រាជធានីភ្នំពេញ ៖ បុរសជាជនជាតិចិនម្នាក់ស្រវឹងជោកបើករថយន្តស៊េរីទំនើបមួយគ្រឿងបោះពួយយ៉ាងលឿនទៅបុកខឿនសួនច្បារដាក់បង្គោលប៉ារាសដែលនៅកណ្តាលផ្លូវ បង្កឲ្យមានការភ្ញាក់ផ្អើលកាលពីវេលាម៉ោង៩និង៤០នាទីយប់ថ្ងៃទី១៣ ខែឧសភា ឆ្នាំ២០១៩ ត្រង់ចំណុចខាងមុខអគារកាំកូស៊ីធី តាមបណ្តោយផ្លូវបុរីអង្គរភ្នំពេញ ស្ថិតក្នុងសង្កាត់ទួលសង្កែទី២ ខណ្ឌឫស្សីកែវ។…
រាជធានីភ្នំពេញ ៖ បុរសជាជនជាតិចិនម្នាក់ស្រវឹងជោកបើករថយន្តស៊េរីទំនើបមួយគ្រឿងបោះពួយយ៉ាងលឿនទៅបុកខឿនសួនច្បារដាក់បង្គោលប៉ារាសដែលនៅកណ្តាលផ្លូវ បង្កឲ្យមានការភ្ញាក់ផ្អើលកាលពីវេលាម៉ោង៩និង៤០នាទីយប់ថ្ងៃទី១៣ ខែឧសភា ឆ្នាំ២០១៩ ត្រង់ចំណុចខាងមុខអគារកាំកូស៊ីធី តាមបណ្តោយផ្លូវបុរីអង្គរភ្នំពេញ ស្ថិតក្នុងសង្កាត់ទួលសង្កែទី២ ខណ្ឌឫស្សីកែវ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ជាជនជាតិចិនបើកបររថយន្តស៊េរីទំនើបមួយគ្រឿងម៉ាកឡង់គ្រីស្ស័រ ពណ៌ខ្មៅ ពាក់ស្លាកលេខ ភ្នំពេញ ២L-១៧៨១ បើកបរក្នុងស្ថានភាពស្រវឹងជោកក្នុងទិសដៅដៅពីត្បូងទៅជើង និងបើកបរក្នុងល្បឿនយ៉ាងលឿន។ លុះមកដល់ចំណុចកើតហេតុខាងលើក៏ស្រាប់តែរថយន្តនោះបានរេចង្កូតទៅខាងឆ្វេងបុកខឿនសួនច្បារបង្គោលដាក់ប៉ារាសដែលនៅចំកណ្ដាលផ្លូវទំហំប្រមាណ២ម៉ែត្រ៤ជ្រុង បណ្ដាលឲ្យបែកបាក់រងការខូចខាតអស់ពាក់កណ្ដាល។
តាមប្រភពព័ត៌មានដដែលបានបន្តថា ចំណែកឯរថយន្តបង្កបានរងការខូចខាតបែកផ្នែកខាងមុខចំហៀងខាងឆ្វេង ពេលនោះអ្នកបើកបរបានបើករថយន្តទៅឈប់អែបចិញ្ចើមផ្លូវរួចក៏ចុះពីលើរថយន្តរត់គេចខ្លួនចេញពីកន្លែងកើតហេតុបាត់ស្រមោល បន្សល់ទុកតែរថយន្តដែលរងការខូចខាតនៅកន្លែងកើតហេតុប៉ុណ្ណោះ។
ក្រោយពេលកើតហេតុ សមត្ថកិច្ចមូលដ្ឋានក៏បានចុះមកដល់កន្លែងកើតហេតុ រួចក៏បានទាក់ទងហៅសមត្ថកិច្ចជំនាញចុះមកធ្វើការវាស់វែងស្ទូចយករថយន្តម៉ាកឡង់គ្រីស្ស័រនោះទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញដើម្បីរង់ចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់ជាបន្តទៀតនៅពេលក្រោយ៕
ចែករំលែកព័តមាននេះ