សហរដ្ឋអាមេរិក-រុស្ស៊ី ៖ ប្រធានាធិបតីរុស្ស៊ីលោកវ្ល៉ាឌីមៀរពូទីន ថ្លែងកាលពីថ្ងៃទី១៤ឧសភាទៅកាន់រដ្ឋមន្ត្រីការបរទេសអាមេរិក លោកMIKE POMPEOថា លោកមានអារម្មណ៍ដែលលោកដូណាល់ត្រាំពិតជាចង់កែលម្អជាយថាហេតុ ទំនាក់ទំនងរុស្ស៊ី-អាមេរិក ដែលមានភាពល្អក់កករខ្លាំងរយៈពេលប៉ុន្មានឆ្នាំចុងក្រោយនេះ។
នៅក្រុងសូតជីជាប់មាត់សមុទ្រខ្មៅ លោកពូទីនថ្លែងទៅកាន់លោកPOMPEOថា ខ្ញុំមានអារម្មណ៍ថា ប្រធានាធិបតីរបស់លោកចង់ស្ដារឡើងវិញទំនាក់ទំនងនិងការប្រាស្រ័យទាក់ទងគ្នារុស្ស៊ី-អាមេរិក ហើយលោកពិតជាចង់ដោះស្រាយបណ្ដាបញ្ហាដែលមានផលប្រយោជន៍រួម។ យើងធ្លាប់បាននិយាយជាច្រើនលើកថា យើងក៏ចង់ស្ដារឡើងវិញឲ្យបានពេញលេញ ទំនាក់ទំនងរបស់យើងដែរ។ ខ្ញុំសង្ឃឹមថាលក្ខខណ្ឌចាំបាច់នានាសម្រាប់ការអនុវត្តបែបនោះនឹងត្រូវបង្កើតឡើង។
ទីប្រឹក្សាវិមានក្រឹមឡាំង១រូប លោកអុីអ៊ូរីអ៊ូឆាកូវថ្លែងថា ម្យ៉ាងទៀតលោកពូទីនបានបើកទ្វារសម្រាប់ការជួបគ្នាថ្មីមួយ ជាមួយលោកត្រាំប្រសិនបើក្រុងមូស្គូទទួលសំណើផ្លូវការមួយក្នុងន័យនេះ។ លោកត្រាំនិយាយកាលពីថ្ងៃទី១៣ឧសភាថា លោកគ្រោងជួបជាមួយលោកពូទីននៅខាងក្រៅកិច្ចប្រជុំកំពូលG20 ក្នុងទីក្រុងអូសាកាប្រទេសជប៉ុននាខែមិថុនាខាងមុខនេះ។
ប្រធានាធិបតីរុស្ស៊ីក៏បានអះអាងជាថ្មីនៅក្រុងសូតជីថា ក្រុងមូស្គូដាច់ខាតមិនជ្រៀតជ្រែកចូលក្នុងការបោះឆ្នោតប្រធានាធិបតីអាមេរិកឡើយ៕
ចែករំលែកព័តមាននេះ