ប្រទេសនីហ្សេ ៖ កងទាហាននីហ្សេ១៧នាក់ស្លាប់និង១១នាក់ទៀតបាត់ខ្លួន កាលពីថ្ងៃទី១៤ឧសភា ក្រោយការវាយប្រហារនៅជិតព្រំដែនម៉ាលី ក្នុងតំបន់TILLABERIភាគខាងលិចប្រទេស ដែលនៅទីនោះទាហានអាមេរិក៤នាក់និងទាហាននីហ្សេ៥នាក់ បានស្លាប់ក្នុងការពួនស្ទាក់វាយប្រហារមួយកាលពីឆ្នាំ២០១៧។
ប្រភពសន្តិសុខមួយនិយាយថាតុល្យការនោះអាចមានខ្ពស់ជាងនេះ ហើយវាជាការវាយប្រហារភេរវកម្មមួយ នៅជិតភូមិតុងហ្គោតុងហ្គោ។ មុននេះបន្តិចប្រភពសន្តិសុខមួយទៀតបានគូសបញ្ជាក់ថា កងល្បាតយោធាមួយកាលពីរសៀលថ្ងៃទី១៤ឧសភា បានធ្លាក់ក្នុងការពួនស្ទាក់វាយប្រហារ ដោយពួកជនប្រដាប់អាវុធ។
អ្នករបួសជាច្រើនត្រូវបានបញ្ជូនទៅមន្ទីរពេទ្យក្រុងនីញ៉ាម៉េ។ រថយន្តមួយគ្រឿងក្នុងចំណោមរថយន្តកងល្បាតនេះ បានត្រូវគ្រាប់មីនផ្ទុះ ហើយប្រតិបត្តិការបោសសម្អាតមួយ ត្រូវបានធ្វើនាថ្ងៃទី១៥ឧសភា។ កងទាហានល្បាតនោះមានគ្នា៥២នាក់ បានធ្លាក់ក្នុងការពួនស្ទាក់វាយប្រហារ របស់ពួកជនដែលមានអាវុធគ្រប់គ្រាន់ ហើយការប្រយុទ្ធគ្នាមានភាពខ្លាំងក្លា និងមានរយៈពេលដល់ជាង២ម៉ោង។
ការវាយប្រហារនៅតំបន់នោះកាលពីឆ្នាំ២០១៧ ប្រកាសទទួលខុសត្រូវដោយក្រុមរដ្ឋអ៊ិស្លាម៕
ចែករំលែកព័តមាននេះ