ទីក្រុងម៉ូស្គូ៖ រដ្ឋមន្ត្រីការបរទេសរុស្ស៊ី លោកឡាវរ៉ូស (Lavrov) ថ្លែងថាផែនការសន្តិភាពរបស់លោកត្រាំដែលដាក់ចេញមកដើម្បីបិទបញ្ចប់ជម្លោះរវាងអ៊ីស្រាអែល និងប៉ាឡេស្ទីននោះអាចជួយបានត្រឹមដោះស្រាយបញ្ហានៅជ្រោយហ្កាហ្សាតែប៉ុណ្ណោះ។ ប៉ុន្តែផែនការបង្កើតរដ្ឋប៉ាឡេស្ទីនហាក់ដូចជាមានលក្ខណៈច្បោលៗពេក។ លោកឡាវរ៉ូសយល់ថាផែនការរបស់លោកត្រាំគួរបញ្ជាក់ឱ្យបានច្បាស់ថាតើតំបន់វេសស្បេងគួរគិតយ៉ាងដូចម្ដេចទៅថ្ងៃអនាគត។
លោកថ្លែងបន្តទៀតថាយើងបានកត់សម្គាល់ឃើញថាផែនការសន្តិភាពរបស់លោកដូណាល់ត្រាំនិយាយតែអំពីជ្រោយហ្កាហ្សាមួយមុខប៉ុណ្ណោះ។ លោកទទួលស្គាល់ថាផែនការនោះនិយាយអំពីផែនការបង្កើតរដ្ឋប៉ាឡេស្ទីនពិតមែនហើយ។ ក៏ប៉ុន្តែនិយាយនៅក្នុងលក្ខខណ្ឌធំទូលាយពេក។ លោកថ្លែងដូច្នេះនៅចំពោះមុខអ្នកសារព័ត៌មានដែលមកពីបណ្ដាប្រទេសអារ៉ាប់។
លោកឡាវរ៉ូសយល់ថាវាជារឿងចាំបាច់បំផុតដែលត្រូវតែអង្កន់ឱ្យល្អិតនូវវិធីសាស្ត្រដោះស្រាយបញ្ហាទាំងនេះរួមទាំងការកំណត់និយមន័យឱ្យបានច្បាស់ថាតើតំបន់វេសស្បេងទៅថ្ងៃមុខនឹងទៅជាយ៉ាងណា។ នេះជាការបញ្ជាក់ជំហររបស់ទីក្រុងម៉ូស្គូច្បាស់ជាងពេលណាៗទាំងអស់ចំពោះផែនការសន្តិភាពទាំង២០ចំណុចរបស់លោកត្រាំដែលរុស្ស៊ីយល់ថានៅមានចំណុចខ្វះចន្លោះជាច្រើន ហើយការខ្វែងគំនិតគ្នាក៏មានច្រើនផងដែរ។
ទោះបីផែនការសន្តិភាពនេះមិនទាន់ឯកភាពគ្នា១០០%ក្ដី លោកឡាវរ៉ូសសង្ឃឹមថាចំណុចព្រមព្រៀងគ្នារវាងអ៊ីស្រាអែល និងហាម៉ាស់(ដែលគេចាត់ទុកថាជាកិច្ចព្រមព្រៀងដំណាក់កាលទី១នៃផែនការសន្តិភាពទាំងម្ភៃចំណុចនោះ) នឹងត្រូវភាគីទាំង២អនុវត្តឱ្យបានពេញលេញ។ លោកពូទីនធ្លាប់និយាយកាលពីសប្ដាហ៍មុនថារុស្ស៊ីត្រៀមចូលរួមចំណែកក្នុងការស្វែងរកសន្តិភាព។
ថ្ងៃនេះ ក្រុមហាម៉ាស់ប្រគល់ចំណាប់ខ្មាំង៧នាក់ (នៅក្នុងចំណោមចំណាប់ខ្មាំងនៅរស់២០នាក់) ទៅឱ្យកាកបាទក្រហមអន្តរជាតិដើម្បីឱ្យកាកបាទក្រហមបញ្ជូនបន្តទៅឱ្យអ៊ីស្រាអែល។ នេះជាការបោះជំហានដ៏សំខាន់មួយក្នុងការបិទបញ្ចប់សង្គ្រាមនៅហ្កាហ្សាដោយអនុវត្តតាមកិច្ចព្រមព្រៀងនៃបទឈប់បាញ់ដែលសម្របសម្រួលដោយលោកត្រាំ។ នៅល្ងាចថ្ងៃចន្ទ លោកបានធ្វើដំណើរទៅដល់ប្រទេសអ៊ីស្រាអែល និងត្រៀមថ្លែងសុន្ទរកថានៅក្នុងរដ្ឋសភាអ៊ីស្រាអែល។
ប្រភពខ្លះថាសាកសពចំណាប់ខ្មាំងមួយចំនួននៅក្នុងចំណោមសពចំណាប់ខ្មាំង២៨នាក់ រួមទាំងសាកសពមនុស្ស២នាក់ទៀតដែលគេមិនស្គាល់អត្តសញ្ញាណក៏ត្រូវក្រុមហាម៉ាស់ប្រគល់ទៅឱ្យកាកបាទក្រហមនៅថ្ងៃចន្ទផងដែរ។ ជាថ្នូរត្រឡប់មកវិញ អ៊ីស្រាអែលដោះលែងអ្នកជាប់ឃុំ និងទណ្ឌិតជនជាតិប៉ាឡេស្ទីនជិត២ពាន់នាក់។
នេះជាការអនុវត្តដំណាក់កាលទី១នៃបទឈប់បាញ់ដូចដែលភាគីទាំង២បានព្រមព្រៀងគ្នានៅប្រទេសអេហ្ស៊ីបកាលពីសប្ដាហ៍មុន។ នៅអេហ្ស៊ីប លោកត្រាំ និងថ្នាក់ដឹកនាំប្រទេសដទៃទៀតសរុបជាង២០នាក់នឹងចូលរួមកិច្ចប្រជុំពិសេសមួយនៅដើម្បីដាក់ចេញវិធានការមួយចំនួនសំដៅធានាស្ថិរភាពរយៈពេលយូរអង្វែងនៅមជ្ឈិមបូព៌ា។
ដើម្បីឈានទៅសម្រេចបានសន្តិភាពដ៏ពិតប្រាកដមួយទាមទារការប្ដេជ្ញាចិត្តជាសាកល។ គេជឿជាក់ថានៅក្នុងកិច្ចប្រជុំនោះមុខជានឹងមានការប្ដេជ្ញាចិត្តហើយ។ ប៉ុន្តែផែនការម្ភៃចំណុចរបស់លោកត្រាំនៅមានរឿងវែងឆ្ងាយទៀតដែលត្រូវនិយាយគ្នា។ នៅក្នុងចំណោមលក្ខខណ្ឌដ៏ស្មុគស្មាញទាំងនោះមានដូចជាការគ្រប់គ្រងតំបន់ហ្កាហ្សា, ការទម្លាក់អាវុធចុះរបស់ក្រុមហាម៉ាស់ និងការបិទបញ្ចប់ការគ្រប់គ្រងរបស់យោធាអ៊ីស្រាអែលទៅលើតំបន់ហ្កាហ្សា។
ភាគីទាំង២កំពុងប្រទាញប្រទង់គ្នា។ អ៊ីស្រាអែលថាបើហាម៉ាស់មិនទម្លាក់អាវុធចុះទេ ខ្លួនក៏មិនដកថយទាំងស្រុងពីហ្កាហ្សាដែរ។ មូលហេតុដើម្បីការពារសន្តិសុខជាតិរបស់ខ្លួន។ ម៉្យាងទៀត អ៊ីស្រាអែលសូមប្រកាសដាច់ខាតហើយមិនអនុញ្ញាតឱ្យហាម៉ាស់វិលមកគ្រប់គ្រងតំបន់ហ្កាហ្សាវិញទេ។ ចំណែកហាម៉ាស់ថាបើអ៊ីស្រាអែលមិនព្រមដកថយទាំងស្រុងពីហ្កាហ្សាទេ ខ្លួនក៏មិនទម្លាក់អាវុធចុះដែរ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ