ខេត្តកំពង់ស្ពឺ ៖ រថយន្តកុងតឺន័រ១គ្រឿងបានខូចខាតផ្នែកខាងមុខដូចបាក់ក ដែលសង្ស័យពេលបើកជែង ក៏រថយន្ត១គ្រឿងទៀតបើកបរលឿនក្នុងដំណើរបញ្ច្រាសទិសគ្នាបុកពេញទំហឹង រួចហើយរថយន្តនេះបន្ថែមល្បឿនគេចទៅបាត់ស្រមោល ។ ការជែងគ្នាលើដងផ្លូវ មិនថាតែយានយន្តតូចៗទេ គឺជារឿយៗគេក៏តែងឃើញរថយន្តធំៗបើកជែងគ្នាដែរ…
ខេត្តកំពង់ស្ពឺ ៖ រថយន្តកុងតឺន័រ១គ្រឿងបានខូចខាតផ្នែកខាងមុខដូចបាក់ក ដែលសង្ស័យពេលបើកជែង ក៏រថយន្ត១គ្រឿងទៀតបើកបរលឿនក្នុងដំណើរបញ្ច្រាសទិសគ្នាបុកពេញទំហឹង រួចហើយរថយន្តនេះបន្ថែមល្បឿនគេចទៅបាត់ស្រមោល ។ ការជែងគ្នាលើដងផ្លូវ មិនថាតែយានយន្តតូចៗទេ គឺជារឿយៗគេក៏តែងឃើញរថយន្តធំៗបើកជែងគ្នាដែរ ។
ហេតុការណ៍គ្រោះថ្នាក់នេះ កើតឡើងកាលពីព្រឹកថ្ងៃទី១៩ ខែធ្នូ ឆ្នាំ២០២៥ នៅតាមផ្លូវជាតិលេខ៤ ចន្លោះបង្គោលគីឡូម៉ែត្រលេខ១០៣-១០៤ ស្ថិតក្នុងភូមិទី៦ ឃុំយាយម៉ៅពេជ្រនិល ស្រុកភ្នំស្រួច ។
នគរបាលស្រុកភ្នំស្រួចបានឱ្យដឹងថា រថយន្តសណ្តោងកុងតឺន័រ INTERNATIONAL ពណ៌ស ពាក់ផ្លាកលេខ ភ្នំពេញ ៣E-៦៨៥៨ សណ្តោងសឺមីរ៉ឺម៉កពណ៌ឈាមជ្រូក ពាក់ផ្លាកលេខ ភ្នំពេញ
៤A-៦៧២០ បើកបរដោយឈ្មោះ សេង សុភក្ត្រា ភេទប្រុស អាយុ២៥ឆ្នាំ រស់នៅក្នុងភូមិប៉ែលហែល សង្កាត់សុព័រទេព ក្រុងច្បារមន ធ្វើដំណើរតាមផ្លូវជាតិលេខ៤ ពីខាងកើតទៅខាងលិច ។
លុះទៅដល់ចំណុចខាងលើ បានជែងរថយន្ត១គ្រឿងទៀត ក៏ទៅបុកជាមួយរថយន្ត១គ្រឿងមិនស្គាល់ម៉ាក និងអត្តសញ្ញាណអ្នកបើកបរ ក្នុងដំណើរបញ្ច្រាសទិសគ្នាពេញទំហឹង ។ គ្រោះថ្នាក់នេះ បណ្តាលឲ្យខូចខាតក្បាលរថយន្តសណ្តោងកុងតឺន័រដូចបត់ក និងអ្នកបើកបរ សេង សុភក្ត្រា រងរបួសស្រាល ។
ប្រភពដដែលបន្តថា នៅក្នុងគ្រោះថ្នាក់នេះ ខាងរថយន្តកុងតឺន័រមិនបានប្ដឹងសមត្ថកិច្ចឱ្យស្រាវជ្រាវរកភាគីម្ខាងទៀតនោះទេ ហើយម្ចាស់រថយន្តអាចយករថយន្ដខាងលើទៅជួសជុលដោយខ្លួនឯង ដោយចាត់ទុកថាជាថ្ងៃស៊យទៅចុះ ៕
ចែករំលែកព័តមាននេះ