បរទេស ៖ តម្លៃមាសអន្តរជាតិបានហក់ឡើងដល់កម្រិតខ្ពស់បំផុត នៅថ្ងៃទី១៣ ខែតុលា ឆ្នាំ២០២៥ ដោយសារតម្រូវការកើនឡើងខ្លាំង ចំពេលមានភាពតានតឹងពាណិជ្ជកម្មសាជាថ្មីរវាងសហរដ្ឋអាមេរិក និងចិន បូករួមទាំងការរំពឹងទុកនៃការកាត់បន្ថយអត្រាការប្រាក់របស់ធនាគារកណ្តាលអាមេរិក…
បរទេស ៖ តម្លៃមាសអន្តរជាតិបានហក់ឡើងដល់កម្រិតខ្ពស់បំផុត នៅថ្ងៃទី១៣ ខែតុលា ឆ្នាំ២០២៥ ដោយសារតម្រូវការកើនឡើងខ្លាំង ចំពេលមានភាពតានតឹងពាណិជ្ជកម្មសាជាថ្មីរវាងសហរដ្ឋអាមេរិក និងចិន បូករួមទាំងការរំពឹងទុកនៃការកាត់បន្ថយអត្រាការប្រាក់របស់ធនាគារកណ្តាលអាមេរិក (Fed)។
តម្លៃមាសអន្តរជាតិបានកើនឡើង ១,៥% ដល់កម្រិតខ្ពស់បំផុត ៤ ០៧៨ដុល្លារអាមេរិកក្នុង១អោន ឬ ៤ ៩១៣ដុល្លារក្នុង១តម្លឹង គិតត្រឹមម៉ោង ១២:៣០នាទីថ្ងៃត្រង់ (ម៉ោងនៅកម្ពុជា)។
ប្រធានាធិបតីអាមេរិកលោក ដូណាល់ ត្រាំ (Donald Trump) កាលពីថ្ងៃទី១០ ខែតុលា កន្លងទៅ បានគំរាមដាក់ពន្ធ ១០០% លើទំនិញចិននាំចូលមកកាន់សហរដ្ឋអាមេរិក និងបានប្រកាសការត្រួតពិនិត្យការនាំចេញថ្មីលើកម្មវិធីសំខាន់ៗត្រឹមថ្ងៃទី១ ខែវិច្ឆិកា ដើម្បី ឆ្លើយតបទៅនឹងការទប់ស្កាត់របស់ប្រទេសចិន តាមរយៈការរឹតបន្តឹងការនាំចេញធនធានរ៉ែកម្រសំខាន់ៗរបស់ខ្លួន។
លោក Kyle Rodda អ្នកវិភាគពៅគេហទំព័រ Capital.com បានលើកឡើងថា «ជារឿងគួរឱ្យចាប់អារម្មណ៍ខ្លាំងណាស់ ព្រោះការអភិវឌ្ឍន៍ជាវិជ្ជមាននៅមជ្ឈិមបូព៌ានាពេលថ្មីៗនេះ គឺជាការធ្លាក់ចុះនៃទីផ្សារមាសអន្តរជាតិ ប៉ុន្តែឥឡូវនេះ យើងមានហានិភ័យឡើងវិញដោយសារតែភាពតានតឹងពាណិជ្ជកម្មរវាងសហរដ្ឋអាមេរិក និងប្រទេសចិន។
តម្លៃមាសអន្តរជាតិនៅឆ្នាំនេះ បានកើនឡើង ៥៣% ដែលត្រូវបានជំរុញដោយហានិភ័យភូមិសាស្ត្រនយោបាយ រួមជាមួយការសម្រុកទិញចូលសម្រាប់ជាទុនបម្រុងរបស់បណ្តាធនាគារកណ្តាលជុំវិញពិភពលោក មូលនិធិជួញដូរប្រាក់ ETF ក៏ដូចជាការរំពឹងទុកនៃការកាត់បន្ថយអត្រាការប្រាក់ដោយ Fed និងភាពមិនប្រាកដប្រជាសេដ្ឋកិច្ចកើតចេញពីពន្ធគយផងដែរ។
បច្ចុប្បន្នបណ្តាវិនិយោគិនកំពុងតែកំណត់ការកាត់បន្ថយអត្រាការប្រាក់ ២៥ពិន្ទុមូលដ្ឋាននៅក្នុងខែតុលា ២៥ពិន្ទុផ្សេងទៀតក្នុងខែធ្នូ។ លោក Jerome Powell ប្រធាន Fed នឹងឡើងថ្លែងសុន្ទរកថានៅក្នុងកិច្ចប្រជុំប្រចាំឆ្នាំរបស់សមាគមជាតិសម្រាប់សេដ្ឋកិច្ចពាណិជ្ជកម្ម នៅថ្ងៃអង្គារសប្តាហ៍ ហើយនៅទីនោះ លោកអាចផ្តល់នូវគន្លឹះនៃការកាត់បន្ថយអត្រាការប្រាក់ថ្មីផងដែរ។
តម្លៃមាសអន្តរជាតិកើនឡើង ស្របពេលដែលការបិទរដ្ឋាភិបាលសហរដ្ឋអាមេរិកកំពុងបន្ត ដែលបានចាប់ផ្តើមតាំងពីថ្ងៃទី១ ខែតុលា ឆ្នាំ២០២៥ បណ្តាលឱ្យមានការបញ្ឍប់ និងផ្អាកបុគ្គលិករដ្ឋាភិបាលសហព័ន្ធរាប់ម៉ឺននាក់ ហើយថែមទាំងបានពន្យារពេលការចេញផ្សាយទិន្នន័យសេដ្ឋកិច្ចនៅក្នុងវិស័យសំខាន់ៗផងដែរ៕ ប្រភព ៖ Reuters
ចែករំលែកព័តមាននេះ