់ និងសេវាគាំទ្រផ្តោតលើជនរងគ្រោះ។ ស្ត្រីជាច្រើនបានក្លាយជាអ្នកដឹកនាំក្នុងការអភិវឌ្ឍសហគ្រិន និងសហគមន៍ ដោយទទួលបាននូវការងារ និងហិរញ្ញវត្ថុកាន់តែច្រើនឡើង។ ស្ត្រីជាមន្ត្រីរាជការមានប្រមាណ៤២ ភាគរយ ហើយក្នុងនោះ ២៨ ភាគរយមានមុខតំណែងជាអ្នកដឹកនាំ។ ស្ត្រីកម្ពុជាជាង ៨០០ នាក់បានបំពេញការងារប្រកបដោយមោទនភាពនៅក្នុងបេសកកម្មថែរក្សាសន្តិភាព ក្រោមក្របខណ្ឌនៃអង្គការសហប្រជាជាតិ។
សូមជម្រាបថា កិច្ចប្រជុំថ្នាក់ដឹកនាំពិភពលោកស្តីពី ស្ត្រី ប្រារព្ធធ្វើឡើងក្រោមមូលបទស្តីពី “អនាគតរួមគ្នាតែមួយ៖ ដំណើរការថ្មី និងលឿនសម្រាប់ការអភិវឌ្ឍន៍ស្ត្រីលើគ្រប់វិស័យ”។ កិច្ចប្រជុំដ៏សំខាន់និងជាព្រឹត្តិការណ៍ប្រវត្តិសាស្ត្រនេះ មិនត្រឹមតែដើម្បីប្រារព្ធអបអរសាទរខួបលើកទី៣០ នៃ សេចក្តីថ្លែងការណ៍ និងផែនការសកម្មភាពទីក្រុងប៉េកាំង ដែលត្រូវបានអនុម័តនៅឆ្នាំ១៩៩៥ប៉ុណ្ណោះទេ។ ប៉ុន្តែជាឱកាសមួយដ៏ប្រសើរក្នុងការពិនិត្យពីវឌ្ឍនភាព និងការប្រឈមនានា ដែលស្តែងចេញពីការអនុវត្តសេចក្តីថ្លែងការណ៍ និងផែនការសកម្មភាពទីក្រុងប៉េកាំង ហើយត្រូវបានចាត់ទុកជាមូលដ្ឋានគ្រឹះ និងប្រព័ន្ធស្តង់ដារជាសកលសម្រាប់ជំរុញសមភាពយេនឌ័រ បង្កើនភាពអង់អាចដល់ស្ត្រី និងការពារសិទ្ធិរបស់ស្ត្រីនិងក្មេងស្ត្រីនៅទូទាំពិភពលោក។
សម្តេចប្រធានរដ្ឋសភាបានលើកឡើងថា ជាការពិតណាស់ ទោះបីសម្រេចបានសមិទ្ធផលគួរជាទីមោទនៈយ៉ាងណាក្តី ក៏នៅមានបញ្ហាប្រឈមជាច្រើន ចាំបាច់ត្រូវបន្តខិតខំបន្ថែមទៀត ដើម្បីជួយឱ្យស្ត្រីនិងក្មេងស្រីសម្រេចបាននូវសក្តានុពលពេញលេញរបស់ពួកគេ។ សម្តេចរដ្ឋសភាធិបតី បានអំពាវនាវថា ក្រោមមូលបទ “អនាគតរួមគ្នាតែមួយ” កម្ពុជាសូមអំពាវនាវឱ្យមាន៖ ការបង្កើតបរិយាកាសល្អ ទាំងថ្នាក់ជាតិ និងអន្តរជាតិ ដើម្បីពន្លឿនការអនុវត្តសេចក្តីថ្លែងការណ៍ និងផែនការសកម្មភាពទីក្រុងប៉េកាំងបន្តទៀត។ការផ្លាស់ប្តូរជាប្រព័ន្ធ ដើម្បីជំរុញសមភាព ក្នុងការទទួលបាន និងលទ្ធផលសម្រេចបាន សម្រាប់ស្ត្រី និងក្មេងស្រី។ ការផ្តល់សិទ្ធអំណាចដល់ស្ត្រី និងក្មេងស្រី តាមរយៈការអភិវឌ្ឍវិជ្ជាជីវៈ លើកកម្ពស់ការទទួលបាននូវផ្នែកបច្ចេកវិទ្យា និងនវានុវត្តន៍ រួមទាំងបញ្ញាសប្បនិម្មិត (AI) ជាដើម៕
ចែករំលែកព័តមាននេះ