កម្ពុជា ថៃ អាមេរិក និងម៉ាឡេស៊ី ប្រជុំចតុភាគីនៅម៉ាឡេស៊ី រឿងព្រំដែនកម្ពុជា-ថៃ
រាជធានីភ្នំពេញ ៖ នៅថ្ងៃទី១២ ខែតុលា ឆ្នាំ២០២៥ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា…
រាជធានីភ្នំពេញ ៖ នៅថ្ងៃទី១២ ខែតុលា ឆ្នាំ២០២៥ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា បានចូលរួមកិច្ចប្រជុំ ចតុភាគី (កម្ពុជា ថៃ ម៉ាឡេស៊ី និងសហរដ្ឋអាមេរិក) តាមការអញ្ជើញរបស់នាយករដ្ឋមន្ត្រីម៉ាឡេស៊ី ។ អង្គប្រជុំនេះបានបង្ហាញពី បំណងប្រាថ្នារួម ក្នុងការរក្សាសន្តិភាព និងស្ថិរភាពរវាងកម្ពុជា-ថៃ និងក្នុងតំបន់ទាំងមូល ដោយបញ្ជាក់ពីការប្តេជ្ញាចិត្តដោះស្រាយជម្លោះដោយ សន្តិវិធី និងគោរពច្បាប់អន្តរជាតិ ។ នេះបើតាមតាមផេកក្រសួងការបរទេស នាថ្ងៃទី១៣ ខែតុលានេះ ។
នៅក្នុងជំនួបពិភាក្សាចតុភាគីមានអាមេរិក ម៉ាឡេស៊ី ថៃ ប្រមុខការទូតរបស់កម្ពុជា បានគូសបញ្ជាក់យ៉ាងម៉ឹងម៉ាត់ថា កម្ពុជាគ្មានបំណងចង់យកអ្វី ដែលមិនមែនជារបស់កម្ពុជាទេ ប៉ុន្តែកម្ពុជាក៏នឹងមិនទទួលយកការបាត់បង់អ្វីដែលជាកម្មសិទ្ធិរបស់ខ្លួនដែរ ។
ការអះអាងរបស់ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសខ្មែរ បែបនេះក្នុងឱកាសអញ្ជើញចូលរួមកិច្ចប្រជុំចតុភាគីរវាងប្រទេសកម្ពុជា ថៃ ម៉ាឡេស៊ី និងសហរដ្ឋអាមេរិក តាមការអញ្ជើញរបស់លោក Dato’ Seri Anwar Bin Ibrahim នាយករដ្ឋមន្ត្រីនៃប្រទេសម៉ាឡេស៊ី កាលពីថ្ងៃទី១២ ខែតុលា ឆ្នាំ២០២៥ ។
ឯកឧត្តមលើកឡើងថា អង្គប្រជុំបានបង្ហាញពីបំណងប្រាថ្នារួម ដើម្បីសន្តិភាព និងស្ថិរភាពរវាងកម្ពុជា និងថៃ ក៏ដូចជា នៅក្នុងតំបន់ទាំងមូល ។ ការណ៍នេះ បានបញ្ជាក់ជាថ្មីនូវការប្តេជ្ញាចិត្តយ៉ាងមុតមាំ ក្នុងការដោះស្រាយជម្លោះដោយសន្តិវិធី ការមិនប្រើកម្លាំង និងការគោរពច្បាប់អន្តរជាតិ ។
ឯកឧត្តមឧបនាយករដ្ឋមន្ត្រីការបរទេសកម្ពុជា បានកោតសរសើរដ៏ស្មោះស្ម័គ្រចំពោះប្រទេសម៉ាឡេស៊ី និងសហរដ្ឋអាមេរិកលើកិច្ចខិតខំប្រឹងប្រែង ប្រកបដោយន័យស្ថាបនា ក្នុងការសម្របសម្រួលកិច្ចប្រជុំចតុភាគីនេះ ។ ឧបនាយករដ្ឋមន្ត្រីគូសបញ្ជាក់ពីសារៈសំខាន់នៃការធានាការអនុវត្តឱ្យបានពេញលេញ និងមានប្រសិទ្ធភាពលើលក្ខខណ្ឌបទឈប់បាញ់ និងកិច្ចព្រមព្រៀងទាំងអស់ដែលសម្រេចបានក្រោមក្របខ័ណ្ឌនៃគណៈកម្មាធិការព្រំដែនទូទៅ (GBC) គណៈកម្មាធិការព្រំដែនថ្នាក់យោធភូមិភាគ (RBC) និងគណៈកម្មាការចម្រុះព្រំដែន (JBC) ដោយបានសង្កត់ធ្ងន់ថា ភាពសុទ្ធចិត្តត្រូវតែបង្ហាញតាមរយៈសកម្មភាពពិតប្រាកដនៅទីកន្លែង ។
ឯកឧត្តមឧបនាយករដ្ឋមន្ត្រី បានបន្តថា ក្នុងនាមជាប្រទេសដែលមានស្លាកស្នាមបង្កដោយជម្លោះជាច្រើនទសវត្សរ៍ ឬអាចថា រាប់សតវត្ស កម្ពុជាដឹងយ៉ាងច្បាស់អំពីផលវិបាកដ៏អាក្រក់នៃសង្គ្រាម ។ ប្រមុខការទូតកម្ពុជាក៏បានគូសបញ្ជាក់ថា ៖«ការណ៍នេះ បង្ហាញយ៉ាងច្បាស់ថា ហេតុអ្វីបានជាយើងតែងតែចាត់ទុកសន្តិភាពជាទ្រព្យសម្បត្តិដ៏មានតម្លៃបំផុតរបស់យើង …។ កម្ពុជាបានប្រកាន់ជំហរយ៉ាងខ្ជាប់ខ្ជួន ក្នុងការដោះស្រាយវិវាទដោយសន្តិវិធី អនុលោមយ៉ាងពេញលេញតាមច្បាប់អន្តរជាតិ ។ យើងគ្មានបំណងចង់យកអ្វីដែលមិនមែនជារបស់យើងទេ ប៉ុន្តែទន្ទឹមនឹងនោះ យើងនឹងមិនទទួលយកការបាត់បង់នូវអ្វីដែលជាកម្មសិទ្ធិរបស់យើងដោយត្រឹមត្រូវនោះទេ ។ អ្វីដែលយើងស្វែងរក គឺដំណោះស្រាយប្រកបដោយយុត្តិធម៌ មិនលំអៀង និងផ្អែកលើច្បាប់ ដែលអាចធានាបាននូវសន្តិភាពយូរអង្វែងសម្រាប់ប្រជាជនយើង» ។
ក្នុងន័យនេះ ឯកឧត្តមឧបនាយករដ្ឋមន្ត្រី បានលើកឡើងពីការងារអាទិភាពសំខាន់ៗមួយចំនួនដែលភាគីទាំងពីរបានឯកភាពនាពេលថ្មីៗនេះ ដើម្បីរួមគ្នាកាត់បន្ថយភាពតានតឹង កសាងទំនុកចិត្តឡើងវិញ ពង្រឹងកិច្ចសហប្រតិបត្តិការរួមមាន ៖ ការដកទៅវិញនូវអាវុធធុនធ្ងន់ , ការដោះមីនមនុស្សធម៌ , ការប្រយុទ្ធប្រឆាំងនឹងឧក្រិដ្ឋកម្មឆ្លងដែន , ការគ្រប់គ្រងការតាំងទីលំនៅរបស់ជនស៊ីវិលនៅតាមព្រំដែន និងការប្រឆាំងព័ត៌មានមិនពិត ។
ឧបនាយករដ្ឋមន្ត្រីគូសបញ្ជាក់ជាថ្មី ពីការប្តេជ្ញាចិត្តរបស់កម្ពុជា ក្នុងការធ្វើការជាមួយប្រទេសថៃ ក្នុងនាមជាអ្នកជិតខាងអចិន្ត្រៃយ៍ ក្នុងការបំពេញនូវការទទួលខុសត្រូវរួមដើម្បីស្តារប្រក្រតីភាព សន្តិភាព ស្ថិរភាព និងវិបុលភាពរវាងប្រទេស និងប្រជាជនទាំងពីរ៕
ចែករំលែកព័តមាននេះ