ទីក្រុងគែ៖ បណ្ដាថ្នាក់ដឹកនាំប្រទេសមួយចំនួនកំពុងជួបជុំគ្នានៅប្រទេសអេហ្ស៊ីបក្រោមគំនិតផ្ដួចផ្ដើមរបស់លោកដូណាល់ត្រាំដើម្បីបង្ហាញការគាំទ្រចំពោះកិច្ចខិតខំប្រឹងប្រែងបញ្ចប់សង្គ្រាមរវាងអ៊ីស្រាអែល និងហាម៉ាស់។ កិច្ចជំនួបលើកនេះត្រូវគេប្រសិទ្ធនាមថា «កិច្ចជំនួបកំពូលដើម្បីសន្តិភាព»។ ដោយសារអ៊ីស្រាអែល និងហាម៉ាស់គ្មានទំនាក់ទំនងជាមួយគ្នា ដូច្នេះរាល់ពេលចរចាគ្នាម្ដងៗត្រូវធ្វើឡើងតាមរយៈប្រទេសទីបីធ្វើជាអន្តរការី។ នៅក្នុងកិច្ចជំនួបលើកនេះ ពួកគេមិនបានចូលរួមទេ។
ខុទ្ទកាល័យនាយករដ្ឋមន្ត្រីអ៊ីស្រាអែលថ្លែងថាលោកណឺតាន់យ៉ាហ៊ូនឹងមិនធ្វើដំណើរទៅអេហ្ស៊ីបដើម្បីចូលរួមកិច្ចប្រជុំទេព្រោះនេះជាថ្ងៃបុណ្យរបស់ជនជាតិជ្វីប។ កិច្ចជំនួបនេះរៀបចំឡើងចំពេលក្រុមហាម៉ាស់ចាប់ផ្ដើមដោះលែងចំណាប់ខ្មាំងដែលនៅរស់ជាបណ្ដើរៗ (ថ្ងៃនេះដោះលែង៧នាក់នៅក្នុងចំណោម២០នាក់)។ ចំណែកអ៊ីស្រាអែលដោះលែងអ្នកទោសប៉ាឡេស្ទីនជិត២ពាន់នាក់។
បញ្ហានៅមានច្រើនទៀតដែលមិនទាន់ដោះស្រាយចេញ។ នេះគ្រាន់តែជាការអនុវត្តកិច្ចព្រមព្រៀងមួយផ្នែកតូចតែប៉ុណ្ណោះ។ ហេតុនេះហើយគេនៅតែបារម្ភថាស្រួលមិនស្រួលតំបន់ហ្កាហ្សាអាចនឹងធ្លាក់ទៅក្នុងភ្លើងសង្គ្រាមសាជាថ្មីទោះបីពិភពលោកកំពុងធ្វើការយ៉ាងដុតដៃដុតជើងដើម្បីជំរុញឱ្យមានសន្តិភាពជាអចិន្ត្រៃយ៍យ៉ាងណាក្ដី។
ខុទ្ទកាល័យប្រធានាធិបតីអេហ្ស៊ីបថ្លែងថាកិច្ចជំនួបកំពូលលើកនេះរៀបចំឡើងដើម្បីបិទបញ្ចប់សង្គ្រាមនៅតំបន់ហ្កាហ្សា និងបើកទំព័រសករាជថ្មីឈានទៅរកការកសាងសន្តិភាព និងស្ថិរភាពនៅទូទាំងតំបន់មជ្ឈិមបូព៌ាស្របទៅតាមទស្សនវិស័យរបស់លោកត្រាំ។ អ៊ីស្រាអែល និងហាម៉ាស់រងសម្ពាធខ្លាំងណាស់បានជាពួកគេយល់ព្រមទទួលយកបទឈប់បាញ់។
នៅក្នុងកិច្ចព្រមព្រៀងដំណាក់កាលទីមួយនេះ ទាហានអ៊ីស្រាអែលត្រូវដកថយចេញពីតំបន់ហ្កាហ្សាមួយផ្នែក និងអនុញ្ញាតឱ្យប្រជាជនប៉ាឡេស្ទីនវិលត្រឡប់ទៅផ្ទះរបស់ពួកគេវិញ។ ទន្ទឹមនឹងនោះ ទីភ្នាក់ងារផ្ដល់ជំនួយមនុស្សធម៌ត្រៀមដឹកជញ្ជូនស្បៀងអាហារនៅក្នុងបរិមាណច្រើនដើម្បីបំពេញសេចក្ដីត្រូវការរបស់អ្នកអត់-ឃ្លានដែលមិនបានបរិភោគគ្រប់គ្រាន់អស់រយៈពេលជាច្រើនខែមកហើយ។
បញ្ហាប្រឈមធំៗនៅជាធរមាន
ការចរចាគ្នាលើកនេះដើម្បីដោះស្រាយបញ្ហាដ៏ធំមួយ។ នោះគឺការទម្លាក់អាវុធចុះរបស់ក្រុមហាម៉ាស់, ការបង្កើតរដ្ឋាភិបាលក្រោយសង្គ្រាមនៅហ្កាហ្សា និងការដកកងទ័ពអ៊ីស្រាអែលចេញពីទីតាំងដែលពួកគេកំពុងត្រួតត្រា។ នៅក្នុងផែនការសន្តិភាពរបស់លោកត្រាំក៏មាននិយាយអំពីក្រុមប្រទេសជាដៃគូនៅក្នុងតំបន់ និងនៅទូទាំងសាកលលោកសហការគ្នាដើម្បីបង្កើតកងសន្តិសុខជាតិប៉ាឡេស្ទីន។ បញ្ហានេះត្រូវឆ្លងកាត់ការអនុម័តពីក្រុមប្រឹក្សាសន្តិសុខអង្គការសហប្រជាជាតិ។
បញ្ហាដ៏ធំមួយទៀតគឺការរៃអង្គាសថវិកាដើម្បីកសាងតំបន់ហ្កាហ្សាឡើងវិញ។ ធនាគារពិភពលោក និងអេហ្ស៊ីបប៉ាន់ស្មានថាគេត្រូវការថវិកា៥៣ពាន់លានដុល្លារដើម្បីកសាង និងស្ដារសម្បទាតំបន់ហ្កាហ្សា។ អេហ្ស៊ីបគ្រោងធ្វើជាម្ចាស់ផ្ទះរៀបចំកិច្ចប្រជុំស្ដីពីការកសាងតំបន់ហ្កាហ្សាឡើងវិញ។ គួរកត់សម្គាល់ថាអ៊ីរ៉ង់ដែលជាអ្នកជួយជ្រោមជ្រែងក្រុមហាម៉ាស់ដ៏ធំជាងគេមិនបានចូលរួមនៅក្នុងកិច្ចប្រជុំនៅអេហ្ស៊ីបទេ។ ចំពោះកិច្ចព្រមព្រៀងដំណាក់កាលទីមួយនោះ អ៊ីរ៉ង់យល់ថានេះជាជោគជ័យរបស់ក្រុមហាម៉ាស់។ ខាងលើនេះជាការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ